ଏଥର ମହାନଦୀ ଗର୍ଭରେ ଜଳିବ ଇକୋ ଫ୍ରେଣ୍ଡଲି ରାବଣ

2 ବର୍ଷ ଧୁମଧାମରେ ହେବ ରାବଣ ପୋଡି । ସମ୍ବଲପୁର ଦଳେଇପଡା ରାବଣ ପୋଡି କମିଟି ପକ୍ଷରୁ ସମ୍ବାଦିକ ସମ୍ମିଳନୀ କରି ସୂଚନା ଦେଇଛନ୍ତି । ଅଧିକ ପଢନ୍ତୁ

ସମ୍ବଲପୁର:ଏଥର ଧୁମଧାମରେ ସମ୍ବଲପୁରରେ ପାଳନ ହେବ ରାବଣ ପୋଡି । କୋଭିଡ କଟକଣା ଯୋଗୁଁ ଗତ 2 ବର୍ଷ ଧରି ରାବଣ ପୋଡି ହୋଇନଥିବା ବେଳେ ଏଥର ଦଶହରାରେ ରାବଣ ପୋଡି ମହାଆଡମ୍ବରରେ କରାଯିବ ବୋଲି ସୂଚନା ଦେଇଛି ସମ୍ବଲପୁର ଦଳେଇପଡା ରାବଣ ପୋଡି କମିଟି l ମହାନଦୀ ଭିତରେ ଜଳିବ 40 ଫୁଟିଆ ଇକୋ ଫ୍ରେଣ୍ଡଲି ରାବଣ l

ସମ୍ବଲପୁର ଅଇଁଠାପାଲି ସ୍ଥିତ ଏକ ହୋଟେଲରେ ଅନୁଷ୍ଠିତ ହୋଇଥିବା ସାମ୍ବାଦିକ ସମ୍ମିଳନୀରେ ଧୁମଧାମରେ ରାବଣ ପୋଡି ହେବା ନେଇ ସୂଚନା ଦିଆଯାଇଛି । ଏଥର ସମ୍ବଲପୁର ଦଳେଇପଡା ମହାନଦୀ ଘାଟରେ ଜଳିବ ଗ୍ରୀନ ଓ ଇକୋ ଫ୍ରେଣ୍ଡଲି ରାବଣ । ଏହାସହ ଏଥର ଏହି ରାବଣ ପୋଡି କାର୍ଯ୍ୟକ୍ରମରେ ଦେଖିବାକୁ ମିଳିବ ମହାନଦୀ ଭିତରେ ଆତସ ବାଜି କାର୍ଯ୍ୟକ୍ରମ। ଏଥିପାଇଁ ଗଞ୍ଜାମ, ଯାଜପୁର ଓ ସୁନ୍ଦରଗଡ଼ରୁ ଏକ୍ସପଟ ଟ୍ରୁପ ଆସିବେ । ଏହି ଟ୍ରୁପ ଇକୋ ଫ୍ରେଣ୍ଡଲି ବାଣ ଫୋଟକା ତିଆରି କରିବେ ।

ଏହା ସହ ରାବଣ ପୋଡି ଅବସରରେ ଡ଼ଙ୍ଗା ସାହାଯ୍ୟରେ ମହାନଦୀ ଗର୍ଭକୁ ଯାଇ ସେଠାରେ ଥିବା ଟାପୁ ଉପରେ ଏହି ରଙ୍ଗାରଙ୍ଗ ଆତସ ବାଜି କାର୍ଯ୍ୟକ୍ରମ ପରିବେଷଣ କରିବେ । ଏଥର ମହାନଦୀ ଭିତରେ ତିଆରି ହେବ 40 ଫୁଟ ଉଚ୍ଚ ବିଶିଷ୍ଟ ଇକୋ ଫ୍ରେଣ୍ଡଲି ରାବଣ । ମୁଖ୍ୟତଃ ପରିବେଶ ସୁରକ୍ଷା ସଚେତନତା ନେଇ ତିଆରି ହେବ ଏହି ଇକୋ ଫ୍ରେଣ୍ଡଲି ରାବଣ । ରାବଣ ପୋଡି ପୂର୍ବରୁ ଏକ ବିରାଟ ଶୋଭାଯାତ୍ରା ଅନୁଷ୍ଠିତ ହେବ ବୋଲି ଦଳେଇପଡା ରାବଣ ପୋଡି କମିଟି ପକ୍ଷରୁ ସୂଚନା ଦେଇଛି । ଦୀର୍ଘ 2 ବର୍ଷ ପରେ ଧୁମଧାମରେ ରାବଣ ପୋଡି ଅନୁଷ୍ଠିତ ହେବାକୁ ଯାଉଥିବାରୁ ଲୋକଙ୍କ ମଧ୍ୟରେ ଉତ୍ସାହ ଦେଖିବାକୁ ମିଳିଛି ।

ଇଟିଭି ଭାରତ, ସମ୍ବଲପୁର