ରାୟଗଡା:ଡଙ୍ଗରିଆକନ୍ଧଙ୍କ ପାଇଁ ଆବାସ ଯୋଜନା ପାଲଟିଛି ସାତ ସପନ । କେନ୍ଦ୍ର ଠାରୁ ଆରମ୍ଭ କରି ରାଜ୍ୟ ସରକାର ପର୍ଯ୍ୟନ୍ତ ଦେଶରୁ କଚା ଘର ହଟାଇ ୨୦୨୨ ସୁଦ୍ଧା ଦେଶର ସମସ୍ତ ଗରିବଙ୍କୁ ପକ୍କାଘର ପ୍ରଦାନ ପାଇଁ ଆବାସ ଯୋଜନା କରିଛନ୍ତି । ହେଲେ ତାହା ଫଳଶୂନ୍ୟ ହୋଇଛି । ରାୟଗଡା ଜିଲ୍ଲା ନିୟମଗିରିରେ ରହୁଥିବା ଆଦିମ ଅଧିବାସୀ ଏଥିରୁ ବଞ୍ଚିତ ହୋଇଛନ୍ତି । ବାରମ୍ବାର ନିବେଦନ ପରେ ବି ନୀତି ନିୟମର ଦ୍ଵାହିଦେଇ ସରକାରଙ୍କ ଘୋଷିତ ଯୋଜନାରୁ ଏମାନେ ବଞ୍ଚିତ ହେଉଥିବା ନଜରକୁ ଆସିଛି । ନିୟମଗିରିରେ ବସବାସ କରୁଥିବା ଆଦିମ ଜନଜାତି ଡଙ୍ଗରିଆକନ୍ଧ ଏହି ସମସ୍ୟାରେ ସମ୍ମୁଖୀନ ହୋଇଛନ୍ତି ।
ନିୟମଗିରି ପାହାଡରେ ଦଶନ୍ଧି ଦଶନ୍ଧି ଧରି ଆଦିମ ଜନଜାତି ଡ଼ଙ୍ଗରିଆ କନ୍ଧ ବାସ କରି ଆସୁଛନ୍ତି । ହେଲେ ମୌଳିକ ସୁବିଧା ଏଠି ସାତ ସପନ । ନା ରହିବାକୁ ଅଛି ମୁଣ୍ଡ ଉପରେ କଂକ୍ରିଟର ଛାତ ନା ଗାଁକୁ ଅଛି ସବୁଦିନିଆ ରାସ୍ତା । ଏଭଳି କି ଡଙ୍ଗରିଆକନ୍ଧ ପରିବାର କେନ୍ଦ୍ର ସରକାରଙ୍କ ପ୍ରଧାନମନ୍ତ୍ରୀ ଆବାସ ଯୋଜନାରୁ ମଧ୍ୟ ବଞ୍ଚିତ ହୋଇଥିବାର ସ୍ପଷ୍ଟ ଚିତ୍ର ଲୋକଲୋଚନକୁ ଆସିଛି । କେବଳ ସେତିକି ନୁହଁ ରାଜ୍ୟ ସରକାରଙ୍କ ବିଜୁ ପକ୍କାଘର ଓ ମୋ କୁଡିଆ ଯୋଜନାରେ ମଧ୍ୟ କେହି ସାମିଲ ହୋଇନଥିବା ଅଭିଯୋଗ ହୋଇଛି ।
ଆବାସ ଯୋଜନାରେ ସାମିଲ କରି ଘର ଖଣ୍ଡିଏ ପ୍ରଦାନ ପାଇଁ ପଞ୍ଚାୟତ ଠାରୁ ବ୍ଲକ ପର୍ଯ୍ୟନ୍ତ ଦୌଡି ନୟାନ୍ତ ହେବା ପରେ ମଧ୍ୟ ସେମାନଙ୍କୁ ଉପଲବ୍ଧ ହେଉନଥିବା ଜଣାପଡିଛି । ଫଳରେ ସରକାରଙ୍କ ଉପରେ ଏହି ଆଦିମ ଜନଜାତିଙ୍କ ଭରସା ତୁଟିବାରେ ଲାଗିଛି । ନିୟମଗିରି ପାହାଡରେ ୧୧୨ ଖଣ୍ଡ ଗ୍ରାମରେ ୨୫୦୦ ରୁ ଉର୍ଦ୍ଧ୍ବ ଘର ରହିଛି । ତେବେ ବିଡମ୍ବନାର ବିଷୟ ହାତଗଣତି କିଛି ଜଣଙ୍କୁ ବାଦ ଦେଲେ କୌଣସି ଜଣେ ମଧ୍ୟ ଡଙ୍ଗରିଆକନ୍ଧ ଆବାସ ଯୋଜନାରେ ସାମିଲ ହୋଇ ନାହାଁନ୍ତି । ସରକାରଙ୍କ ତ୍ରୁଟିପୂର୍ଣ୍ଣ କାର୍ଯ୍ୟ ପାଇଁ ଏହିଭଳି ସ୍ଥିତି ଉପୁଜିଛି ।
ସୂଚନାଅନୁସାରେ, ୨୦୦୨ ଓ ୨୦୦୩ ମସିହାରେ ଡଙ୍ଗରିଆକନ୍ଧ ମାନଙ୍କ ପାଇଁ ଏକ ସ୍ବତନ୍ତ୍ର ଆବାସ ଯୋଜନା ଆରମ୍ଭ କରାଯାଇଥିଲା । ସମସ୍ତ ଡଙ୍ଗରିଆକନ୍ଧଙ୍କୁ ଆଜବେଷ୍ଟସ ଗୃହ ପ୍ରଦାନ କରାଗଲା । ମାତ୍ର ୩୦ ହଜାର ଟଙ୍କାରେ ଏହି ଘର ପ୍ରଦାନ ହୋଇଥିଲା । ଫଳରେ ସରକାରଙ୍କ ନିୟମାନୁସାରେ ଥରେ ଯଦି ଜଣେ ଘର ପାଇଲେ ଦ୍ବିତୀୟ ଥର ପାଇବେ ନାହିଁ । ଏହି ନିୟମ ପ୍ରକାରେ ବର୍ତ୍ତମାନ ଡଙ୍ଗରିଆକନ୍ଧ ସମ୍ପ୍ରଦାୟ ଆବାସ ଯୋଜନାରୁ ବଞ୍ଚିତ ହୋଇଛନ୍ତି । ୨୦ ବର୍ଷ ପୂର୍ବେ ୩୦ ହଜାର ଟଙ୍କା ବ୍ୟୟରେ ନିର୍ମିତ ଘରର ଅବସ୍ଥା କଣ ରହିଥିବ ତାହା ସ୍ପଷ୍ଟ ବାରି ହୋଇ ପଡୁଛି । ତେଣୁ ଡଙ୍ଗରିଆକନ୍ଧ ମାନେ ଚାଳ ଓ ଛପର ଘରେ ରହିବାକୁ ବାଧ୍ୟ ହେଉଛନ୍ତି ।