ଭୀମସାର ସ୍ଥିତି ସୁଧାରିବା ପାଇଁ ଅଭିନବ ପ୍ରତିବାଦ କଲା କୋଶଲ କ୍ରାନ୍ତି ସେନା ସମ୍ବଲପୁର: ସମ୍ବଲପୁର ବୁର୍ଲା ସ୍ଥିତ ଭୀମସାର ମେଡିକାଲର ସ୍ବାସ୍ଥ୍ୟ ସେବା ଦିନକୁ ଦିନ ବିପର୍ଯ୍ୟସ୍ତ ପରିସ୍ଥିତି ଆଡକୁ ଗତି କରୁଥିବା ବେଳେ ଏହା ଉପରେ ନିର୍ଭର କରୁଥିବା ଗରିବ ତଥା ନିମ୍ନ ମଧ୍ୟବିତ୍ତ ଶ୍ରେଣୀର ରୋଗୀ ନାହିଁ ନଥିବା ହଇରାଣ ହେଉଛନ୍ତି l ଫଳରେ ଯେଉଁ ଉଦ୍ଦେଶ୍ୟ ନେଇପଶ୍ଚିମ ଓଡ଼ିଶାର ବୁର୍ଲା ଠାରେ ଏହି ମେଡିକାଲ କଲେଜ ଖୋଲା ଯାଇଥିଲା ତାହା ସାଧିତ ହୋଇପାରୁ ନାହିଁ l
କେତେକ ନ୍ୟସ୍ତ ସ୍ବାର୍ଥ ବ୍ୟକ୍ତିଙ୍କ ପାଇଁ ବୁର୍ଲା ଭୀମସାର ମେଡିକାଲ ବର୍ତ୍ତମାନ କେବଳ ଏକ ରେଫରାଳ ହସ୍ପିଟାଲ ହୋଇକି ରହିଯାଇଛି l ଆଉ ଏହାର ଫାଇଦା ଉଠାଉଛନ୍ତି ବୁର୍ଲା ମେଡିକାଲରେ କାର୍ଯ୍ୟରତ କେତେକ ଦଲାଲ ଓ ପାଖରେ ଥିବା କିଛି ନର୍ସିଂହୋମ ମାଲିକ l ଗରିବ ରୋଗୀ ମରୁଛନ୍ତି ଓ ପରିବାର ଲୋକେ ସର୍ବଶାନ୍ତ ହେଉଛନ୍ତି l ଏହି ଭଳି ଗମ୍ଭୀର ପରିସ୍ଥିତିରୁ ଭୀମସାର ମେଡିକାଲକୁ ଉଦ୍ଧାର କରିବା ପାଇଁ କୋଶଲ କ୍ରାନ୍ତି ସେନା ପକ୍ଷରୁ ଅଭିନଵ ଉପାୟରେ ଏକ ପ୍ରତିବାଦ କରାଯାଇ ସମ୍ବଲପୁର ଜିଲ୍ଲାପାଳ ଓ ଭୀମସାର ମେଡିକାଲର ଅଧିକ୍ଷକ ଙ୍କୁ ଦାବୀପତ୍ର ପ୍ରଦାନ କରାଯାଇଛି l
ଏହାବି ପଢନ୍ତୁ- ଭିମସାର ନିର୍ଦ୍ଦେଶକ ପଦ ପାଇଁ ବିଜ୍ଞପ୍ତି, ଏପ୍ରିଲ ୨୦ ସୁଦ୍ଧା କରନ୍ତୁ ଆବେଦନ
ସମ୍ବଲପୁର ବୁର୍ଲା ସ୍ଥିତ ଭୀମସାର ବଡ ମେଡିକାଲ l ଏହି ମେଡିକାଲ କଲେଜ ପଶ୍ଚିମ ଓଡ଼ିଶାର 10 ଟି ଜିଲ୍ଲାର ରୋଗୀଙ୍କୁ ସ୍ବାସ୍ଥ୍ୟ ସେବା ଯୋଗାଇବା ପାଇଁ ସ୍ଥାପିତ ହୋଇଥିଲା l ଏହା ପଶ୍ଚିମ ଓଡିଶା ତଥା ପଡୋଶୀ ଛତିଶଗଡ଼ ଓ ଝାରଖଣ୍ଡ ରାଜ୍ୟର ରୋଗୀଙ୍କ ପାଇଁ ସ୍ବାସ୍ଥ୍ୟ ଓ ଆରୋଗ୍ୟର ମନ୍ଦିର ସଦୃଶ୍ୟ ଥିଲା l ତେବେ ବର୍ତ୍ତମାନ ଏହାର ସ୍ଥିତି ଏମିତି ହୋଇଛି ଯେ ଲୋକେ ଏହି ହସ୍ପିଟାଲ କୁ ଯିବାପାଇଁ ଭୟ କରୁଛନ୍ତି l ନିହାତି ଜରୁରୀ ନପଡିଲେ ଲୋକେ ଏଠାକୁ ଯାଉନାହାନ୍ତି l ଆଉ ଯେଉଁ ରୋଗୀ ମାନେ ଯାଉଛନ୍ତି ଏଠାରେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି l ଏମିତି ଅଭିଯୋଗ ଆଣିଛନ୍ତି କୋଶଲ କ୍ରାନ୍ତି ସେନା l ରାଜ୍ୟ ସରକାର ଙ୍କ ଅବହେଳା, ସ୍ଥାନୀୟ ବୁଦ୍ଧିଜୀବୀ ଙ୍କ ନୀରବତା ଓ ପ୍ରଶାସନିକ ଅପାରଗତା ଯୋଗୁଁ ବର୍ତମାନ ଏହି ମେଡିକଲ ସ୍ଥିତି ନକହିଲେ ଭଲ ବୋଲି କୋଶଲ କ୍ରାନ୍ତି ସେନା ପକ୍ଷରୁ ଅଭିଯୋଗ ହୋଇଛି l ରୋଗୀ ସେବା ପାଇଁ ଉଦ୍ଧିଷ୍ଟ ଏହି ମେଡିକାଲ ରେ ଥିବା ଏମଆରଆଇ ଓ ସିଟିସ୍କାନ ମେସିନ କାମ କରୁନାହିଁ l ଆଉ ଏହି ସବୁ ଯନ୍ତ୍ର ଗୁଡିକୁ ମେଡିକାଲ ର କିଛି ଅସାଧୁ ବ୍ୟକ୍ତି ଜାଣିଶୁଣି ଖରାପ କରିଦେଉଛନ୍ତି l ଯାହାଫଳରେ ରୋଗୀ ଘେରୋଇ ନର୍ସିଂହୋମ କୁ ଯାଇ ହଜାର ହଜାର ଟଙ୍କା ଖର୍ଚ କରୁଛନ୍ତି ଓ ଦଲାଲ ମାନେ ମାଲେମାଲ ହେଉଛନ୍ତି ବୋଲି ଅଭିଯୋଗ କରିଛି କୋଶଲ କ୍ରାନ୍ତି ସେନା l ଏହିଭଳି ସ୍ଥିତିରୁ ବୁର୍ଲା ମେଡିକଲକୁ ଉଦ୍ଧାର କରିବା ପାଇଁ ଆଜି କୋଶଲ କ୍ରାନ୍ତି ସେନା ପକ୍ଷରୁ ସମ୍ବଲପୁର ଜିଲ୍ଲାପାଳ ଓ ଭୀମସାର ମେଡିକାଲ ର ଅଧିକ୍ଷକ ଙ୍କୁ ଏକ ଦାବୀପତ୍ର ପ୍ରଦାନ କରିଛନ୍ତି l
କୋଶଲ କ୍ରାନ୍ତି ସେନାର ୨ ଜଣ ସଦସ୍ୟ ପାଦରୁ ମୁଣ୍ଡ ପର୍ଯ୍ୟନ୍ତ ଦେହସାରା ବ୍ୟାଣ୍ଡେଜ କପଡା ଲଗାଇ ବୁର୍ଲା ମେଡିକାଲ ସ୍ଥିତି ବର୍ତମାନ ଏହିଭଳି ଥିବାର ପ୍ରଦର୍ଶିତ କରି ସାଂକେତିକ ପ୍ରତିବାଦ କରିଛନ୍ତି l ସେମାନେ ଏହି ପ୍ରତିବାଦ ଦ୍ଵାରା କହିଛନ୍ତି ଯେ ବର୍ତମାନ ଭୀମସାର ମେଡିକାଲ ସ୍ଥିତି ଏହିଭଳି ରୁଗ୍ଣ , ଅପାରଗ ଓ ପଙ୍ଗୁ ହୋଇଯାଇଛି l ଏଠାରେ ମୁଖ୍ୟତଃ ପଯ୍ୟାପ୍ତ ସଂଖ୍ୟକ ଆଇସିୟୁ ବେଡ଼ ନଥିବାରୁ ପ୍ରତ୍ୟେକ ଦିନ ରୋଗୀଙ୍କ ଜୀବନ ଯାଉଥିବାର ଅଭିଯୋଗ ଆଣିଛି କୋଶଲ କ୍ରାନ୍ତି ସେନା l ତେଣୁ ଯଥାଶୀଘ୍ର ଏହି ହସ୍ପିଟାଲର ସ୍ଥିତିକୁ ସୁଧାରିବାକୁ ସମ୍ବଲପୁର ଜିଲ୍ଲା ପ୍ରଶାସନ ଓ ଭୀମସାର ମେଡିକାଲ ର ଅଧିକ୍ଷକ ଙ୍କ ଜରିଆରେ ରାଜ୍ୟ ସରକାର ଙ୍କୁ ଦାବୀପତ୍ର ପ୍ରଦାନ କରାଯାଇଛି l ଏହାସହ ଦାବୀ ପୂରଣ ନହେଲେ ଆଗାମୀ ଦିନରେ ତୀବ୍ର ଆନ୍ଦୋଳନ କରାଯିବ ବୋଲି ଚେତାବନୀ ଦେଇଛି କୋଶଲ କ୍ରାନ୍ତି ସେନା l
ଇଟିଭି ଭାରତ, ସମ୍ବଲପୁର
