ସମ୍ବଲପୁର କଂଗ୍ରେସ ନେତା ଓ କର୍ମୀଙ୍କୁ ଉଠାଇ ନେଲା ପୋଲିସ ସମ୍ବଲପୁର:ରେଳ ରୋକ ଆନ୍ଦୋଳନ ପୂର୍ବରୁ ଗିରଫ ହେଲେ ସମ୍ବଲପୁର ଜିଲ୍ଲା କଂଗ୍ରେସ କମିଟି ସଭାପତି ଆସଫ ଅଲ୍ଲୀ ଖାଁ । ତାଙ୍କ ସହ11 ଜଣ କଂଗ୍ରେସ କର୍ମୀଙ୍କୁ ମଧ୍ୟ ଗିରଫ କରିଛି ପୋଲିସ । ରବିବାର ବିଳମ୍ବିତ ରାତିରେ ପୋଲିସ ଆଗୁଆ ଗିରଫ କରି ଥାନାରେ ଅଟକ ରଖିଥିବା ସୂଚନା ମିଳିଛି ।
ରେଢ଼ାଖୋଲ ଥାନା ଅନ୍ତର୍ଗତ ବଂଶଜାଲ ପଞ୍ଚାୟତରେ ଥିବା ସୁଆଣି ଦେବୀ ପୀଠ ଅଞ୍ଚଳରେ ସମ୍ବଲପୁର ଅନୁଗୋଳ ରେଳ ଲାଇନ ଯାଇଛି । ଏହି ଅଞ୍ଚଳରେ ଏକ ରେଳ ଅଣ୍ଡରପାସ ନିର୍ମାଣ ପାଇଁ ପୂର୍ବରୁ କଂଗ୍ରେସ ପକ୍ଷରୁ ଦାବି ହୋଇ ଆସୁଥିଲା । କିନ୍ତୁ ଦାବି ପୂରଣ ନହେବାରୁ ଆଜି ଜିଲ୍ଲା କଂଗ୍ରେସ ପକ୍ଷରୁ ରେଳ ରୋକ ଆନ୍ଦୋଳନ କରିବାର ନିଷ୍ପତ୍ତି ହୋଇଥିଲା । କିନ୍ତୁ ଏହା ପୂର୍ବରୁ ଗତ ରାତିରେ ସମ୍ବଲପୁର ପୋଲିସ ଏହି କଂଗ୍ରେସ କର୍ମୀଙ୍କୁ ଗିରଫ କରି ଥାନାରେ ଅଟକ ରଖିଛି ।
ଏହା ମଧ୍ୟ ପଢନ୍ତୁ-ପାସେଞ୍ଜର ଟ୍ରେନ ରହଣୀ ଦାବିରେ କଲୁଙ୍ଗା ରେଳ ଷ୍ଟେସନରେ ରେଳ ରୋକ ପ୍ରତିବାଦ
ତେବେ ଶାନ୍ତିପୂର୍ଣ ଭାବେ ଆନ୍ଦୋଳନ କରିବାକୁ କୁହାଯାଇଥିଲା ମଧ୍ୟ ପୋଲିସ ମାନମାନି କରି ଆନ୍ଦୋଳନକୁ ଚାପି ଦେବାକୁ ଚେଷ୍ଟା କରୁଛି ବୋଲି କହିଛନ୍ତି ଆସଫ ଅଲ୍ଲୀ ଖାଁ । ସମ୍ବଲପୁର ଜିଲ୍ଲା ରେଢ଼ାଖୋଲ ଉପଖଣ୍ଡ ରେଢ଼ାଖୋଲ ଥାନା ଅନ୍ତର୍ଗତ ବଂଶଜାଲ ପଂଚାୟତ ରେ ସୁଆଣି ଦେବୀ ପୀଠ ରହିଛି l ଏହି ଦେବୀଙ୍କ ପ୍ରତି ସ୍ଥାନୀୟ ଲୋକଙ୍କ ଆଗାଢ଼ ଆସ୍ଥା ଓ ବିଶ୍ୱାସ ଥିବା ବେଳେ ପ୍ରତ୍ୟେକ ଦିନ ଦର୍ଶନ ପାଇଁ ଶହଶହ ଶ୍ରଦ୍ଧାଳୁ ଏହି ପୀଠକୁ ଆସିଥାଆନ୍ତି । ତେବେ ପୀଠକୁ ଯିବା ପାଇଁ ରେଳ ଲାଇନ ପାର ହେବାକୁ ପଡ଼େ । ଫଳରେ ଦୀର୍ଘ ଦିନ ହେଲା ସ୍ଥାନୀୟ ଲୋକେ ଏହି ସମସ୍ୟା ଦେଇ ଗତି କରି ଆସୁଛନ୍ତି ।
ଅନ୍ୟପଟେ ବିଭିନ୍ନ ସମୟରେ ଏହା ଏଠାରେ ଛୋଟ ବଡ଼ ଦୁର୍ଘଟଣା ମଧ୍ୟ ହୋଇଥାଏ l ତେଣୁ ସ୍ଥାନୀୟ ଲୋକଙ୍କ ଏହି ସମସ୍ୟାର ସମାଧାନ ପାଇଁ ସମ୍ବଲପୁର ଜିଲ୍ଲା କଂଗ୍ରେସ କମିଟି ସଭାପତି ଆସଫ ଅଲ୍ଲୀ ଖାଁ ସମ୍ବଲପୁର ଡିଆରଏମଙ୍କୁ ଭେଟି ଏଠାରେ ଏକ ଅଣ୍ଡର ପାସ ବ୍ରିଜ ନିର୍ମାଣ ପାଇଁ ଦାବି କରିଥିଲେ । କିନ୍ତୁ ରେଳ ବାଇ କୌଣସି ପଦକ୍ଷେପ ନ ନେବାରୁ ଆଜି ରେଳ ରୋକ ଆନ୍ଦୋଳନ ପାଇଁ ନିଷ୍ପତି ନେଇଥିଲା ଜିଲ୍ଲା କଂଗ୍ରେସ l କିନ୍ତୁ ରେଳରୋକ ପୂର୍ବରୁ ପୋଲିସ ଆଗୁଆ କଂଗ୍ରେସ କର୍ମୀଙ୍କୁ ଗିରଫ କରିଛି । ଏନେଇ ଜିଲ୍ଲା କଂଗ୍ରେସ କମିଟି ସଭାପତି ଅସନ୍ତୋଷ ପ୍ରକାଶ କରିଛନ୍ତି ଓ ଆଗକୁ ଆନ୍ଦୋଳନକୁ ତୀବ୍ରତର କରିବାକୁ ଚେତାବନୀ ଦେଇଛନ୍ତି ।
ଇଟିଭି ଭାରତ, ସମ୍ବଲପୁର
