ସମ୍ବଲପୁର: ଚିକିତ୍ସାରେ ଅବହେଳା ଯୋଗୁଁ ଡାକ୍ତର ଗଣିବେ ୮୦ ଲକ୍ଷ ଟଙ୍କା । 2017 ମସିହାରେ ସମ୍ବଲପୁର ମୋଦିପଡ଼ାର ଜଣେ ଭିସୁଟ ଛାତ୍ର ସଡ଼କ ଦୁର୍ଘଟଣାରେ ଆହତ ହୋଇ ଭୀମସାର ବଡ ମେଡିକାଲରେ ଚିକିତ୍ସିତ ହେଉଥିଲେ । ସୁରଜ ଜୈନ ନାମକ ଜଣେ ଡାକ୍ତର ତାଙ୍କୁ ସମ୍ବଲପୁରର ଏକ ଘରୋଇ ମେଡିକାଲକୁ ପଠାଇଥିଲେ । ତ୍ରୁଟିପୂର୍ଣ୍ଣ ଅସ୍ତ୍ରୋପଚାର କରିବା ଯୋଗୁଁ ଯୁବକ ଜଣକ ଭିନ୍ନକ୍ଷମ ହୋଇଯିବାରୁ ସମ୍ବଲପୁର ଜିଲ୍ଲା ଖାଉଟି ଅଦାଲତରେ ଅଭିଯୋଗ ହୋଇଥିଲା l ଏହାର ଫଇସଲା ଶୁଣାଇ ସମ୍ବଲପୁର ଜିଲ୍ଲା ଖାଉଟି ଅଦାଲତ ସମ୍ବଲପୁର ୨ ଜଣ ଡାକ୍ତର ସୁରଜ ଜୈନ ଓ ସଞ୍ଜୟ ଭୋଇଙ୍କ ସମେତ ଉକ୍ତ ଘରୋଇ ହସ୍ପିଟାଲର କର୍ତ୍ତୃପକ୍ଷ ପ୍ରାୟ 80 ଲକ୍ଷ ଟଙ୍କାର କ୍ଷତିପୂରଣ ଦେବାକୁ ନିର୍ଦ୍ଦେଶ ଦେଇଛନ୍ତି ।
ସମ୍ବଲପୁର ମୋଦିପଡାର ସୁମିତ ଦାସ ବୁର୍ଲା ଭିସୁଟର ଜଣେ ମେଧାବୀ ଛାତ୍ର ଥିଲେ । ସେ ଏକ ଘରୋଇ କମ୍ପାନୀରେ ଚାକିରି ପାଇଥିଲେ l 2017 ନଭେମ୍ବର ୮ ତାରିଖରେ ରାତି 10 ଟାରେ ବୁର୍ଲାକୁ ଯାଉଥିବା ବେଳେ ଲକ୍ଷ୍ମୀ ଡୁମୁରି ନିକଟରେ ଏକ ସଡ଼କ ଦୁର୍ଘଟଣାର ଶିକାର ହୋଇଥିଲେ l ଫଳରେ ତାଙ୍କ ଗୋଡରେ ଗଭୀର ଆଘାତ ଲାଗିଥିଲା । ଗୁରୁତର ଅବସ୍ଥାରେ ତାଙ୍କୁ ପ୍ରଥମେ ବୁର୍ଲା ଭୀମସାର ମେଡିକାଲରେ ଭର୍ତ୍ତି କରାଯାଇଥିଲା l ସେଠାରେ ତାଙ୍କର ଚିକିତ୍ସା କରୁଥିବା ଡାକ୍ତର ସୁରଜ ଜୈନ ଭୀମସାର ମେଡିକାଲରେ ଅସ୍ତ୍ରୋପଚାର ନକରି ସମ୍ବଲପୁର ଏକ ଘରୋଇ ନର୍ସିଂହୋମକୁ ପଠାଇ ଦେଇଥିଲେ l ସେଠାରେ ସୁମିତଙ୍କ ଅସ୍ତ୍ରୋପଚାର କରାଯାଇଥିବା ବେଳେ ତାଙ୍କ ଅନିଚ୍ଛା ସ୍ୱତ୍ତ୍ବେ ଗୋଡରେ ଟାଇଟନିୟମ ପ୍ଲେଟ ବଦଳରେ ଷ୍ଟେନଲେସ ଷ୍ଟିଲର ପ୍ଲେଟ ଲଗାଯାଇଥିଲା l ପରବର୍ତ୍ତୀ ସମୟରେ ସୁମିତଙ୍କ ଗୋଡରେ ଅସ୍ତ୍ରୋପଚାର ହୋଇଥିବା ସ୍ଥାନରେ ବାରମ୍ବାର ସଂକ୍ରମଣ ହେବା ଯୋଗୁଁ ତାଙ୍କ ଗୋଡ ଏକ ପ୍ରକାର ଅଚଳ ହୋଇଯାଇଥିଲା ଏବଂ ସେ ଭିନ୍ନକ୍ଷମ ହୋଇଯାଇଥିଲେ l
ଏହା ମଧ୍ୟ ପଢ଼ନ୍ତୁ:ମୋବାଇଲ ଦେଖିଲେ ଆସିଲେନି ଡାକ୍ତର, ଅବହେଳାରୁ ରୋଗୀ ମୃତ୍ୟୁ ଅଭିଯୋଗ