ସମ୍ବଲପୁର: ଜିଲ୍ଲାରେ ପୁଣି ଦେଖାଦେଇଛି ଚାଷୀ ସମସ୍ୟା । ଅମଳ ହୋଇଥିବା ଧାନକୁ ବିକ୍ରି କରିପାରୁନାହାନ୍ତି ଚାଷୀ । ସମ୍ବଲପୁର ଜିଲ୍ଲା ଧନକଉଡା ବ୍ଲକର ବସନ୍ତପୁର ଅଞ୍ଚଳର 7ଟି ଗାଁର 215 ଜଣ ଚାଷୀଙ୍କୁ ଏବେ ଧାନ ବିକ୍ରି ଚିନ୍ତା ଘାରିଛି । ପରିଚୟ ପତ୍ର ମିଳି ନଥିବାରୁ ଏଭଳି ସମସ୍ୟା ଦେଖା ଦେଇଥିବା ଚାଷୀମାନେ ଅଭିଯୋଗ କରିଛନ୍ତି ।
ସମ୍ବଲପୁର ଧନକଉଡା ବ୍ଲକ ବସନ୍ତପୁର ଅଞ୍ଚଳର 215 ଜଣ ଚାଷୀ 700 ଏକର ଜମିରେ ଚାଷ କରିଛନ୍ତି । ଏକର ପିଛା ପ୍ରାୟ 30 ହଜାର ଖର୍ଚ୍ଚ କରିଛନ୍ତି ଚାଷୀ । ତେବେ ବର୍ତ୍ତମାନ ଧାନ ଅମଳ ହୋଇ ସାରିଥିବା ବେଳେ ଧାନ ବିକ୍ରି କରି ପାରୁନାହାନ୍ତି । ଚାଷୀଙ୍କୁ ପରିଚୟ ପତ୍ର ମିଳିନଥିବାରୁ ଧାନ ବିକ୍ରି କରିପାରୁନାହାନ୍ତି । ହୀରାକୁଦ ନଦୀବନ୍ଧ ଯୋଜନା ଆରମ୍ଭ ହେବା ପୂର୍ବରୁ ଏହି ସବୁ ଚାଷ ଜମିକୁ ରାଜ୍ୟ ସରକାରଙ୍କ ରାଜସ୍ବ ବିଭାଗ ଅଧିଗ୍ରହଣ କରିଥିଲେ । ଯେଉଁ ଉଦ୍ଦେଶ୍ୟ ନେଇ ଜମି ଅଧିଗ୍ରହଣ ହୋଇଥିଲା ସେହି ପ୍ରକଳ୍ପ ବନ୍ଦ ହୋଇଗଲା । ତେବେ ଜମି ଗୁଡ଼ିକ ପଡି ରହିଥିବା ବେଳେ ସ୍ଥାନୀୟ ଚାଷୀ ଏହି ଚାଷ ଜମିରେ ଚାଷ କରିବା ଆରମ୍ଭ କଲେ ।