ଲକଡାଉନ୍ ମାଡରେ ଘାଇଲା ଓ୍ବେଡିଂ ଇଣ୍ଡଷ୍ଟ୍ରୀ, ପ୍ରଭାବିତ ଜୀବନ ଜୀବିକା

ସବୁ କ୍ଷେତ୍ରରେ ପଡିଛି ମହାମାରୀର ମହା ପ୍ରହାର । ଏପଟେ ଲକଡାଉନ ମାଡରେ ଘାଇଲା ଛୋଟଠୁ ବଡ ବ୍ୟବସାୟ । ଆଉ ବିବାହ କାର୍ଯ୍ୟ କଥା ନକହିବା ଭଲ । ବିବାହରେ କେବଳ 25ଜଣଙ୍କୁ ଅନୁମତି, ନା ଭୋଜିଭାତ ହେଉଛି ନା ନାଚଗୀତ । କ୍ୟାଟେରିଂ, ଡିଜେ ବାଲାଙ୍କୁ ପଚାରେ କିଏ ଆଉ ଫଟୋଗ୍ରାଫରଙ୍କ କଥା ତ ବହୁ ଦୂରରେ । ଅଧିକ ପଢନ୍ତୁ...

ସମ୍ବଲପୁର:ସବୁ କ୍ଷେତ୍ରରେ ପଡିଛି ମହାମାରୀର ମହା ପ୍ରହାର । ସଙ୍କଟ ମଧ୍ୟରେ ସବୁ ବ୍ୟବସାୟ ଅଣ୍ଟା ଭାଙ୍ଗିଯାଇଛି । ଏପରିକି ବାଦ୍ ପଡିନି ବିବାହ କାର୍ଯ୍ୟ । ଲକଡାଉନ୍ ମଧ୍ୟରେ ଯେଉଁ କେତୋଟି ବିବାହ ହେଉଛି, ସେଥିରେ ବି କେବଳ 25ଜଣଙ୍କୁ ଅନୁମତି, ନା ଭୋଜିଭାତ ହେଉଛି ନା ନାଚଗୀତ । କ୍ୟାଟେରିଂ, ଡିଜେ ବାଲାଙ୍କୁ ପଚାରେ କିଏ ଆଉ ଫଟୋଗ୍ରାଫରଙ୍କ କଥା ତ ବହୁ ଦୂରରେ । ଫଳରେ ଅର୍ଥନୈତିକ ସଙ୍କଟ ଦେଇ ଗତି କରୁଛନ୍ତି ବିବାହ ଉପରେ ନିର୍ଭର କରୁଥିବା ବ୍ୟବସାୟ ।

ଖାସ୍ କରି ଜାନୁଆରୀରୁ ଜୁନ ମଧ୍ୟରେ ବିବାହ ସିଜିନ୍ । ଏହି ସବୁ ଦିନରେ ପୂଜକ, ଭିଡିଓଗ୍ରାଫର, କ୍ୟାଟେରିଂ ସଂସ୍ଥା ମାଲିକଙ୍କ ଭଲ ଦି ପଇସା ରୋଜଗାର ହୁଏ । ମାତ୍ର ଲକଡାଉନ୍ ବର୍ତ୍ତମାନ ସେ ସବୁ କ୍ଷେତ୍ରରେ ଗ୍ରହଣ ଲଗାଇଦେଇଛି । ସରକାରଙ୍କ ଗାଇଡଲାଇନ୍ ଅନୁସାରେ 25 ଜଣଙ୍କୁ ନେଇ ବିବାହ ଅନୁମତି ଥିବାରୁ ଲୋକେ ଘରେ ହିଁ ବାହାଘର କରୁଛନ୍ତି । ସେପଟେ କ୍ୟାଟେରିଂ, ଟ୍ରାଭେଲିଂରେ କାମ କରୁଥିବା କର୍ମଚାରୀ ଜୀବିକା ହରାଇ ଘରେ ବସି ରହିଛନ୍ତି ।ଜୀବନ ବଞ୍ଚିଲେ ତ ଜୀବିକା ବଞ୍ଚାଇବା କଥା ଭାବିବା..ଏହା ଭାବି ଉପାୟଶୂନ୍ୟ ହୋଇ ବସି ରହିଛନ୍ତି ବ୍ୟବସାୟୀ । କେବଳ ବୈବାହିକ କାର୍ଯ୍ୟ ନୁହେଁ ବରଂ ଅନ୍ୟ ସମସ୍ତ ପରମ୍ପରାଗତ କାର୍ଯ୍ୟ ମଧ୍ୟ ବନ୍ଦ ରହିଛି । ଖାଲି ଅପେକ୍ଷା କେବେ ଏ ସ୍ଥିତି ସୁଧୁରିବ ଆଉ ବିବାହ କାର୍ଯ୍ୟରେ ଜଡିତ ବ୍ୟବସାୟୀଙ୍କ ଦୁଃଖ ଦୂର ହେବ ।ସମ୍ବଲପୁରରୁ ବାଦଶାହା ଜୁସ୍ମନ ରାଣା, ଇଟିଭି ଭାରତ