ସୁବର୍ଣ୍ଣପୁର: ଜାଗା ମିଶନ ଯୋଜନାରେ ବାକି ଥିବା 181 ଜଣ ହିତାଧିକାରୀଙ୍କୁ ତୁରନ୍ତ ପଟ୍ଟା ପ୍ରଦାନ ଦାବିରେ ତାତିଲେ ମହିଳା । ଶୁକ୍ରବାର ଏନେଇ ସୁବର୍ଣ୍ଣପୁର ବସ୍ତି ବସିନ୍ଦା ମଞ୍ଚ ପକ୍ଷରୁ ସଦର ପୌର ପରିଷଦ ଆଗରେ ବିକ୍ଷୋଭ ପ୍ରଦର୍ଶନ ହୋଇଛି । ମହିଳା ନେତ୍ରୀ ଜ୍ୟୋର୍ତିମୟୀ ରାଉତଙ୍କ ନେତୃତ୍ବରେ ଶତାଧିକ ଜାଗା ମିଶନ ହିତାଧିକାରୀ ପୌର ପରିଷଦର କାର୍ଯ୍ୟନିର୍ବାହୀ ଅଧିକାରୀଙ୍କୁ ଘେରାଉ କରିଛନ୍ତି । ଏଥିସହ କାର୍ଯ୍ୟାଳୟ ବାଟ ଓଗାଳି ବସିଥିବା ଦେଖାଦେଇଛି ।
ସହରର 973 ଜଣ ହିତାଧିକାରୀଙ୍କୁ ଜାଗା ମିଶନ ଯୋଜନାରେ ଜାଗା ଯୋଗାଇ ଦିଆଯାଇଛି । ହେଲେ ବାକି ଥିବା 181 ଜଣ ହିତାଧିକାରୀ ଏଥିରୁ ବାଦ ପଡିଛନ୍ତି । ଏଥିମଧ୍ୟରେ ଝୁପୁଡ଼ିପଡା , ପଟାଭାଡି, ଗଣ୍ଡାପଡା, ଘାଂସିପଡା ଆଦି ତଳିଆ ଅଞ୍ଚଳରେ ବାସ କରୁଥିବା ବାସିନ୍ଦା ରହିଛନ୍ତି । ଦୀର୍ଘ ଦିନ ଧରି ଏମାନଙ୍କ ପରିବାର ଏଠାରେ ରହୁଥିଲେ ସୁଦ୍ଧା ଏମାନଙ୍କୁ ଏଯାଏଁ ଜମି ପଟ୍ଟା ଦିଆଯାଇନଥିବା ଅଭିଯୋଗ ହୋଇଛି । ଏହାର ପ୍ରତିବାଦରେ ମହିଳାମାନେ ପୌର ପରିଷଦ କର୍ମଚାରୀଙ୍କ ସହିତ ଯୁକ୍ତି ତର୍କ କରିଥିଲେ । ଖବର ପାଇ ପୋଲିସ ପହଞ୍ଚି ଆନ୍ଦୋଳନକାରୀଙ୍କ ସହ ଆଲୋଚନା କରି ସ୍ଥିତିକୁ ଆୟତ୍ତ କରିଛି ।