ସ୍ତ୍ରୀ ଓ ଛୁଆଙ୍କୁ ଛାଡି ଦ୍ବିତୀୟ ବିବାହ କଲା ସ୍ବାମୀ, ଅଭିଯୁକ୍ତ ଗିରଫ

ପ୍ରଥମ ସ୍ତ୍ରୀ ଓ 3ଟି ସନ୍ତାନ ଥାଇ ମଧ୍ୟ ଲୁଚିଛପି ଦ୍ବିତୀୟ ବିବାହ କଲା ସ୍ବାମୀ । ଅଭିଯୁକ୍ତ ସ୍ବାମୀ ଗିରଫ । ଅଧିକ ପଢନ୍ତୁ

ସମ୍ବଲପୁର: ଅଗ୍ନିକୁ ସାକ୍ଷୀ ରଖି ପରିବାର ସହମତିରେ ସାତ ଜନ୍ମର ସାଥି ହୋଇଥିଲେ । ହେଲେ 11 ବର୍ଷର ସମ୍ପର୍କ ଓ 3 ଛୋଟ ପିଲାଙ୍କୁ ପର କରିଦେଇ ଆଉ ଜଣଙ୍କ ହାତ ଧରିଲା ପ୍ରତାରକ ସ୍ବାମୀ । ସମ୍ବଲପୁର ଅଇଁଠାପାଲି ଥାନାରେ ସ୍ବାମୀଙ୍କ ଦ୍ବିତୀୟ ବିବାହ ନେଇ ଅଭିଯୋଗ ଆଣିଛନ୍ତି ପୀଡିତା ପ୍ରଥମ ସ୍ତ୍ରୀ । ପ୍ରଥମ ସ୍ତ୍ରୀକୁ ଛାଡପତ୍ର ନଦେଇ ଲୁଚିଛପି ଦ୍ବିତୀୟ ବିବାହ କରିବା ଅଭିଯୋଗରେ ଅଭିଯୁକ୍ତ ସ୍ୱାମୀକୁ ଗିରଫ କରିଛି ପୋଲିସ ।

ସୂଚନା ଅନୁଯାୟୀ, 11 ବର୍ଷ ପୂର୍ବେ ସମ୍ବଲପୁରର ପରଧିଆପାଲି ଗ୍ରାମରେ ରହୁଥିବା ଗୋପାଳ ସାହୁ ନାମକ ଜଣେ ବ୍ୟକ୍ତିଙ୍କୁ ବିଶାଳଖିଣ୍ଡା ଗ୍ରାମର ନିବେଦିତା ସାହୁ ବିବାହ କରିଥିଲେ l ଗୋପାଳ ଓ ନିବେଦିତାଙ୍କ 9 ବର୍ଷ, 5 ବର୍ଷ ଓ 2 ବର୍ଷର ୩ଟି ସନ୍ତାନ ବି ଅଛନ୍ତି l ତେବେ କିଛି ମାସ ହେବ ସ୍ୱାମୀ ସ୍ତ୍ରୀଙ୍କ ସମ୍ପର୍କରେ ଫାଟ ସୃଷ୍ଟି ହୋଇଥିଲା । ସ୍ୱାମୀ ବିଭିନ୍ନ ସମୟରେ ମାରପିଟ କରିବା ସହ ଗାଳିଗୁଳଜ କରିଥିବା କହିଛନ୍ତି ପୀଡିତା ପତ୍ନୀ । ହେଲେ ଗତ ୨୪ ତାରିଖ ଦିନ ପ୍ରଥମ ସ୍ତ୍ରୀଙ୍କ ଅଜାଣତରେ ଗୋପାଳ ଲୁଚିଛପି ଅନ୍ୟ ଜଣେ ଯୁବତୀଙ୍କ ସହ ସମ୍ପୂର୍ଣ୍ଣ ରୀତିନୀତି ଅନୁସାରେ ବିବାହ କରିଥିବା ଜାଣିବାକୁ ପାଇଥିଲେ ନିବେଦିତା ।

ଗାଁ ଲୋକଙ୍କ ଠାରୁ ନିବେଦିତା ନିଜ ସ୍ୱାମୀଙ୍କ ଦ୍ଵିତୀୟ ବିବାହ କଥା ଜାଣିବାକୁ ପାଇବା ପରେ ନିଜ କୁନି କୁନି ଛୁଆଙ୍କୁ ଧରି ନ୍ୟାୟ ପାଇଁ ଅଇଁଠାପାଲି ଥାନାର ଦ୍ୱାରସ୍ଥ ହୋଇଥିଲେ । ତାଙ୍କୁ ନ୍ୟାୟ ଦେବାକୁ ଗୁହାରି କରି ଏନେଇ ଥାନାରେ ଲିଖିତ ଅଭିଯୋଗ କରିଥିଲେ l କ୍ଷତିପୂରଣ ଦାବି କରିବା ସହ ନିଜ ଛୁଆଙ୍କ ଭରଣପୋଷଣ ପାଇଁ ପ୍ରତି ମାସରେ ଟଙ୍କା ଓ ସେମାନେ ରହୁଥିବା ଘରଟି ଛୁଆମାନଙ୍କ ନାଁରେ କରିବାକୁ ଦାବି କରିଛନ୍ତି ପୀଡିତା ସ୍ତ୍ରୀ ।

ଅନ୍ୟପଟେ ନିବେଦିତାଙ୍କ ଅଭିଯୋଗ ଆଧାରରେ ଅଇଁଠାପାଲି ପୋଲିସ ତଦନ୍ତ ଆରମ୍ଭ କରିଥିଲା । ଦ୍ଵିତୀୟ ବିବାହ କରିଥିବା ସ୍ୱାମୀକୁ ଥାନାରେ ପ୍ରଥମେ ଅଟକ ରଖି ପଚରାଉଚରା କରିବା ପରେ ତାକୁ ଗିରଫ କରାଯାଇଥିବା ନେଇ ସୂଚନା ମିଳିଛି l

ଇଟିଭି ଭାରତ, ସମ୍ବଲପୁର