ରାୟଗଡ଼ା: ଦୁଇ ଡଙ୍ଗରିଆ ଯୁବକଙ୍କୁ ପୋଲିସ ଉଠାଇ ନେବା ଘଟଣାର ପ୍ରତିବାଦ କରି ଥାନା ଘେରାଉ କରିଛନ୍ତି ଡଙ୍ଗରିଆ ସମ୍ପ୍ରଦାୟ । ନିୟମଗିରି ସୁରକ୍ଷା କମିଟି ଓ ଡଙ୍ଗରିଆ ସମ୍ପ୍ରଦାୟ ପକ୍ଷରୁ ଥାନା ଘେରାଉ କରାଯାଇଛି । ସୂଚନା ଅନୁସାରେ, ଶନିବାର କଳାହାଣ୍ଡି ଜିଲ୍ଲା ଲାଞ୍ଜିଗଡ଼ ବଜାରକୁ ଯାଇଥିବା ସମୟରେ ଦୁଇ ଡଙ୍ଗରିଆ ଯୁବକଙ୍କୁ ସେଠାକାର ପୋଲିସ ଉଠାଇ ନେଇଥିଲା । ଏହାକୁ ପ୍ରତିବାଦ କରି ରବିବାର କଲ୍ୟାଣସିଂହପୁର ଥାନା ଘେରାଉ କରାଯାଇଛି । ଘଟଣାସ୍ଥଳରେ ଉତ୍ତେଜନା ଲାଗି ରହିଥିବାବେଳେ ସ୍ଥିତି ନିୟନ୍ତ୍ରଣ ପାଇଁ ବରିଷ୍ଠ ପୋଲିସ ଅଧିକାରୀଙ୍କ ସହ ଫୋର୍ସ ମୁତୟନ ରହିଛନ୍ତି । ସୂଚନା ମୁତାବକ, କଲ୍ୟାଣସିଂହପୁର ବ୍ଲକ ଲାମ୍ବା ଗ୍ରାମର କୃଷ୍ଣ ଶିକ୍କା ଓ ବାରି ଶିକ୍କାକୁ କଳାହାଣ୍ଡି ଜିଲ୍ଲା ଲାଞ୍ଜିଗଡ଼ ବଜାରରୁ ପୋଲିସ ଉଠାଇ ନେଇଥିବା ଜଣାପଡ଼ିଛି ।
ଆଜି ସକାଳୁ ନିୟମଗିରି ଅଞ୍ଚଳର ୧୨୧ ଖଣ୍ଡ ଗାଁର ଡଙ୍ଗରିଆ ଏକତ୍ରିତ ହୋଇ ନିୟମଗିରି ସୁରକ୍ଷା ସମିତି ସଭାପତି ଶିକକା ଲଦଙ୍କ ନେତୃତ୍ୱରେ ନିଜର ପାରମ୍ପରିକ ଅସ୍ତ୍ରଶସ୍ତ୍ର ନେଇ ସେମାନେ ଥାନା ଘେରାଉ ଉଦ୍ୟମ କରିଥିଲେ । 2 ଯୁବକଙ୍କୁ ପୋଲିସ ନଛାଡିବା ଯାଏଁ ସେମାନେ ସେଠାରୁ ଯିବେ ନାହିଁ ବୋଲି ଅଡ଼ି ବସିଛନ୍ତି । ଘଟଣାସ୍ଥଳରେ ଜଣେ ଅତିରିକ୍ତ ଏସ୍ପି, ୬ଜଣ IIC, SOG, APR, OSAP, CRPF ସହ ଏକ ପ୍ଲାଟୁନ୍ ପଲିସ ମୁତୟନ ଅଛନ୍ତି ।
ଏହା ବି ପଢନ୍ତୁ...କମୁନି ଦୁର୍ଦ୍ଦଶା: ଅନ୍ଧାରରେ ରତାଖଣ୍ଡି ପଞ୍ଚାୟତ, ଜିଲ୍ଲାପାଳ କାର୍ଯ୍ୟାଳୟ ଘେରାଉ କଲେ ଲୋକେ