ମୁହାଁମୁହିଁ ହେଲେ ସପିଂ ମଲ ମାଲିକ ଓ କଂଗ୍ରେସ କର୍ମୀ

ପୌର ପରିଷଦ ସ୍ଥାନରେ ବେଆଇନ ଭାବେ ନିର୍ମାଣ ହୋଇଥିବା ଅଭିଯୋଗ କରି ରାୟଗଡା ଜିଲ୍ଲା କଂଗ୍ରେସ ପକ୍ଷରୁ ପ୍ରତିବାଦ କରାଯାଇଛି । ସପିଂ ମାଲିକ ଜିଲ୍ଲା କଂଗ୍ରେସ ସଭାପତିଙ୍କୁ ଆକ୍ରମଣ କରିଥିବା କୁହାଯାଉଛି ।

ରାୟଗଡା: ସପିଂ ମଲ ମାଲିକଙ୍କ ଜିଲ୍ଲା କଂଗ୍ରେସ ସଭାପତିଙ୍କୁ ଆକ୍ରମଣ । ପୌର ପରିଷଦ ସ୍ଥାନରେ ସହରର କପିଳାସ ରୋଡରେ ବାରାଣସୀ ନିଳକଣ୍ଠ ନାମକ ବ୍ୟକ୍ତି ସପିଂ ମଲ ନିର୍ମାଣ କରିଛନ୍ତି । ପୌର ପରିଷଦର ଏକ ରାସ୍ତାକୁ ସମ୍ପୂର୍ଣ୍ଣ ଅବରୋଧ କରି ଏହି ମଲଟି ନିର୍ମାଣ ହୋଇଥିବା ଜିଲ୍ଲା କଂଗ୍ରେସ ପକ୍ଷରୁ ଅଭିଯୋଗ ହୋଇଥିଲା । ଏହାକୁ ବେଆଇନ ନିର୍ମାଣ ଦର୍ଶାଇ ରାୟଗଡା ଜିଲ୍ଲା କଂଗ୍ରେସ ପକ୍ଷରୁ ପ୍ରତିବାଦ କରାଯାଇଥିଲା ।

ସପିଂମଲ ଖୋଲିବା ପାଇଁ ପୂଜାର୍ଚ୍ଚନା ଚାଲିଥିବା ବେଳେ ଜିଲ୍ଲା କଂଗ୍ରେସ କମିଟି ସଭାପତି ଦୂର୍ଗାପ୍ରସାଦ ପଣ୍ଡା ଓ କର୍ମୀମାନେ ବିରୋଧ କରିଥିଲେ । ସେହି ସମୟରେ ସପିଂମଲର ମାଲିକ ବାରାଣସି ନିଳକଣ୍ଠଙ୍କ ପୁଅ ବାରାଣସି ବିନୟ, ସଭାପତି ଦୂର୍ଗାପ୍ରସାଦ ପଣ୍ଡା ଓ ସମ୍ପାଦକ ବାଦଲ ମହାନ୍ତିଙ୍କୁ ଗାଳି ଗୁଲଜ କରିଥିଲେ । ଏହାପରେ ଉତ୍ତେଜନା ବୃଦ୍ଧି ପାଇଥିଲା ।

ପୁନର୍ବାର ମଲ ଭିତରକୁ ପଶିବାକୁ କଂଗ୍ରେସ କର୍ମୀ ଉଦ୍ୟମ କରିଥିଲେ । ସେହି ସମୟରେ କଂଗ୍ରେସ କର୍ମୀଙ୍କୁ ମଲ ମାଲିକଙ୍କ ପୁଅ ବିନୟ ଆକ୍ରମଣ କରିଥିଲେ । ଏହାପରେ କଂଗ୍ରେସର ଅଧିକ କର୍ମୀ ପହଞ୍ଚି ପ୍ରତିବାଦ କରିବା ସହ ବିନୟଙ୍କୁ ମଧ୍ୟ ମାଡ ମାରିଥିଲେ । ଦୀର୍ଘ ସମୟ ଧରି ଉତ୍ତେଜନା ପରେ ମଲରେ ପୂଜାର୍ଚ୍ଚନା ବନ୍ଦ କରିଦିଆ ଯାଇଥିଲା । ତେବେ ବେଆଇନ ଭାବେ ନିର୍ମାଣ ହୋଇଥିବା ଏହି ମଲକୁ ଖୋଲିବାକୁ ଦିଆଯିବ ନାହିଁ ବୋଲି କଂଗ୍ରେସ ପକ୍ଷରୁ କୁହାଯାଇଛି ।

ରାୟଗଡାରୁ ରଞ୍ଜନ ରଥ, ଇଟିଭି ଭାରତ