ସମ୍ବଲପୁର: ସରିଛି ଭୋଟ୍ । ନେତାଙ୍କ ଅଗ୍ନି ପରୀକ୍ଷାରେ ପଡିଛି ପୂର୍ଣ୍ଣଚ୍ଛେଦ । ଇଭିଏମରେ ସିଲ ଭାଗ୍ୟ ଓ ଭବିଷ୍ୟତ । ଟିକେଟ୍ ଲବି, ନାମାଙ୍କନ ଦାଖଲ ପରେ ପ୍ରଚାର, ଭୋଟ ଭିକ୍ଷା, ରୋଡ୍ ସୋ,ସାଧାରଣ ସଭା ଭଳି ହାର୍ଡ ଟାସ୍କ ସାରିଛନ୍ତି ପ୍ରାର୍ଥୀ । ଏକ ଲମ୍ବା ନିର୍ବାଚନୀ ମିଶାଣ ଫେଡାଣ କଷି କଷି ନୟାନ୍ତ ପ୍ରାର୍ଥୀ ନିର୍ବାଚନ ଶେଷ ହେବା ପରେ ଏବେ ରିଲାକ୍ସ ମୁଡରେ । ନିର୍ବାଚନୀ ଉଷ୍ଣତା ଓ ଝାଳବୁହା ବ୍ୟସ୍ତତା ଭିତରୁ ବାହାରି ହାଲକା ଫୁଲକା ସମୟ କାଟୁଛନ୍ତି ନେତା।
ଏହି ସମୟରେ ଘର ଆଉ ପରିବାରକୁ ଗୁରୁତ୍ବ ଦେଉଛନ୍ତି ନେତା । ସମ୍ବଲପୁର ଆସନରୁ ନିର୍ବାଚନ ଲଢିଥିବା ହାଇଭୋଲଟ୍ଜ ନେତାଙ୍କ ସହ ଇଟିଭି ଭାରତ କରିଥିଲା ଆଳାପ-ଆଲୋଚନା । ଏଥିରେ ସମସ୍ତ ପ୍ରାର୍ଥୀ ବେଶ୍ ଖୁସି ଓ ନିର୍ବାଚନ ପରିଣାମ ପାଇଁ ପଜିଟିଭ୍ ଥିବା କହିଛନ୍ତି । ବିଜେଡି ପ୍ରାର୍ଥୀନୀ ଡା ରସେଶ୍ୱରୀ ପାଣିଗ୍ରାହୀ, ବିଜେପି ପ୍ରାର୍ଥୀ ଜୟ ନାରାୟଣ ମିଶ୍ର, କଂଗ୍ରେସ ପ୍ରାର୍ଥୀ ଅଶ୍ବିନୀ ପୂଜାହାରୀ ସମସ୍ତଙ୍କ ଚେହେରାରେ ଖୁସି ଓ ବିଜୟ ଆଶାର ଝଲକ ଦେଖିବାକୁ ମିଳିଥିଲା ।
ବିଜେଡି ପ୍ରାର୍ଥୀନୀ ଡା ରାସେଶ୍ବରୀ ପାଣିଗ୍ରାହୀ ପ୍ରଚାର ଓ ମତଦାନ ପରେ ବେଶ ଖୁସି ଜଣା ପଡୁଥିଲେ । ସେ ନିଜ ଦଳୀୟ କର୍ମୀଙ୍କ ସହ ବେଶ କିଛି ହାଲକା ଫୁଲକା ମୁହୂର୍ତ୍ତ ବିତାଇବା ସହ ବିଜୟ ପାଇଁ ଶତ ପ୍ରତିଶତ ସୁନିଶ୍ଚିତ ଥିବା କହିଛନ୍ତି ।