ସମ୍ବଲପୁର: ଏବେ ହୀରାକୁଦ ଡ୍ୟାମର ରାଇଟ ଡାଇକର ବିସ୍ତୀର୍ଣ୍ଣ ନୀଳ ଜଳ ରାଶିରେ ଜଳ କ୍ରୀଡା ଓ ନୌବିହାରର ମଜା ନେଇ ପାରିବେ ପର୍ଯ୍ୟଟକ। କାରଣ ଆଜିଠୁ ଏଠାରେ ଆରମ୍ଭ ହୋଇଛି ୱାଟର ସ୍ପୋର୍ଟ୍ସ। ରାଜ୍ୟ ପରିବହନ ମନ୍ତ୍ରୀ ପଦ୍ମନାଭ ବେହେରା ମୁଖ୍ୟ ଅତିଥି ଭାବେ ଯୋଗଦେଇ ଏହାର ଶୁଭାରମ୍ଭ କରିଛନ୍ତି।
ସକାଳ 8 ରୁ ଅପରାହ୍ନ 5 ଟା ଯାଏ ଏଠାରେ ବିଭିନ୍ନ ବୋଟ ମଧ୍ୟମରେ ପର୍ଯ୍ୟଟକ ମାନେ ନୌବିହାର ଓ ଜଳ କ୍ରୀଡାର ମଜା ନେଇପାରିବେ। ଏଠାରେ ୱାଟର ସ୍କୁଟର, ବାନାନା ବୋଟ,ସ୍ପୀଡ଼ ବୋଟ, ପେଡାଲ ବୋଟ ଆଦି ଏକାଧିକ ପ୍ରକାରର ବୋଟ ବ୍ୟବସ୍ଥା ଉପଲବ୍ଧ କରାଯାଇଛି । ଆଜିର ଏହି ଶୁଭାରମ୍ଭ କାର୍ଯ୍ୟକ୍ରମରେ ଅନ୍ୟମାନଙ୍କ ମଧ୍ୟରେ ଓଟିଡିସି ଅଧ୍ୟକ୍ଷା ଶ୍ରୀମୟୀ ମିଶ୍ରଙ୍କ ସହ ଜିଲ୍ଲା ପ୍ରଶାସନର ବରିଷ୍ଠ ଅଧିକାରୀ ଉପସ୍ଥିତ ରହିଥିଲେ। ତେବେ ଏହି ବ୍ୟବସ୍ଥା କାର୍ଯ୍ୟକାରୀ ହେବାପରେ ପର୍ଯ୍ୟଟକଙ୍କ ମଧ୍ୟରେ ଉତ୍ସୁକତା ମଧ୍ୟ ବୃଦ୍ଧି ପାଇଛି ।
ସମ୍ବଲପୁରରୁ ବାଦଶାହ ଜୁସ୍ମନ ରଣା, ଇଟିଭି ଭାରତ
