ସମ୍ବଲପୁର: ପକ୍କା ରାସ୍ତାଟିଏ ନଥିବାରୁ ଗାଁରେ ପଶିଲାନି ଆମ୍ବୁଲାନ୍ସ । ଖଟିଆରେ ବୁହାହୋଇ ହସ୍ପିଟାଲରେ ପହଞ୍ଚିଲେ ଗର୍ଭବତୀ ମହିଳା । ଫଳରେ ଚିକିତ୍ସାରେ ବିଳମ୍ବ ହେବାରୁ ଗର୍ଭବତୀଙ୍କ ମୃତ୍ୟୁ ହୋଇଥିବା ଅଭିଯୋଗ ହୋଇଛି । ସମ୍ବଲପୁର ଜିଲ୍ଲା ଯୁଝୁମୁରା ବ୍ଲକ କୋଲଗାଁ ମିର୍ଧାପଡାରୁ ଏଭଳି ହୃଦୟ ବିଦାରକ ଘଟଣା ସାମ୍ନାକୁ ଆସିଛି । ମୃତ ମହିଳା ହେଉଛନ୍ତି ଅନିତା ମିର୍ଧା ।
ସୂଚନା ଅନୁସାରେ, କୋଲଗାଁ ମିର୍ଧାପଡାର ଅନିତା ମିର୍ଧା ୮ ମାସର ଗର୍ଭବତୀ ଥିଲେ। ଗୁରୁବାର ଦିନ ହଠାତ୍ ତାଙ୍କର ଦେହ ଖରାପ ହେବାରୁ ପରିବାର ଲୋକେ ଚିକିତ୍ସା ପାଇଁ ମେଡିକାଲ ନେବାକୁ ବାହାରିଥିଲେ । ଏଥିପାଇଁ ସେମାନେ ଆମ୍ବୁଲାନ୍ସ ସହ ଯୋଗାଯୋଗ କରିଥିଲେ। ଅନ୍ୟପଟେ ଗାଁକୁ ଯିବାକୁ ଭଲ ରାସ୍ତା ନ ଥିବାରୁ ଦେଢ କିମି ଦୂରରେ ଆମ୍ବୁଲାନ୍ସଟି ରହିଯାଇଥିଲା । ତେଣେ ପରିବାର ଲୋକେ ଅନ୍ୟ ଉପାୟ ନ ପାଇ ଦେଢ କିମି ପର୍ଯ୍ୟନ୍ତ ୮ ମାସର ଗର୍ଭବତୀ ଅନିତାଙ୍କୁ ଖଟିଆରେ ବୋହି ଆମ୍ବୁଲାନ୍ସ ପାଖକୁ ଆଣିଥିଲେ । ହେଲେ ମେଡିକାଲ ପହଞ୍ଚାଇବାରେ ବିଳମ୍ବ ହେବାରୁ ଗର୍ଭବତୀଙ୍କ ମୄତ୍ୟୁ ହୋଇଛି । ଏନେଇ ତାଙ୍କ ପରିବାର ଲୋକେ ଅଭିଯୋଗ କରିଛନ୍ତି ।