ରାୟଗଡା: ସ୍ବାସ୍ଥ୍ୟକେନ୍ଦ୍ରକୁ ସଂକ୍ରମଣମୁକ୍ତ କରିବାକୁ ଗୁରୁତ୍ବ ଦେଉଛନ୍ତି ସରକାର। ବର୍ଜ୍ୟବସ୍ତୁ ପରିଚାଳନା ପାଇଁ ବିଭିନ୍ନ ମେସିନ୍ ସ୍ବାସ୍ଥ୍ୟ ବିଭାଗକୁ ପ୍ରଦାନ କରିଛନ୍ତି। ହେଲେ କୋଟି କୋଟି ଟଙ୍କା ବ୍ୟୟରେ କିଣା ଯାଇଥିବା ମେସିନ୍ ସ୍ବାସ୍ଥ୍ୟକେନ୍ଦ୍ରରେ କାମରେ ଲାଗିବା ବଦଳରେ ଖୋଲା ଆକାଶ ତଳେ ପଡି ରହିଛି। ଫଳରେ ରାୟଗଡାରେ ଜୈବ ଆବର୍ଜନା ପରିଚାଳନା ଦିଗହରା ହୋଇପଡିଛି। ରାୟଗଡା ଜିଲ୍ଲାର 11ଟି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର, 34ଟି ପ୍ରାଥମିକ ସ୍ବାସ୍ଥ୍ୟକେନ୍ଦ୍ର, ଗୋଟିଏ ସହରାଞ୍ଚଳ ସ୍ବାସ୍ଥ୍ୟକେନ୍ଦ୍ର, ଗୁଣପୁର ଉପଖଣ୍ଡ ସ୍ବାସ୍ଥ୍ୟକେନ୍ଦ୍ରରୁ ଦୈନିକ ବାହାରୁଥିବା ଗଜ, ବ୍ୟାଣ୍ଡେଜ, ସିରିଞ୍ଜ ଭଳି ଆବର୍ଜନାକୁ ବାହାରେ ନ ପକାଇ ମେସିନ୍ ମାଧ୍ୟମରେ ନଷ୍ଟ କରିବାକୁ ଯୋଜନା କରିଛନ୍ତି ସରକାର।
ଏଥିଲାଗି ଓଡିଶା ରାଜ୍ୟ ଔଷଧ ନିଗମ ଲିମିଟେଡ୍ ପକ୍ଷରୁ 25ଟି ଅଟୋ କ୍ଲେଭ ଓ 25ଟି ସେଡର୍ ମେସିନ୍ ଜିଲ୍ଲା ସ୍ବାସ୍ଥ୍ୟ ବିଭାଗକୁ ପ୍ରଦାନ କରାଯାଇଛି। କୋରୋନା ସଂକ୍ରମଣ ବ୍ୟାପିବା ପୂର୍ବରୁ 50ଟି ମେସିନ୍ ରାୟଗଡା ସ୍ବାସ୍ଥ୍ୟ ବିଭାଗର ହସ୍ତାନ୍ତର ହୋଇଛି। ହେଲେ ବିଗତ 8ମାସ ଧରି ଏହି ମେସିନ୍ ଗୁଡିକୁ ଗୋଷ୍ଠୀ ଓ ପ୍ରାଥମିକ ସ୍ବାସ୍ଥ୍ୟକେନ୍ଦ୍ରକୁ ପଠାନଯାଇ ସ୍ବାସ୍ଥ୍ୟ ବିଭାଗର ବାରିଝୋଲାସ୍ଥିତ କାର୍ଯ୍ୟାଳୟରେ ଖୋଲା ଆକାଶ ତଳେ ପକାଇ ରଖାଯାଇଛି। ରକ୍ଷଣାବେକ୍ଷଣ ଅଭାବରୁ ଖୋଲା ଆକାଶ ତଳେ ପଡିଥିବା ମେସିନ୍ ଗୁଡିକ ନଷ୍ଟ ହେବାକୁ ବସିଲାଣି। କିନ୍ତୁ ସ୍ବାସ୍ଥ୍ୟ ବିଭାଗର ଏଥିପ୍ରତି ଯତ୍ନଶୀଳ ନଥିବା ଭଳି ମନେ ହେଉଛି। ଖରା, ବର୍ଷା ପ୍ରଭାବରେ କୋଟି କୋଟି ଟଙ୍କା ବ୍ୟୟରେ କିଣାଯାଇଥିବା ମେସିନ୍ ଗୁଡିକର ଅବସ୍ଥା ଏମିତି ହେଲାଣି ଯେ ବ୍ୟବହାର ବେଳକୁ ପୁଣି ଥରେ ମରାମତି କରିବାକୁ ପଡିବ।
ଜିଲ୍ଲା ସ୍ବାସ୍ଥ୍ୟ ବିଭାଗ ଅଧିକାରୀଙ୍କ କହିବା ଅନୁଯାୟୀ, ଗୋଷ୍ଠୀ ଓ ପ୍ରାଥମିକ ସ୍ବାସ୍ଥ୍ୟକେନ୍ଦ୍ରରେ ରାଜ୍ୟ ସ୍ବାସ୍ଥ୍ୟ ବିଭାଗ ମେସିନ୍ ଗୁଡିକ ଇନଷ୍ଟାଲେସନ୍ କରିବା କଥା। ବହୁତ ଓଜନର ମେସିନ୍ ହୋଇଥିବାରୁ ଏହାକୁ ସ୍ଥାନାନ୍ତର ପାଇଁ ଜେସିବି ମେସିନ୍ ଓ ଟ୍ରକର ଆବଶ୍ୟକତା ରହିଛି। କିନ୍ତୁ ମେସିନ୍ ପ୍ରଦାନ ଓ ଇନଷ୍ଟାଲେସନ୍ ପାଇଁ ଠିକା ନେଇଥିବା କମ୍ପାନି ମେସିନ୍ ପ୍ରଦାନ କରିବା ପରଠାରୁ ଆଉ ଆସିନଥିବାରୁ ମେସିନ୍ ଗୁଡିକ ଖୋଲା ଆକାଶ ତଳେ ପଡିଛି। ସ୍ବାସ୍ଥ୍ୟକେନ୍ଦ୍ରରେ ମେସିନ୍ ଗୁଡିକ କାର୍ଯ୍ୟକ୍ଷମ ହେଲେ ଅପରେସନ୍, ଡ୍ରେସିଂ ଓ ଚିକିତ୍ସା ପରେ ବାହାରୁଥିବା ଗଜ, ବ୍ୟାଣ୍ଡେଜ, ସିରିଞ୍ଜ ଗୁଡ଼ିକୁ ବାହାରେ ନ ପକାଇ ମେସିନରେ ପକାଇ ନଷ୍ଟ କରାଯାଇପାରନ୍ତା।