ସୁବର୍ଣ୍ଣପୁର: ସୋନପୁର ମହାବିଦ୍ୟାଳୟରେ ମହାଦୁର୍ନୀତି । ଭିତ୍ତିଭୂମି ବିକାଶ ନାଁରେ ଲକ୍ଷଲକ୍ଷ ଟଙ୍କା ଚଳୁ । ଭିତ୍ତିଭୂମି ବିକାଶ ତଥା କୋଠରୀ ମରାମତି କାମରେ ହରିଲୁଟ ହୋଇଛି ଲକ୍ଷ ଲକ୍ଷ ଟଙ୍କା । ଯାହାର ପ୍ରମାଣ ଲାଗିଛି ‘ଇଟିଭି ଭାରତ’ ହାତରେ । କାର୍ଯ୍ୟରେ ବ୍ୟବହୃତ ସରଞ୍ଜାମ ପରିବହନ ପାଇଁ ହ୍ବାଇଟ ହର୍ଷ କନଷ୍ଟ୍ରକସନ ନାଁରେ ଥିବା ଟ୍ରାକ୍ଟର ଲାଗିଥିବା ଦର୍ଶାଇ 66 ହଜାର 384 ଟଙ୍କାର ବିଲ୍ ପ୍ରଦାନ କରାଯାଇଛି । ହେଲେ ବିଲ୍ରେ ଦର୍ଶାଯାଇଥିବା ଟ୍ରାକ୍ଟର ନମ୍ବର ଓଡି-17-1721 ଏକ ଟିଭିଏସ ମୋଟର କମ୍ପାନୀର ଏକ୍ସେଲ ସୁପର (ମୋପେଡ ଗାଡି) ଲୁନା ବୋଲି ଜଣାପଡିଛି । ଯାହା ବରଗଡ ପରିବହନ ବିଭାଗରେ ମନୋରଞ୍ଜନ ପ୍ରଧାନଙ୍କ ନାମରେ ରେଜିଷ୍ଟ୍ରେସନ ହୋଇଛି । ଏହା ପରିବହନରେ ହୋଇଥିବା ଦୁର୍ନୀତିକୁ ପଦାରେ ପକାଇଛି ।
କେବଳ ପରିବହନ ନୁହେଁ ଗୋଟିଏ ଟିନ୍ ନମ୍ବର ଥାଇ ତିନୋଟି ଦୋକାନର ବିଲ ପ୍ରଦାନ କରାଯାଇଛି । ଟିନ୍ ନମ୍ବର-22901806274 ଥାଇ ସୁରେଶ୍ବରୀ କନଷ୍ଟ୍ରକସନ, ମିଶ୍ର ସିମେଣ୍ଟ ଓ ସୁରେଶ୍ବରୀ ଟ୍ରେଡର୍ସକୁ ସମୁଦାୟ 4 ଲକ୍ଷ 79 ହଜାର 260 ଟଙ୍କାର ବିଲ୍ ପ୍ରଦାନ କରାଯାଇଛି । ସୁରେଶ୍ବରୀ କନଷ୍ଟ୍ରକସନକୁ 27,300 , ମିଶ୍ର ସିମେଣ୍ଟକୁ 13,760 ଓ ସୁରେଶ୍ବରୀ ଟ୍ରେଡର୍ସକୁ 4 ଲକ୍ଷ 38 ହଜାର 200 ଟଙ୍କାର ବିଲ ଦିଆଯାଇଛି । ତେବେ ଏସବୁ ତଥ୍ୟ ସୂଚନା ଅଧିକାର ଆଇନ ବଳରେ ମିଳିବା ପରେ ଦୁର୍ନୀତିରେ ପୂର୍ବତନ ଅଧ୍ୟକ୍ଷା ପ୍ରିୟଲତା ଜେନା ଓ ସୋନପୁର ମହାବିଦ୍ୟାଳୟର ଅନ୍ୟ ଦୁଇ ଜଣ କର୍ମଚାରୀ ସାମିଲ ଥିବା ଅଧ୍ୟକ୍ଷ କହିଛନ୍ତି । ଅପରପକ୍ଷରେ ଏହି ଦୁର୍ନୀତି କଥାକୁ ପରିଚାଳନା ପରିଷଦର ସଭାପତି ତଥା ଉପ ଜିଲ୍ଲାପାଳ ସ୍ବୀକାର କରିଥିବା ବେଳେ ଆଇନ ଅନୁଯାୟୀ ଦୃଢ କାର୍ଯ୍ୟାନୁଷ୍ଠାନ ନିଆଯିବ ବୋଲି ଦର୍ଶାଇଛନ୍ତି ।