ସୁବର୍ଣ୍ଣପୁର: ସୁବଲୟା ଥାନା ଅନ୍ତର୍ଗତ ଲୁତୁରପଙ୍କ ଗାଁର ଚାଷ ଜମିରୁ ପୋଲିସ ଉଦ୍ଧାର କରିଥିବା ମୁଣ୍ଡ ବିହୀନ ମୃତଦେହର ପର୍ଦ୍ଦାଫାଶ ହୋଇଛି । ଅଭିଯୁକ୍ତ ମୃତକକୁ ସାଙ୍ଗରେ ଆଣି ବୁଲାବୁଲି କରି ଘରକୁ ଫେରିବା ସମୟରେ ଅଭିଯୁକ୍ତ ହତ୍ୟା କରି ମୁଣ୍ଡ, ହାତ ଓ ଗୋଡ଼ କାଟି ବିଭିନ୍ନ ଯାଗାରେ ଫୋଫାଡ଼ି ଦେଇଥିବା ପୋଲିସ ଆଗରେ ସ୍ୱୀକାର କରିଛି । ବୁଧବାର ବିରମହରାଜପୁର ଥାନା ପରିସରରେ ଆୟୋଜିତ ସାମ୍ବାଦିକ ସମ୍ବିଳନୀରେ ଜିଲ୍ଲା ଆରକ୍ଷୀ ଅଧିକ୍ଷକ ଦେବୀ ପ୍ରସାଦ ଦାସ ହତ୍ୟାକାଣ୍ଡର ସୂଚନା ଦେଇଛନ୍ତି ।
ପ୍ରକାଶଥାଉ କି ଗତ ଗତ 5 ତାରିଖ ଶନିବାର ପୋଲିସ ଏକ ମୁଣ୍ଡ ବିହୀନ ମୃତଦେହ ଉଦ୍ଧାର କରିଥିଲା । ପୋଲିସ ତଦନ୍ତ କରିବା ପରେ ତହିଁ ଆଗ ଶୁକ୍ରବାର ଦିନ ସନ୍ଧ୍ୟା ପ୍ରାୟ 9 ଟା ବେଳେ ଏହି ହତ୍ୟାକାଣ୍ଡ ହୋଇଥିବା ଜାଣି ପାରିଛି । ମୃତକ ଖଇରମାଲ ଗାଁର ମାନଭଞ୍ଜନ ବିଶ୍ୱାଳ ଓ ଗୁପ୍ତେଶ୍ଵର ବାଙ୍କୀ ଗାଁରୁ ଏକା ସଙ୍ଗେ ମାନଭଞ୍ଜନଙ୍କ ମୋଟର ସାଇକେଲରେ ଆସିଥିଲେ । ବୁଲାବୁଲି କରି ଘରକୁ ଫେରିବା ସମୟରେ ଗୁପ୍ତେଶ୍ଵର ଠେଙ୍ଗାରେ ପିଟି ମାନଭଞ୍ଜନଙ୍କୁ ହତ୍ୟା କରିଥିଲେ ।