ସମ୍ବଲପୁର: ବନ୍ଦ କୋଠରୀରୁ ନର୍ସିଂ ଛାତ୍ରୀଙ୍କ ଝୁଲନ୍ତା ମୃତଦେହ ଉଦ୍ଧାର । ସମ୍ବଲପୁର ଜିଲ୍ଲା ସଦର ଥାନା ଅନ୍ତର୍ଗଚ ଜୟନ୍ତ ଛକ ନିକଟରେ ଥିବା ଏକ ବେସରକାରୀ ନର୍ସିଂ କଲେଜ କ୍ୟାମ୍ପସରୁ ମୃତଦେହ ଉଦ୍ଧାର ହୋଇଛି । ମୃତ ଛାତ୍ରୀ ହେଉଛନ୍ତି ସୁତପା ମହାନ୍ତି । ତାଙ୍କ ଘର ପଶ୍ଚିମବଙ୍ଗର ପୁରୁଲିଆ ଜିଲ୍ଲାରେ ବୋଲି ଜଣାପଡିଛି ।
ଘଟଣାରୁ ପ୍ରକାଶ ଯେ, କିଛି ଦିନ ପୂର୍ବରୁ ସୁତପା ନିଜ ଘରକୁ ଯାଇଥିଲେ । ଘରୁ ଫେରିବା ପରେ ପ୍ରାୟତଃ ସେ ଏକା ଏକା ରହୁଥିବା ତାଙ୍କ ସହପାଠୀ କହିଛନ୍ତି । ସେହିପରି ସେ ମାନସିକ ଚାପରେ ଥାଇପାରନ୍ତି ବୋଲି କଲେଜ କର୍ତ୍ତୃପକ୍ଷ କହିଛନ୍ତି । ତେବେ ସୁତପା କଲେଜ ହଷ୍ଟେଲରେ ନରହି କଲେଜ କ୍ୟାମ୍ପସ ଭିତରେ ଥିବା ଏକ ରୁମରେ ଏକା ରହୁଥିଲେ । ସୋମବାର ସକାଳୁ ତାଙ୍କର ଜଣେ ବନ୍ଧୁ କ୍ଲାସ ଯିବା ପାଇଁ ଡାକିଥିଲେ, ହେଲେ ସେ କବାଟ ଖୋଲିନଥିଲେ । ପରେ ଏନେଇ ସେ ହଷ୍ଟେଲ ୱାର୍ଡନକୁ ଅବଗତ କରାଇଥିଲେ । ୱାର୍ଡନ ଏନେଇ ପୋଲିସକୁ ଖବର ଦେବା ପରେ ଘଟଣାସ୍ଥଳରେ ପୋଲିସ ପହଞ୍ଚି ଘରର କବାଟ ଭାଙ୍ଗିଥିଲେ। କବାଟ ଭାଙ୍ଗିବା ପରେ ଭିତରେ ସୁତପାର ମୃତଦେହ ଘରେ ଝୁଲୁଥିବାର ଦେଖିବାକୁ ପାଇଥିଲେ । ପରେ ପୋଲିସ ମୃତ ସୁତପାଙ୍କ ପରିବାରକୁ ଘଟଣାର ଖବର ଦେଇ ମୃତଦେହକୁ ବ୍ୟବଚ୍ଛେଦ ପାଇଁ ପଠାଇଛି ।