ରାୟଗଡା: କଂସାରୀଗୁଡାରେ ଗଢି ଉଠିବ କାରଖାନା । ଅଞ୍ଚଳର ବିକାଶ ହେବା ସହ, ମିଳିବ ସ୍ଥାନୀୟ ନିଯୁକ୍ତି । ସରକାରଙ୍କ ଏହି ଆଶ୍ବସନାରେ ସହମତି ହୋଇ ଗ୍ରାମବାସୀ ଛାଡିଥିଲେ ନିଜ ଜମିବାଡି । ହେଲେ ଏବେ ଏହି ସ୍ବପ୍ନକୁ ପୁରିଛି 14 ବର୍ଷ । ତେଣୁ ଆଉ ଅପେକ୍ଷା ନୁହେଁ ଉଠିବ ଆନ୍ଦୋଳନର ସ୍ବର । ସରକାରଙ୍କୁ ଚେତାଇ ଦେବାକୁ ମାର୍ଚ୍ଚ 2ରେ ରେଳ ରୋକ, ରାସ୍ତାରୋକ କରିବେ କଂସାରଗୁଡା ବାସିନ୍ଦା । ତୁରନ୍ତ କାରଖାନା କରାଯାଉ ନଚେତ ଜମି ଫେରା ଯାଉ ଦାବିରେ ରାସ୍ତାକୁ ଓହ୍ଲାଇବେ ଶହଶହ ଜମିହରା ବାସିନ୍ଦା ।
ରାୟଗଡା କଂସାରୀଗୁଡାରେ ହିଣ୍ଡୋଲ କୋ କମ୍ପାନୀ ସ୍ଥାପନା ପାଇଁ 16 ଖଣ୍ଡ ଗ୍ରାମବାସୀ ନିଜ ଜମିବାଡି ହରାଇଥିଲେ । କାରଖାନା ଦ୍ବାରା ସ୍ଥାନୀୟ ଅଞ୍ଚଳ ବିକାଶ ହେବା ସହ କୋରାପୁଟ ଓ ରାୟଗଡାର 4 ଲୋକଙ୍କୁ ନିଯୁକ୍ତି ଦିଆଯିବ ବୋଲି କୁହାଯାଇଥିଲା । ତେଣୁ 14 ବର୍ଷ ପୂର୍ବେ କାଶୀପୁର ତହସିଲରୁ 2000ରୁ ଅଧିକ ଜମି ଅଧିଗ୍ରହଣ କରିଥିଲା ଜିଲ୍ଲାପ୍ରଶାସନ । ହେଲେ ଆଜି ପର୍ଯ୍ୟନ୍ତ ଏଠାରେ ବାସ୍ତବତାର ରୂପ ନେଇପାରିଲାନି ବକ୍ସସାଇଟ ରିଫାଇନାରୀ କାରଖାନା ।
ସେପଟେ କିନ୍ତୁ, କଳକାରଖାନା ନାଁ ଉକ୍ତ ଅଞ୍ଚଳରୁ ଲୁଟ ହେବାରେ ଲାଗିଛି ଖଣିଖଦାନ । ପ୍ରଥମେ 3 ମିଲିୟନ ଟନରୁ ଏବେ 6 ମିଲିୟନ ଟନ ଖଣି ଖନନ ପାଇଁ ଚକ୍ରାନ୍ତ ଚାଲିଥିବା ଜଣାପଡିଛି । ଏହାକୁ ତୁରନ୍ତ ବନ୍ଦ କରିବାକୁ ଦାବି କରିଛନ୍ତି ଜମିହରା ବାସିନ୍ଦା । କମ୍ପାନୀ ସ୍ଥାପନା ପାଇଁ ଜମି ହରାଇଥିବା ଲୋକେ ନାହିଁ ନଥିବା ସମସ୍ୟାରେ ଦହଗଞ୍ଜ ହେଉଥିବାବେଳେ କାରଖାନାକୁ ଆରମ୍ଭ କରିବାକୁ ଦାବି କରିଛନ୍ତି ।