ରାୟଗଡାରେ ଆରମ୍ଭ ହେବ ଅପରେସନ ‘ଗ୍ରୀନ ଡାଇମଣ୍ଡ’

ଗଞ୍ଜେଇ ମାଫିଆଙ୍କ କବଳରେ ରାୟଗଡା । ଏନେଇ ବ୍ଲୁପ୍ରିଣ୍ଟ ପ୍ରସ୍ତୁତ କରି ଆସନ୍ତା 20 ତାରିଖ, ବୁଧବାର ଠାରୁ ଆରମ୍ଭ ହେବାକୁ ଯାଉଛି ଅପରେସନ ‘ଗ୍ରୀନ ଡାଇମଣ୍ଡ’ ।

ରାୟଗଡା: ଗଞ୍ଜେଇ ମାଫିଆଙ୍କ କବଳରେ ରାୟଗଡା । ଜିଲ୍ଲାର ମାଓ ପ୍ରବଣ ଦୁର୍ଗମ ଅଞ୍ଚଳରେ ଚଳିତବର୍ଷ 250 ହେକ୍ଟର ଜମିରେ ଗଞ୍ଜେଇ ଚାଷ କରାଯାଇଥିବା ଆକଳନ କରିଛି ପୋଲିସ, ଅବକାରୀ, କୃଷି ଓ ବନ ବିଭାଗ । ଏନେଇ ବ୍ଲୁପ୍ରିଣ୍ଟ ପ୍ରସ୍ତୁତ କରି ଆସନ୍ତା 20 ତାରିଖ ବୁଧବାର ଠାରୁ ଆରମ୍ଭ ହେବାକୁ ଯାଉଛି ଅପରେସନ ‘ଗ୍ରୀନ ଡାଇମଣ୍ଡ’ ।

ଏହି ଅପରେସନ ଆଉ କିଛି ନୁହେଁ ବରଂ ଗଞ୍ଜେଇ ଗଛ କଟା ଅଭିଯାନ ବୋଲି ସୂଚନା ଦେଇଛନ୍ତି ରାୟଗଡା ଏସପି ଡ଼ଃ ଶ୍ରବଣ ବିବେକ ଏମ୍‌ । ଏଥିପାଇଁ ପୋଲିସ, ଅବକାରୀ କୃଷି, ରାଜସ୍ବ ଏବଂ ବନ ବିଭାଗର ମିଳିତ ବୈଠକରେ ଯୋଜନା ଚୂଡାନ୍ତ ହୋଇଥିବା ଏସପି କହିଛନ୍ତି । ତେବେ ଏହି ଅଞ୍ଚଳ ମାଓ ପ୍ରବଣ ହୋଇଥିବାରୁ କଡା ସୁରକ୍ଷା ଏବଂ ସତର୍କତା ମଧ୍ୟରେ ଗଞ୍ଜେଇ ଗଛ କଟା ଅଭିଯାନକୁ ସଫଳତାର ରୂପ ଦେବାକୁ ବୈଠକରେ ନିଷ୍ପତ୍ତି ହୋଇଛି ।

ମାଓବାଦୀଙ୍କ ଗଡ କୁହାଯାଉଥିବା ଚନ୍ଦ୍ରପୁର, ପୁଟାସିଂ, ପଦ୍ମପୁର, ଗୁଡାରୀ ଓ କେନ୍ଦୁଗୁଡା ଅଞ୍ଚଳର 500 ଏକରରେ ହୋଇଛି ଗଞ୍ଜେଇ ଚାଷ । ସ୍ଥାନୀୟ ଆଦିବାସୀଙ୍କୁ ହାତ କରି ଗଞ୍ଜେଇ ମାଫିଆଙ୍କ ସମେତ ମାଓ ଛାମୁଆ ସଂଗଠନ ପ୍ରତ୍ୟେକ୍ଷ ତତ୍ବାବଧାନରେ ଏହି ଚାଷ ଚାଲିଥିବା ଜଣାପଡିଛି ।

ଗଞ୍ଜେଇ ଚାଷ ଉପରେ ନଜର ରଖିବାକୁ ଯାଇ ମୁଖ୍ୟ ଶାସନ ସଚିବ, ରାଜ୍ୟ ପୋଲିସ ମହା ନିର୍ଦ୍ଦେଶକ ଜିଲ୍ଲାପାଳ ଓ ଏସପିଙ୍କୁ ଚିଠି କରିଥିଲେ । ଏହାପରେ ରାୟଗଡା ଜିଲ୍ଲାପାଳ ପ୍ରମୋଦ କୁମାର ବେହେରାଙ୍କ ଅଧ୍ୟକ୍ଷତାରେ ପ୍ରସ୍ତୁତି ବୈଠକ କରାଯାଇ ଅପରେସନ ‘ଗ୍ରୀନ ଡାଇମଣ୍ଡ’ର ରୂପରେଖ ଚୂଡାନ୍ତ ହେଇଥିବା କହିଛନ୍ତି ଏସପି ଡ଼ଃ ଶ୍ରବଣ ବିବେକ ଏମ ।

ରାୟଗଡାରୁ ରଞ୍ଜନ ରଥ, ଇଟିଭି ଭାରତ