ରାୟଗଡା: ଜନନୀ ସୁରକ୍ଷା ନାମରେ ସରକାର କୋଟିକୋଟି ଟଙ୍କା ଖର୍ଚ୍ଚ କରୁଥିବା ବେଳେ ଠିକ୍ ଭାବେ ଲୋକଙ୍କ ପାଖରେ ପହଞ୍ଚି ପାରୁନାହିଁ ଏହାର ସୁଫଳ । କେତେବେଳେ ରାସ୍ତା ନଥିବାବେଳେ ତ କେତେକ ସ୍ଥାନରେ ଡାକ୍ତର ନଥିବାରୁ ଲୋକେ ନାନା ଅସୁବିଧା ଭୋଗୁଛନ୍ତି। ପ୍ରାୟ ସବୁସମୟରେ ଗର୍ଭବତୀ ମହିଳାଙ୍କୁ ଭାର କିମ୍ବା ଖଟରେ ବୁହା ହେବା ଘଟଣା ପାଇଁ କାଶୀପୁର ବ୍ଲକ ଚର୍ଚ୍ଚାରେ ରହିଛି ।
ଆଜି(ରବିବାର) ଏହିଭଳି ଏକ ଘଟଣା ଘଟିଛି ରାୟଗଡ଼ା ଜିଲ୍ଲା କାଶିପୁର ବ୍ଲକ ମାଇକଞ୍ଚ ପଞ୍ଚାୟତ ଅନ୍ତର୍ଗତ ସିନ୍ଧିଗୁଡା ଗ୍ରାମରେ । ସେହି ଗ୍ରାମର ଲମ୍ବୋଦର ଗୌଡଙ୍କ ସ୍ତ୍ରୀ କୁନ୍ତଳା ଗୌଡଙ୍କ ଗର୍ଭ ଯନ୍ତ୍ରଣା ହେବାରୁ ପରିବାର ଲୋକ ଓ ଆଶାକର୍ମୀ ମାଣିକ ଦଳପତି ୧୦୮କୁ ଫୋନ କରିଥିଲେ। ଆମ୍ବୁଲାନ୍ସଟି ରାସ୍ତା ନଥିବାରୁ କଞ୍ଚଗୁମା ଶିବ ମନ୍ଦିର ଠାରେ ଅଟକି ଯାଇଥିଲା। ଆଶାକର୍ମୀ ମାଣିକ ଦଳପତି, ୧୦୮ କର୍ମଚାରୀ ପରିକ୍ଷିତ ନାଏକ ଓ କୈଳାସ ଲିମା ଗର୍ଭବତୀ ମହିଳାଙ୍କୁ ଭାରରେ ୨ କି.ମି ବୋହିକି ଆଣିବା ସମୟରେ ଅଧା ରାସ୍ତାରେ ମହିଳା ଜଣଙ୍କ ଶିଶୁକନ୍ୟାଟିଏ ଜନ୍ମ ଦେଇଥିଲେ ।