ଲଗାଣ ବର୍ଷାରେ ଚାଷ ଜମି ନଷ୍ଟ, ଘରେ ପଶିଲା ପାଣି

ମୁନିଗୁଡ଼ା ବ୍ଲକ ଅନ୍ତର୍ଗତ ଭୈରବଗଡରେ ଲଗାଣ ବର୍ଷାରେ ଶହ ଶହ ଏକର ଜମିରେ ବାଲିଚର ଯୋଗୁଁ ଚାଷ ନଷ୍ଟ ହେବା ସହ ଘରେ ପଶିଲା ପାଣି ।ଅଧିକ ପଢନ୍ତୁ

ରାୟଗଡା:ରାଜ୍ୟରେ ଜାରି ରହିଛି ଲଘୁଚାପ ଜନିତ ବର୍ଷା । ଲଗାଣ ବର୍ଷାରେ ଶହ ଶହ ଏକର ଜମିରେ ବାଲିଚର ଯୋଗୁଁ ଚାଷ ନଷ୍ଟ ହେବା ସହ ଘରେ ପଶିଛି ପାଣି । ଏଭଳି ଘଟଣା ଦେଖିବାକୁ ମିଳିଛି ମୁନିଗୁଡ଼ା ବ୍ଲକ ଅନ୍ତର୍ଗତ ଭୈରବଗଡରେ । ଭୈରବଗଡର ଦକ୍ଷିଣ ଦିଗରେ ପ୍ରବାହିତ ହୋଇଛି ସକଟା କ୍ଷୁଦ୍ର ଜଳସେଚନ ପ୍ରକଳ୍ପର କେନାଲ । ଦୀର୍ଘ ଦିନ ହେଲା ଉକ୍ତ କେନାଲଟି ବିଭାଗୀୟ ଅଧିକାରୀଙ୍କ ଦ୍ଵାରା ରକ୍ଷଣାବେକ୍ଷଣ ଅଭାବ ଯୋଗୁଁ ଟିକିଏ ବର୍ଷା ହେଲେ ଅନେକ ଜାଗାରେ ଘାଇ ସୃଷ୍ଟି ହେଉଛି । ବିଗତ ତିନି ଦିନ ଧରି ଜିଲ୍ଲାରେ ଲଗାଣ ବର୍ଷା ଲାଗିରହିବା ଫଳରେ କେନାଲ ଟି ବିଭିନ୍ନ ଜାଗାରେ ଭାଙ୍ଗି ଘାଇ ସୃଷ୍ଟି ହୋଇଛି ।

ଫଳରେ ଅନେକ ଚାଷ ଜମିରେ ବନ୍ୟାଜଳ ପଶି ବାଲିଚର ମାଡିବା ସହିତ ଚାଷ ଜମିର ବ୍ୟାପକ କ୍ଷତି ହେଇଥିବା ଦେଖିବାକୁ ମିଳିଛି । ଏପରିକି ଦୁର୍ବଳ କେନାଲ ଭାଙ୍ଗି ଯାଇଥିବା ଯୋଗୁଁ ଭୈରବଗଡ ଗାଁର ଅନେକଙ୍କ ଘରେ ପାଣି ପଶିଛି । ଏଥିଯୋଗୁଁ ଘରେ ଥିବା ସବୁ ଜିନିଷ ପାଣିରେ ଭାସି ଯାଇଥିବା ଜଣାପଡିଛି । ହେଲେ କେନାଲ ବନ୍ଧ ମରାମତି ପାଇଁ ଗାଁ ଲୋକେ ମୁନିଗୁଡ଼ା କ୍ଷୁଦ୍ର ଜଳସେଚନ ବିଭାଗୀୟ ଅଧିକାରୀଙ୍କୁ ଭେଟି ଜଣେଇଥିଲେ ସୁଦ୍ଧା କେହି ତାଙ୍କ କଥା ଶୁଣୁନଥିବା ପ୍ରକାଶ କରିଛନ୍ତି ଗ୍ରାମବାସୀ ।

ଇଟିଭି ଭାରତ, ରାୟଗଡା