ରାୟଗଡ଼ା: ପର୍ଯ୍ୟଟନ ସ୍ଥଳରୁ ଧୀରେ ଧୀରେ ଡେଥ୍ ଜୋନର ପରିଚୟ ସୃଷ୍ଟି କରିବାରେ ଲାଗିଛି ରାୟଗଡା ଉପକଣ୍ଠ ନାଗାବଳୀ ନଦୀ ଉପରେ ଥିବା ଝୁଲାପୋଲଟି (Chekaguda hanging bridge ) । ମୃତ୍ୟୁର ତାଣ୍ଡବ ରଚୁଥିବା ଏହି ଝୁଲା ପୋଲକୁ ଜନସାଧାରଣ ପାଇଁ ନିଷିଦ୍ଧାଞ୍ଚଳ ଘୋଷଣା କଲା ଜିଲ୍ଲା ପ୍ରଶାସନ (Chekaguda bridge declared as restricted area ) । ଏହି ସ୍ଥାନଟି ପ୍ରାକୃତିକ ସୌନ୍ଦର୍ଯ୍ୟରେ ଭରପୂର ଥିବା ବେଳେ ଜିଲ୍ଲାର ଏକ ପର୍ଯ୍ୟଟନ ସ୍ଥଳି ପାଲଟିଥିଲା । ପ୍ରଶାସନର ଏହି ନିଷ୍ପତ୍ତିକୁ ସ୍ଥାନୀୟ ଲୋକେ ବିରୋଧ କରିଛନ୍ତି ।
ଝୁଲାପୋଲ ରାୟଗଡ଼ା ସହରର ଚେକାଗୁଡା ଠାରୁ ରାୟଗଡ଼ା ବ୍ଲକ ବାଇସିଂ ପଞ୍ଚାୟତ ଅନ୍ତର୍ଗତ ମାରିଗୁଡା ଗ୍ରାମକୁ ଲମ୍ବିଛି । ଗତ ୨୦୧୨ ମସିହାରେ ଏହାର ନିର୍ମାଣ ହୋଇଥିଲା । କିନ୍ତୁ ବାରମ୍ବାର ଦୁର୍ଘଟଣା ଘଟୁଥିବାରୁ ପ୍ରଶାସନ ଏହା ବନ୍ଦ କରିବା ପାଇଁ ନିଷ୍ପତ୍ତି ନେଇଛି । ଗତ ଦୁଇବର୍ଷ ମଧ୍ୟରେ ଝୁଲା ପୋଲ ନିକଟ ନାଗାବଳୀ ନଦୀରେ ୨୦ରୁ ଊର୍ଦ୍ଧ୍ବ ପର୍ଯ୍ୟଟକଙ୍କ ମୃତ୍ୟୁ ଘଟିଥିଲା । ବିଳମ୍ବରେ ହେଲେ ମଧ୍ୟ ଜିଲ୍ଲା ପ୍ରଶାସନର ନିଦ ଭାଙ୍ଗିଛି । ଏହି ଝୁଲା ପୋଲକୁ ଜନସାଧାରଣଙ୍କ ପାଇଁ ନିଷିଦ୍ଧାଞ୍ଚଳ ଘୋଷଣା କରିଛି ରାୟଗଡ଼ା ଜିଲ୍ଲା ପ୍ରଶାସନ ।
ଏହା ବି ପଢନ୍ତୁ- ପର୍ଯ୍ୟଟନ ସ୍ଥଳରୁ ଡେଥଜୋନ ପାଲଟିଛି ନାଗାବଳୀ ନଦୀର ଝୁଲାପୋଲ ! ନେଲାଣି ୨୭ ମୁଣ୍ଡ
ଅପରପକ୍ଷେ ଏହି ନିଷ୍ପତ୍ତିକୁ ବିରୋଧ କରିଛନ୍ତି ମାରିଗୁଡା ଓ ଦୁମାଗୁଡା ଗାଁ ଲୋକ । କୌଣସି ପରିସ୍ଥିତିରେ ମଧ୍ୟ ଏହା ବନ୍ଦ ହେବାକୁ ଦିଆଯିବ ନାହିଁ ବୋଲି ପ୍ରକାଶ କରିଛନ୍ତି । ଏହି ପୋଲ ଉପର ଦେଇ ଗ୍ରାମବାସୀମାନେ ପ୍ରତିଦିନ ଯାତାୟତ କରୁଛନ୍ତି । ପୋଲକୁ ବନ୍ଦ କରାଗଲେ ସେମାନେ କିଭଳି ଯାତାୟତ କରିବେ ବୋଲି କହିଛନ୍ତି । ତେଣୁ ଝୁଲା ପୋଲ ନିକଟରେ ସେମାନେ ଆଜି ପ୍ରତିବାଦ କରିଥିଲେ । ଖବର ପାଇ ତହସିଲଦାର ତାପସ ରାଉତ ପହଞ୍ଚି ବୁଝାସୁଝା କରିଛନ୍ତି ।