parents protest in front of collector office ସୋନପୁର:ରାସ୍ତାରେ ଭାରିଯାନ ଯାତାୟତ କରୁଥିବାରୁ ସ୍କୁଲ ଯିବା ସମୟରେ ଅସୁରକ୍ଷିତ ମନେ କରୁଛନ୍ତି ଛାତ୍ରଛାତ୍ରୀ । ସମସ୍ୟାର ସମାଧାନ ପାଇଁ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ନୀରବ ବିକ୍ଷୋଭ ପ୍ରଦର୍ଶନ କଲେ ଅଭିଭାବକ । ହରଡୋଖୋଲ ପଞ୍ଚାୟତର 5ଟି ମୌଜା ଯଥା ଲକର୍ମା, ଡାହାଜା, ଅର୍ଜୁନପୁର, ଜାମପାଲି ଓ କୁଲିପାଲି ମୌଜାର ଛାତ୍ରଛାତ୍ରୀଙ୍କ ଅଭିଭାବକ ଓ ବିଦ୍ୟାଳୟ କମିଟିର କାର୍ଯ୍ୟକର୍ତ୍ତାମାନେ ଜିଲ୍ଲାପାଳଙ୍କ କାର୍ଯ୍ୟାଳୟ ଆଗରେ ବିକ୍ଷୋଭ ପ୍ରଦର୍ଶନ କରିଛନ୍ତି ।
ଲକର୍ମା ପ୍ରାଥମିକ ବିଦ୍ୟାଳୟରେ ପଢୁଥିବା ଛାତ୍ରଛାତ୍ରୀମାନେ ରାସ୍ତାରେ ଯା ଆସ ସମୟରେ ଅସୁରକ୍ଷିତ ମନେ କରୁଥିବାରୁ ଏହାର ପ୍ରତିକାର କରିବା ପାଇଁ ଦାବି କରିଛନ୍ତି । ଲକର୍ମା ଗାଁର ତେଲନଦୀ ଘାଟରୁ ପ୍ରତିଦିନ ଶହ ଶହ ବାଲି ବୋଝେଇ ଟ୍ରାକ୍ଟର ଓ ଡମ୍ଫର ଲକର୍ମା ବିଦ୍ୟାଳୟ ଆଗ ରାସ୍ତା ଦେଇ ଯାତାୟତ କରୁଛି । ତେଲନଦୀରୁ ଲକର୍ମା ବିଦ୍ୟାଳୟ ଆଗ ରାସ୍ତା ଦେଇ ଅର୍ଜୁନପୁର ଜଙ୍ଗଲ ମଧ୍ୟ ଦେଇ ଯାଇଥିବା ବନ ବିଭାଗର ରାସ୍ତାରେ ଘାଟରୁ ବାଲି ଚାଲାଣ ହେଉଛି । ଏହା ଗ୍ରାମ୍ୟ ରାସ୍ତା ହୋଇ ଥିବାରୁ ଧୂଳି ଉଡିବା ସହିତ ଛାତ୍ରଛାତ୍ରୀମାନେ ଯାତାୟତ ସମୟରେ ଅନେକ ଅସୁବିଧାର ସମ୍ମୁଖୀନ ହେଉଛନ୍ତି । ଫଳରେ ଅଭିଭାବକ, ଛାତ୍ରଛାତ୍ରୀ ଓ ଶିକ୍ଷକଙ୍କ ଭିତରେ ଭୟ ଲାଗି ରହୁଛି ।
ଏହା ମଧ୍ୟ ପଢନ୍ତୁ-ଶିକ୍ଷୟିତ୍ରୀଙ୍କ ବଦଳିକୁ ବିରୋଧ, ବିଦ୍ୟାଳୟ ଆଗରେ ଛାତ୍ରଛାତ୍ରୀ ଓ ଅଭିଭାବକଙ୍କ ଧାରଣା
ଦୁର୍ଘଟଣାର ଆଶଙ୍କା ଥିବାରୁ ଏହି ରାସ୍ତା ଦେଇ ଭାରିଯାନ ଚଳାଚଳକୁ ବିଦ୍ୟାଳୟର ଅଭିଭାବକମାନେ ବିରୋଧ କରିଛନ୍ତି । ବିଦ୍ୟାଳୟରେ ପ୍ରଥମରୁ ଅଷ୍ଟମ ଶ୍ରେଣୀ ଯାଏଁ 5ଟି ମୌଜାର ପ୍ରାୟ ଅଢେଇ ଶହରୁ ଅଧିକ ଛାତ୍ରଛାତ୍ରୀ ଅଧ୍ୟୟନ କରୁଛନ୍ତି । ବିଦ୍ୟାଳୟକୁ ଛାତ୍ରଛାତ୍ରୀମାନେ ସାଇକେଲ ଅବା ଚାଲି ଚାଲି ବିଦ୍ୟାଳୟକୁ ସେହି ରାସ୍ତାରେ ଯାଉଛନ୍ତି । ତେବେ ଦିନ ରାତି ଏହି ରାସ୍ତାରେ ଭାରି ଯାନ ଚଳାଚଳ କରୁଥିବାରୁ ଜନସାଧାରଣଙ୍କ ମନରେ ଭୟ ସୃଷ୍ଟି ହେଉଥିବା ଅଭିଯୋଗ ହୋଇଛି । ଅଭିଭାବକମାନେ ଜିଲ୍ଲା ଶିକ୍ଷା ଅଧିକାରୀ, ରାଜସ୍ବ ଅଧିକାରୀ, ଗୋଷ୍ଠି ଉନ୍ନୟନ ଅଧିକାରୀଙ୍କୁ ଭାରିଯାନ ଚଳାଚଳ ବନ୍ଦ କରିବାକୁ ବିଭିନ୍ନ ସମୟରେ ଜଣାଇଛନ୍ତି ।
ପୂର୍ବରୁ ବିଦ୍ୟାଳୟ କମିଟି ଏ ସଂପର୍କରେ ଲିଖିତ ଭାବେ ଜିଲ୍ଲା ଶିକ୍ଷା ଅଧିକାରୀଙ୍କୁ ଜଣାଇବା ସହିତ ଏହାର ପ୍ରତିକାର କରିବା ପାଇଁ ଦାବି କରିଛନ୍ତି । ହେଲେ ରାଜସ୍ବ ବିଭାଗ ଓ ଜିଲ୍ଲା ଶିକ୍ଷା ବିଭାଗ ଭିତରେ ସମନ୍ବୟ ଅଭାବରୁ ଛାତ୍ରଛାତ୍ରୀଙ୍କ ସୁରକ୍ଷା ସଂପର୍କରେ କୌଣସି ପଦକ୍ଷେପ ନିଆଯାଇ ନାହିଁ । ତେବେ ତୁରନ୍ତ ଏ ଦିଗରେ ପଦକ୍ଷେପ ନେବା ପାଇଁ 5ମୌଜାର ଅଭିଭାବକ ଓ ବିଦ୍ୟାଳୟ କମିଟିର କାର୍ଯ୍ୟକର୍ତ୍ତା ଆଜି ଲିଖିତ ଭାବେ ଜିଲ୍ଲା ପ୍ରଶାସନ ପାଖରେ ଦାବି ରଖିଛନ୍ତି । ତୁରନ୍ତ ଦାବି ପୂରଣ କରା ନଗଲେ ଆଗକୁ ଆନ୍ଦୋଳନ କରାଯିବା ବୋଲି ଚେତାବନୀ ଦେଇଛନ୍ତି । ସେପଟେ ଜିଲ୍ଲା ପ୍ରଶାସନ ସ୍ଥାନୀୟ ରାଜସ୍ବ ବିଭାଗକୁ ଜନସାଧାରଣଙ୍କ ଦାବି ପ୍ରତି ଧ୍ୟାନ ଦେବା ପାଇଁ ନିର୍ଦ୍ଦେଶ ଦେଇଥିବା ସୂଚନା ମିଳିଛି ।
ଇଟିଭି ଭାରତ, ସୋନପୁର
