ସୁବର୍ଣ୍ଣପୁର: ମୋ ସରକାର ଓ 5ଟି ଭଳି ମେଗା ଯୋଜନା ରାଜ୍ୟରେ କାର୍ଯ୍ୟକାରୀ ହେଉଛି । ହେଲେ ବିକାଶର ଫଳ ଶୂନ। ଆମ୍ବୁଲାନ୍ସ ପହଞ୍ଚି ନ ପାରିବାରୁ ଆହତ ବୃଦ୍ଧାଙ୍କୁ ଖଟିଆରେ ବୁହାହୋଇ ଡାଲାଗାଡ଼ି ଯୋଗେ ମେଡିକାଲରେ ଭର୍ତ୍ତି କରାଯାଇଛି । ଏଭଳି ଏକ ଅଭାବନୀୟ ଘଟଣା ଦେଖିବାକୁ ମିଳିଛି ସୁବର୍ଣ୍ଣପୁର ଜିଲ୍ଲା ଧର୍ମଶାଳା ନିକଟସ୍ଥ ଭଜବଲପୁର ଗ୍ରାମରେ । ଏକ ସଡକ ଦୁର୍ଘଟଣାରେ ଜଣେ ବୃଦ୍ଧା ଗୁରୁତର ଭାବେ ଆହତ ହୋଇଛନ୍ତି ।
ସୂଚନାଯୋଗ୍ୟ, ଗତକାଲି (ମଙ୍ଗଳବାର) ସନ୍ଧ୍ୟାରେ ଜଣେ ବୃଦ୍ଧା ରାସ୍ତାକଡ଼ରେ ଥିବା ନଳକୂପକୁ ପାଣି ନେଇ ଯାଇଥିବା ବେଳେ ଏକ ଅଜଣା ବାଇକ ଚାଳକ ତାଙ୍କୁ ଧକ୍କା ଦେଇଥିଲେ। ଫଳରେ ସେ ଗୁରୁତର ଆହତ ହୋଇଛନ୍ତି । ଆହତ ବୃଦ୍ଧାଙ୍କ ପରିବାର ଲୋକେ ପ୍ରଥମେ 108 ଆମ୍ବୁଲାନ୍ସକୁ ଫୋନ କରିଥିଲେ। କିନ୍ତୁ ପ୍ରାୟ ଏକ ଘଣ୍ଟା ବିତି ଯାଇଥିଲେ ମଧ୍ୟ ଆମ୍ବୁଲାନ୍ସ ଆସି ନଥିଲା। ପରେ ଅଗ୍ନିଶମ ବିଭାଗକୁ ଫୋନ କରିବାରୁ ଅଗ୍ନିଶମ ବିଭାଗର ଗାଡି ବି ପହଞ୍ଚି ପାରି ନଥିଲା । ତେବେ ବୃଦ୍ଧା ମହିଳାଙ୍କୁ ଖଟରେ ଶୁଆଇ ଆଣୁଥିବା ବେଳେ ରାସ୍ତାରେ ଆସୁଥିବା ଏକ ଡାଲାଗାଡି ତାଙ୍କୁ ଡାକ୍ତରଖାନା ଆଣିବାକୁ ରାଜି ହୋଇଥିଲା ।