ପ୍ରତିଶୃତି ଦେଇ ପ୍ରତାରଣା; ଆତ୍ମହତ୍ୟା ଧମକ ଦେଲେ ପୀଡିତା

ପ୍ରଥମେ ବିବାହ ପ୍ରତିଶୃତି ଦେଇ ଶାରିରୀକ ସମ୍ପର୍କ ଆଉ ପରେ ପ୍ରତାରଣା ଓ ଧମକ । ସମ୍ବଲପୁର ଜିଲ୍ଲା ବାଉଁସରା ଗାଁର ହାରାଧନ ବେହେରାଙ୍କ ପୁଅ ରାକେଶ ବେହେରା ନାଁରେ ଏମିତି ଅଭିଯୋଗ ଆଣିଛନ୍ତି ଯୁବତୀ । ନ୍ୟାୟ ନପାଇଲେ ଆତ୍ମହତ୍ୟା କରିବେ ବୋଲି କହିଛନ୍ତି ପୀଡିତା ।

ସମ୍ବଲପୁର: ବିବାହ ପ୍ରତିଶୃତି ଦେଇ ଯୁବତୀଙ୍କ ସହ ଶାରିରୀକ ସଂପର୍କ ରଖିବା ପରେ ପ୍ରତାରଣା ଦେଇଛି ପ୍ରେମିକ । ଏମିତି ଅଭିଯୋଗ ଆସିଛି ସମ୍ବଲପୁର ଧମା ଥାନା ଅନ୍ତର୍ଗତ ବାଉଁସରା ଗ୍ରାମରେ। ତେବେ ପୋଲିସ ଅଭିଯୁକ୍ତକୁ ଗିରଫ ନକରି ସହାୟତା କରୁଥିବା ଅଭିଯୋଗ ଆଣିଛନ୍ତି ପୀଡିତା । ନ୍ୟାୟ ନ ପାଇଲେ ଆତ୍ମହତ୍ୟା କରିବେ ବୋଲି କହିଛନ୍ତି ସେ ।

ବିବାହର ପ୍ରତିଶୃତି ଦେଇ ବାରମ୍ବାର ଯୁବତୀଙ୍କ ଅନିଚ୍ଛା ସତ୍ତ୍ବେ ଶାରିରୀକ ସମ୍ପର୍କ ରଖିଥିବା ନେଇ ବାଉଁସରା ଗାଁର ହାରାଧନ ବେହେରାଙ୍କ ପୁଅ ରାକେଶ ବେହେରା ନାଁରେ ଅଭିଯୋଗ ଆଣିଛନ୍ତି ପିଡିତା । ଯୁବକ ଜଣକ 4 ବର୍ଷ ହେଲା ଯୁବତୀଙ୍କୁ ଯୌନ ଶୋଷଣ କରିଆସୁଥିବା ଅଭିଯୋଗ ହୋଇଛି। ତେବେ ଯୁବତୀଙ୍କ ପରିବାର ଲୋକେ ଅଭିଯୁକ୍ତ ଯୁବକଙ୍କୁ ବିବାହ କରିବାକୁ କହିବାରୁ ଅଭିଯୁକ୍ତ ଯୁବକ ପୀଡିତା ଓ ପରିବାର ଲୋକଙ୍କୁ ହତ୍ୟା ଧମକ ଦେଇଥିବା ଅଭିଯୋଗ କରିଛନ୍ତି ପୀଡିତା । ତେବେ ପୋଲିସ ମଧ୍ୟ ମାମଲାରେ ରାକେଶଙ୍କୁ ସହଯୋଗ କରୁଥିବା କହିଛନ୍ତି ଯୁବତୀ ।

ଏନେଇ ଧମା ଥାନାରେ ଅଭିଯୋଗ ହୋଇଥିଲେ ମଧ୍ୟ ପୋଲିସ ଜାଣିଶୁଣି ଅଭିଯୁକ୍ତଙ୍କୁ ଗିରଫ କରିନଥିବା କହିଛନ୍ତି ପୀଡିତା । ଏପଟେ ସମ୍ବଲପୁର ଅତିରିକ୍ତ ଏସପି ପ୍ରଦୀପ କୁମାର ମହାପାତ୍ର ଟେଲିଫୋନ ଜରିଆରେ ସୂଚନା ଦେଇଛନ୍ତି ଯେ ଘଟଣା ନେଇ ଧମା ଥାନାରେ ମାମଲା ରୁଜୁ ହୋଇଛି। ଅଭିଯୁକ୍ତକୁ ଧରିବା ପାଇଁ ପୋଲିସର ଏକ ଟିମ ଗଠନ ହୋଇଥିବାର ସୂଚନା ଦିଆଯାଇଛି। ଯଥାଶୀଘ୍ର ନ୍ୟାୟ ନପାଇଲେ ଆତ୍ମହତ୍ୟା କରିବେ ବୋଲି କହିଛନ୍ତି ପୀଡିତା ।

ସମ୍ବଲପୁରରୁ ବାଦଶାହ ଜୁସ୍ମନ ରଣା, ଇଟିଭି ଭାରତ