ରାୟଗଡା: ନୂଆ ଭୂତାଣୁ ଷ୍ଟ୍ରେନକୁ ନେଇ ରାଜ୍ୟ ସରକାର ସୀମାନ୍ତରେ କଡା ନଜର ରଖିବାକୁ ପ୍ରଶାସନକୁ ନିର୍ଦ୍ଦେଶ ଦେବା ପରେ ଗତ କିଛି ଦିନ ହେବ ଓଡିଶା-ଆନ୍ଧ୍ର ସୀମାନ୍ତକୁ ସିଲ୍ କରିଦିଆଯାଇଛି । ଜିଲ୍ଲାର ଗୁଣପୁର, ରାମନାଗୁଡା, କୋଲନରା ଓ ରାୟଗଡା ସଦରର ସୀମାନ୍ତରେ ଚେକ୍ ପଏଣ୍ଟ ଗଠନ କରି କଡା ନଜର ରଖାଯାଇଛି ।
ଓଡିଶା-ଆନ୍ଧ୍ର ସୀମାନ୍ତର ସ୍ଥିତି ଅନୁଧ୍ୟାନ କଲେ ରାୟଗଡା ଜିଲ୍ଲାପାଳ
ତେବେ ଆଜି ରାୟଗଡା ଜିଲ୍ଲାପାଳ ସରୋଜ କୁମାର ମିଶ୍ର ସୀମାନ୍ତ ସାନ୍ଧୁବାଡି ଗସ୍ତ କରି ସ୍ଥିତିର ଅନୁଧ୍ୟାନ କରିଛନ୍ତି । ସୀମାନ୍ତରେ ନିୟୋଜିତ ଥିବା ପୋଲିସ କର୍ମଚାରୀ, ଶିକ୍ଷକ ଓ ପରିବହନ ବିଭାଗର କର୍ମଚାରୀଙ୍କ ସହ ଜିଲ୍ଲାପାଳ ବିଭିନ୍ନ ସମସ୍ୟା ଉପରେ ଆଲୋଚନା କରିଛନ୍ତି । ବାହାର ରାଜ୍ୟରୁ ଆସୁଥିବା ଲୋକ ମାନଙ୍କ ଉପରେ ତୀକ୍ଷ୍ଣ ନଜର ରଖିବା ସହ ସମସ୍ତଙ୍କୁ 14 ଦିନିଆ ସଂଘରୋଧ କେନ୍ଦ୍ରରେ ରଖିବାକୁ ଜିଲ୍ଲାପାଳ ନିର୍ଦ୍ଦେଶ ଦେଇଛନ୍ତି ।