ବଢୁଛି ହାତୀ ଉପଦ୍ରବ, କ୍ଷତି ପୂରଣ ଆଶାରେ ପ୍ରଭାବିତ ଚାଷୀ

ସୁବର୍ଣ୍ଣପୁର ଜିଲ୍ଲା ଉପାନ୍ତରେ ଥିବା ବିରମହାରାଜପୁର ବନାଞ୍ଚଳର ଗୌଡଗାଡ ଗାଁରେ ପୁଣି ଦେଖିବାକୁ ମିଳିଛି ହାତୀ ପଲଙ୍କ ଉପଦ୍ରବ । ଦିନ ଦ୍ବିପ୍ରହରରେ ହାତୀ ପଲ ଆସି ଅନେକ ଚାଷୀଙ୍କ ଧାନ ଫସଲ ନଷ୍ଟ କରିଥିବା ଅଭିଯୋଗ ହୋଇଛି ।

ସୁବର୍ଣ୍ଣପୁର: ଜିଲ୍ଲାରେ ବଢିବାରେ ଲାଗିଛି ହାତୀ ଉପଦ୍ରବ । ଉପାନ୍ତରେ ଥିବା ବିରମହାରାଜପୁର ବନାଞ୍ଚଳର ଗୌଡଗାଡ ଗାଁରେ ପୁଣି ଦେଖିବାକୁ ମିଳିଛି ହାତୀ ପଲଙ୍କ ଉପଦ୍ରବ । ଦିନ ଦ୍ବିପ୍ରହରରେ ହାତୀ ପଲ ଆସି ଅନେକ ଚାଷୀଙ୍କ ଧାନ ଫସଲ ନଷ୍ଟ କରିଥିବା ଅଭିଯୋଗ ହୋଇଛି । ଦଳରେ ଛଅ ଘର ହାତୀ ଆସି ଗାଁର ମାଗୁଣି ଦୀପ, ରାତ୍ର ଦୀପଙ୍କ ପାଖାପାଖି 4 ଏକର ଜମିରେ ହୋଇଥିବା ଧାନ ଚାଷକୁ ଦଳି ଚକଟି ନଷ୍ଟ କରି ଦେଇଥିବା ଜଣା ପଡିଛି ।

ସେପଟେ ପାଖରେ ଥିବା ଗୌଡଗାଡ ସଂରକ୍ଷିତ ଜଙ୍ଗଲରୁ ହାତୀମାନେ ଆସି ଫସଲ ନଷ୍ଟ କରୁଥିବା ବେଳେ ବନ ବିଭାଗ ପକ୍ଷରୁ ହାତୀ ଘଉଡାଇବା ନେଇ କୌଣସି ପଦକ୍ଷେପ ନିଆଯାଉନଥିବା ଗ୍ରାମବାସୀ ଅଭିଯୋଗ କରିଛନ୍ତି । କେବଳ ସେତିକି ନୁହେଁ ହାତୀଙ୍କ ଉପଦ୍ରବରୁ ଚାଷୀଙ୍କ ଧନ ଜୀବନର ସୁରକ୍ଷା ପାଇଁ କୌଣସି ପଦକ୍ଷେପ ନିଆଯାଉ ନଥିବା ମଧ୍ୟ ଅଭିଯୋଗ ହୋଇଛି । ତେବେ କ୍ଷୟକ୍ଷତିର ଆକଳନ କରି ତୁରନ୍ତ ଚାଷୀଙ୍କୁ କ୍ଷତି ପୂରଣ ଦେବାକୁ ସାଧାରଣରେ ଦାବି ହୋଇଛି ।

ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ