ରାୟଗଡ଼ା:ଦୀର୍ଘ ଘଣ୍ଟା ଧରି କବାଟ ବନ୍ଦ କରି ମହିଳାଙ୍କ ଆତ୍ମହତ୍ୟା ଉଦ୍ୟମ । ମୁର୍ମୂଷ ଅବସ୍ଥାରେ ମହିଳା ହେଲେ ଉଦ୍ଧାର । ରାୟଗଡ଼ା ଜିଲ୍ଲା ଚାନ୍ଦିଲି ଥାନା ଅନ୍ତର୍ଗତ ମୁକୁନ୍ଦପୁରରେ ଦେଖିବାକୁ ମିଳିଛି ଏଭଳି ଅଘଟଣ । କୋଠରୀର କବାଟ ଭାଙ୍ଗି ଚାନ୍ଦିଲି ପୋଲିସ ମହିଳାଙ୍କୁ ଉଦ୍ଧାର କରିବା ପରେ କୋଲନରା ମେଡିକାଲରେ ଭର୍ତ୍ତି କରିଛି । ମହିଳା ଜଣକ କେଉଁ କାରଣରୁ ଏଭଳି ଏକ ଚରମ ନିଷ୍ପତ୍ତି ନେଇଥିଲେ ତାହା ବର୍ତ୍ତମାନ ପର୍ଯ୍ୟନ୍ତ ଅସ୍ପଷ୍ଟ ରହିଛି ।
ମୁକୁନ୍ଦପୁର ଗ୍ରାମର ଗଙ୍ଗାଧର ସାହୁକାରଙ୍କ ପୁଅ ଅଶୋକ ସାହୁକାର, ଗାୟତ୍ରୀ ସାହୁକାରଙ୍କୁ ବିବାହ କରିଥିଲେ । ଆଜି(ରବିବାର) ଅପରାହ୍ନରେ ଏହି ନବ ବିବାହିତା ଘର କବାଟ ଦେଇ ଆତ୍ମହତ୍ୟା ଉଦ୍ୟମ କରିଥିଲେ । ଶ୍ବଶୁର ଘର ଲୋକେ ଏସମ୍ପର୍କରେ ପୋଲିସକୁ ଖବର ଦେବାପରେ ଚାନ୍ଦିଲି IIC ବିଜୟଲଷ୍ମୀ ହିକକା ଘଟଣାସ୍ଥଳରେ ପହଞ୍ଚି କୋଠରୀର କବାଟ ଭାଙ୍ଗି ମୁର୍ମୂଷ ଅବସ୍ଥାରେ ମହିଳାଙ୍କୁ ଉଦ୍ଧାର କରି କୋଲନରା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଇଥଲେ । ପରେ ରାୟଗଡା ମୁଖ୍ୟ ଚିକିତ୍ସାଳୟକୁ ମହିଲାଙ୍କୁ ସ୍ଥାନାନ୍ତରିତ କରାଯାଇଛି । ଚାନ୍ଦିଲି ଥାନାରେ ଏହାକୁ ନେଇ ଏକ ମାମଲା ରୁଜୁ କରାଯାଇ ଅଧିକ ତଦନ୍ତ ଜାରି ରହିଛି ।
ରାୟଗଡ଼ାରୁ ରଞ୍ଜନ ରଥ, ଇଟିଭି ଭାରତ
