ସମ୍ବଲପୁର: ସ୍କୁଲ ଛାତ୍ରୀଙ୍କୁ ଗଣଦୁଷ୍କର୍ମ ପରେ ଭିଡିଓ ଭାଇରାଲ କରିଦେବା ଧମକ ସହ ବାରମ୍ବାର ଦୁଷ୍କର୍ମ କରାଯାଇଥିବା ଅଭିଯୋଗ । ଏପରି ଘଟଣା ସାମ୍ନାକୁ ଆସିବା ପରେ ସ୍ଥାନୀୟ ଅଞ୍ଚଳରେ ଆଲୋଡନ ସୃଷ୍ଟି ହୋଇଛି । ଜଣେ ନାବାଳିକାଙ୍କୁ ଏକ ବର୍ଷରୁ ଅଧିକ ହେବ ବାରମ୍ବାର ଦୁଷ୍କର୍ମ ଖବର ସମସ୍ତଙ୍କୁ ଚକିତ କରିଛି । ଏଭଳି ନାରକୀୟ ଘଟଣା ଘଟିଛି ସମ୍ବଲପୁର ଜିଲ୍ଲା କୁଚିଣ୍ଡା ଥାନା ଅଞ୍ଚଳରେ । ବର୍ଷ ୨୦୨୦ ଲକଡାଉନ ସମୟରେ ଜଣେ ନାବାଳିକା ଛାତ୍ରୀ ରାତି ପ୍ରାୟ ୮.୦୦ଟା ସମୟରେ ଟ୍ୟୁସନରୁ ଫେରୁଥିବା ସମୟରେ ସେହି ଅଞ୍ଚଳର ଦୁଇ ଜଣ ଯୁବକ ତାଙ୍କୁ ବଳପୂର୍ବକ ଏକ ନିଛାଟିଆ ସ୍ଥାନକୁ ଟେକିନେଇ ଗଣଦୁଷ୍କର୍ମ କରିଥିଲେ ।
ସ୍କୁଲ ଛାତ୍ରୀଙ୍କୁ ବାରମ୍ବାର ଦୁଷ୍କର୍ମ, ଜଣେ ଗିରଫ ନାବାଳିକା ଜଣକ ଏନେଇ ଭୟରେ କାହାକୁ କିଛି କହିନଥିଲେ । ସେପଟେ ମଝିରେ ମଝିରେ ଦୁଷ୍କର୍ମର ଭିଡିଓ ଭାଇରାଲ କରିବା ଧମକ ଦେଇ ଅଭିଯୁକ୍ତମାନେ ନାବାଳିକାଙ୍କୁ ଡକାଇ ବାରମ୍ବାର ଦୁଷ୍କର୍ମ କରିଚାଲିଥିବା ଅଭିଯୋଗ ହୋଇଛି । ଭିଡିଓ ଭାଇରାଲ ହେଲେ ନିନ୍ଦା, ଅପବାଦ ଭୟରେ ଯେତେବେଳେ ଅଭିଯୁକ୍ତମାନେ ଡାକନ୍ତି ନାବାଳିକା ଜଣଙ୍କ ଆସିବାକୁ ବାଧ୍ୟ ହେଉଥିବା ସ୍ବୀକାର କରିଛନ୍ତି । ଏନେଇ ପୀଡିତାଙ୍କ ସାଙ୍ଗମାନଙ୍କଠାରୁ ସ୍କୁଲ ପ୍ରଧାନ ଶିକ୍ଷୟିତ୍ରୀ ଜାଣିବା ପରେ ନାବାଳିକା ସହିତ ତାଙ୍କ ବାପା-ମାଆଙ୍କୁ ବିଦ୍ୟାଳୟକୁ ଡକାଇ ସବୁକଥା ପଚାରି ବୁଝିଥିଲେ ।
ଏହି ଘଟଣା ସମ୍ପର୍କରେ କାହାକୁ କହିଲେ ଜୀବନରୁ ମାରିଦେବା ସହ ଦୁଷ୍କର୍ମର ଭିଡିଓ ଭାଇରାଲ କରିଦେବାକୁ ସେମାନେ ଧମକ ଦେଇଥିବା ଛାତ୍ରୀ ଜଣକ ସ୍ୱୀକାର କରିଛନ୍ତି । ଏହି ଘଟଣା ଜାଣିବା ପରେ ନାବାଳିକାଙ୍କ ବାପା କୁଚିଣ୍ଡା ଥାନାରେ ଲିଖିତ ଅଭିଯୋଗ କରିଛନ୍ତି । ନାବାଳିକାଙ୍କ ବୟାନକୁ ଆଧାର କରି ପୋଲିସ ଘଟଣାରେ ସମ୍ପୃକ୍ତ ବାଦଲ ମିଞ୍ଜ ନାମକ ଜଣେ ଅଭିଯୁକ୍ତକୁ ଗିରଫ କରିଛି । POCSO ଆଇନ ଆଧାରରେ ଗିରଫ ପରେ ପୋଲିସ ବାଦଲକୁ କୋର୍ଟ ଚାଲାଣ କରିଛି । ତେବେ ପୀଡିତାଙ୍କୁ ଆଇନ ଅନୁଯାୟୀ କ୍ଷତିପୂରଣ ପ୍ରଦାନ କରାଯିବାର ବ୍ୟବସ୍ଥା କରାଯିବ ବୋଲି ଏସପି ସୂଚନା ଦେଇଛନ୍ତି ।
ସମ୍ବଲପୁରରୁ ବାଦଶାହ ଜୁସ୍ମନ ରଣା, ଇଟିଭି ଭାରତ
