ସୁବର୍ଣ୍ଣପୁର: ଜିଲ୍ଲାରେ ସ୍ବଳ୍ପ ବୃଷ୍ଟିପାତ ଯୋଗୁଁ ଚାଷୀ ମହଲରେ ଭାଲେଣୀ ପଡିଛି । ଚଳିତ ବର୍ଷ ଏଯାଏଁ ଆବଶ୍ୟକତା ଠାରୁ ପ୍ରାୟ 24 ପ୍ରତିଶତ କମ ବର୍ଷା ହୋଇଛି । ଫଳରେ ଖରିଫ ଋତୁ ଚାଷକାର୍ଯ୍ୟ ବାଧାପ୍ରାପ୍ତ ହୋଇଥିବା ବେଳେ ଏବେ ମରୁଡି ପରିସ୍ଥିତି ଦେଖା ଦେଇଛି । ବିହନ ସାର ଅଭାବରେ ଚାଷୀ ବିଳମ୍ବରେ ଚାଷ କାର୍ଯ୍ୟ ଆରମ୍ଭ କରିଛି । ସେହିପରି କାଦୁଅ ସାର ଓ ଦୁଇ ବୁଲିଆ ୟୁରିଆ ସାର ପାଇଁ ଚାଷୀ ବେଶ ହଇରାଣ ହେଉଛନ୍ତି ।
ସ୍ବଳ୍ପ ବୃଷ୍ଟି ପାଇଁ ୪ଟି ବ୍ଲକରେ ମରୁଡି ପରିସ୍ଥିତି
ଆଉ ଏବେ ସ୍ବଳ୍ପ ବୃଷ୍ଟିପାତ ଯୋଗୁଁ ଚାରୋଟି ବ୍ଳକରେ ମରୁଡି ପରିସ୍ଥିତି ଉପୁଜିଛି । ବିିଶେଷ କରି ଅଣ ଜଳସେଚିତ ସଦର ସୋନପୁର, ବୀରମହାରାଜପୁର, ତରଭା ଓ ଉଲୁଣ୍ଡାର ଧାନ ଚାଷ ଅନେକାଂଶରେ କ୍ଷତିଗ୍ରସ୍ତ ହୋଇଛି । ବାହାଲ କିସମ ଜମିକୁ ବାଦ ଦେଲେ ବେର୍ଣ୍ଣା, ଆଟ ଓ ମାଳ କିସମ ଜମି ମରୁଡିର ସମ୍ନୁଖୀନ ହୋଇଛି । ଚାଷୀମାନେ କରିଥିବା ସଅଳ ଅମଳ କିସମ ଧାନ ଚାଷ କ୍ଷତିଗ୍ରସ୍ତ ହୋଇଥିବା ବେଳେ ଆଟ, ମାଳ ଆଦି କିସମ ଜମିର ଧାନ ଚାଷ ବର୍ଷା ଅଭାବରୁ ବିହୁଡି ପାରି ନାହାନ୍ତି ।