ଧର୍ମୀୟ ଏକତାର ଉଦାହରଣ ସୁବର୍ଣ୍ଣପୁର କାଳୀପୂଜା, ୫୩ ବର୍ଷ ଧରି ଚାଲିଛି ପରମ୍ପରା

ସୁବର୍ଣ୍ଣପୁର ସହର ମଝିପଡାର ଶ୍ରୀରାମଜୀ ମନ୍ଦିର ସଂଲଗ୍ନ ମଣ୍ଡପରେ ଦେବୀ ମା’ଙ୍କ ପୂଜା ପାଳନରେ ମୁସଲମାନ ଶ୍ରଦ୍ଧାଳୁମାନେ ଆଜକୁ ଅର୍ଦ୍ଧ ଦଶନ୍ଧିରୁ ଅଧିକ ସମୟ ହେଲା ସହଯୋଗ କରି ଆସୁଛନ୍ତି । ଅଧିକ ପଢନ୍ତୁ...

ସୁବର୍ଣ୍ଣପୁର: ଧର୍ମୀୟ ଏକତାର ଉଦାହରଣ ସୁବର୍ଣ୍ଣପୁରର କାଳୀ ପୂଜା । ଯେଉଁଠି ଉଭୟ ହିନ୍ଦୁ ଓ ମୁସଲମାନ ଶ୍ରଦ୍ଧାଳୁ ଆଜକୁ 53 ବର୍ଷ ଧରି ଦେବୀ ମା’ କାଳୀଙ୍କ ପୂଜା କରି ଆସୁଛନ୍ତି । ସୁବର୍ଣ୍ଣପୁର ସହର ମଝିପଡାର ଶ୍ରୀରାମଜୀ ମନ୍ଦିର ସଂଲଗ୍ନ ମଣ୍ଡପରେ ଦେବୀ ମା’ଙ୍କ ପୂଜା ପାଳନରେ ମୁସଲମାନ ଶ୍ରଦ୍ଧାଳୁମାନେ ଆଜକୁ ଅର୍ଦ୍ଧ ଦଶନ୍ଧିରୁ ଅଧିକ ସମୟ ହେଲା ସହଯୋଗ କରି ଆସୁଛନ୍ତି ।

ତେବେ ଦୀପାବଳି ମଧ୍ୟରାତ୍ରରୁ ଆରମ୍ଭ ହେଉଥିବା ଦେବୀ ମା’ଙ୍କ ପୂଜା ଆରାଧନା ଶୁକ୍ଳ ଦଶମୀ ତିଥିରେ ସମାପନ ହେଉଥିବା ବେଳେ ଏକାଦଶୀ ତିଥିର ମଧ୍ୟାହ୍ନରେ ବିସର୍ଜନ ଶୋଭାଯାତ୍ରା ଆୟୋଜନ କରାଯାଇଥାଏ । କଳସ ସ୍ଥାପନରୁ ଆରମ୍ଭ କରି ଭୋଗ ପ୍ରସ୍ତୁତି ଓ ବିସର୍ଜନ ଶୋଭାଯାତ୍ରାରେ ବି ମୁସଲମାନ ଶ୍ରଦ୍ଧାଳୁମାନେ ସାମିଲ ହୋଇଥାନ୍ତି । ଦେବୀ ମା’ କାଳୀଙ୍କ ପୂଜା ମଣ୍ଡପର ପ୍ରାୟ 50 ମିଟର ଦୂରରେ ଥିବା ମସଜିଦରେ ମୁସଲମାନ ଶ୍ରଦ୍ଧାଳୁମାନେ ନମାଜ ପଢି ସାରିବା ପରେ ପୁଣି କାଳୀଙ୍କ ମଣ୍ଡପକୁ ଆସି ଦର୍ଶନ କରିଥାନ୍ତି ।

ଏପଟେ କୋଭିଡ କଟକଣା ଭିତରେ ଏଥର ଦେବୀ ମା’ କାଳୀଙ୍କ ପୂଜା ଆରାଧନା ଚାଲିଥିବା ବେଳେ ଶ୍ରଦ୍ଧାଳୁମାନେ ଦେବୀଙ୍କ ମୃଣ୍ମୟୀ ପ୍ରତିମା ଦର୍ଶନ କରିବା ସହିତ ଦେବୀ କୃପା ଭିକ୍ଷା ଲାଭ କରିବାକୁ ସନ୍ଧ୍ୟାରେ ମଣ୍ଡପରେ ସମାଗମ ହୋଇଥାନ୍ତି । ପୂଜା କମିଟି ପକ୍ଷରୁ ଶ୍ରଦ୍ଧାଳୁମାନଙ୍କୁ ଅନ୍ନ ,ମିଷ୍ଟାନ୍ନ ଓ ପଞ୍ଚାମୃତ ପ୍ରଦାନ କରାଯାଇଥାଏ । ତେବେ ସୁବର୍ଣ୍ଣପୁର ସହରର ମଧ୍ୟ ଭାଗରେ ଆଜକୁ 50ରୁ ଅଧିକ ବର୍ଷ ଧରି ପାଳିତ ହୋଇ ଆସୁଥିବା ଦେବୀ ମା’ କାଳୀଙ୍କ ପୂଜା, ଉଭୟ ମୁସଲମାନ ଓ ହିନ୍ଦୁ ସମ୍ପ୍ରଦାୟ ଭିତରେ ଭାଇଚାରା ଓ ଏକତାର ବାର୍ତ୍ତା ପ୍ରଦାନ କରି ଆସିଛି ।

ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ