ହୀରାକୁଦ ଡ୍ୟାମରେ ପର୍ଯ୍ୟଟକଙ୍କୁ କରୁଥିଲେ ଟାର୍ଗେଟ, 5 ଡକାୟତଙ୍କୁ ବାନ୍ଧିଲା ପୋଲିସ

ବୁର୍ଲା ପୋଲିସ 5 ଜଣ ଡକାୟତଙ୍କୁ ଗିରଫ କରିବାରେ ସଫଳ ହୋଇଛି। ସମ୍ବଲପୁର ହୀରାକୁଦ ଡ୍ୟାମର ବୁର୍ଲା ରାଇଟ ଡାଇକ ଅଞ୍ଚଳରେ କୌଣସି ପର୍ଯ୍ୟଟକଙ୍କୁ ଏକା ପାଇଲେ ତାଙ୍କୁ ମାଡ଼ପିଟ କରି ଧମକ ଦେଇ ମୋବାଇଲ,ଟଙ୍କା,ସୁନା,କ୍ୟାମେରା ଲୁଟି ନେଉଥିଲେ ବୋଲି ଅଭିଯୋଗ ହୋଇଛି ।ଅଧିକ ପଢନ୍ତୁ

ସମ୍ବଲପୁର: ସମ୍ବଲପୁର ବୁର୍ଲା ପୋଲିସକୁ ସଫଳତା । ସମ୍ବଲପୁର ବୁର୍ଲା ପୋଲିସ 5 ଜଣ ଡକାୟତଙ୍କୁ ଗିରଫ କରିବାରେ ସଫଳ ହୋଇଛି । ଏନେଇ ସମ୍ବଲପୁର ଏସପି ସୂଚନା ଦେଇଛନ୍ତି । ଏହି ଡକାୟତମାନେ ମୁଖ୍ୟତଃ ସମ୍ବଲପୁର ହୀରାକୁଦ ଡ୍ୟାମର ବୁର୍ଲା ରାଇଟ ଡାଇକ ଅଞ୍ଚଳରେ ଆତଙ୍କ ଖେଳେଇ ଥିଲେ । ଏହି ଡକାୟତମାନେ ମୁଖ୍ୟତଃ ହୀରାକୁଦ ଡ୍ୟାମ ରାଇଟ ଡାଇକ ଅଞ୍ଚଳରେ ବୁଲିବାକୁ ଯାଉଥିବା ପର୍ଯ୍ୟଟକ ମାନଙ୍କୁ ଟାର୍ଗେଟ କରୁଥିଲେ । ବାଇକରେ ନକଲି ନମ୍ବର ପ୍ଲେଟ ଲଗାଇ କରୁଥିଲେ ଡକାୟତି ଓ ଦେବରିଗଡ଼ ଅଭୟାରଣ୍ୟ ରାସ୍ତା ଦେଇ ବୁର୍ଲା ପୋଲିସର ସୀମା ବାହାରକୁ ବରଗଡ଼ ଜିଲ୍ଲାକୁ ପଳାଉଥିଲେ ।

କୌଣସି ପର୍ଯ୍ୟଟକଙ୍କୁ ଏକା ପାଇଲେ ତାଙ୍କୁ ମାଡ଼ ପିଟ କରି ଧମକ ଦେଇ ମୋବାଇଲ ,ଟଙ୍କା ,ସୁନା ,କ୍ୟାମେରା ଲୁଟି ନେଉଥିଲେ ବୋଲି ଅଭିଯୋଗ ହୋଇଛି । ଗିରଫ ଡକାୟତମାନେ ହେଲେ ବରଗଡ଼ ଜିଲ୍ଲାର ଅତାବିରା ଥାନା ଅନ୍ତର୍ଗତ ପାହାଡ଼ସିରଗିଡା ଅଞ୍ଚଳର ମାନସ କୁମାର ପଣ୍ଡା, ଯୁଗଳ କିଶୋର ସାହୁ,ଜିତୁ ପ୍ରଧାନ, ବଣ୍ଟି ମେହେର ଓ ତୁଷାର ବଲ୍ଳଭ ରାଉତିଆ । ଏମାନଙ୍କ ଠାରୁ 2 ଟି ବାଇକ,7ଟି ମୋବାଇଲ, ଗୋଟିଏ ରେଂଚି, ଗୋଟିଏ ପେପର କଟର ଛୁରୀ,ଗୋଟିଏ ନକଲି ନମ୍ବର ପ୍ଲେଟ ଜବତ ହୋଇଛି ।

ଗତ 23 ତାରିଖରେ ରାଇଟ ଡାଇକ ଅଞ୍ଚଳରୁ ଏହି ଡକାୟତ ମାନେ ସମ୍ବଲପୁର ଧନୁପାଲି ଥାନା ଅନ୍ତର୍ଗତ ଭୁତାପଡା ଅଞ୍ଚଳର ମହମ୍ମଦ ଇର୍ଷାଦ ନାମକ ଜଣେ ଯୁବକଙ୍କ ଠାରୁ ରାଇଟ ଡାଇକ ଅଞ୍ଚଳରେ ମାଡ଼ପିଟ କରିବା ସହ 2 ଟି ମୋବାଇଲ ଲୁଟି ନେଇଥିଲେ। ଏନେଇ ବୁର୍ଲା ଥାନାରେ ଅଭିଯୋଗ ଆସିବା ପରେ ପୋଲିସ ସିସିଟିଭିର ସହାୟତା ଓ ବିଭିନ୍ନ ସୂତ୍ରରୁ ଖବର ପାଇ ଡ଼କାୟତଙ୍କୁ ଗିରଫ କରିଛି।