ରାୟଗଡା:ନିୟନ୍ତ୍ରଣକୁ ଆସୁଛି ହଇଜା । ରାୟଗଡ଼ା ଜିଲ୍ଲା କାଶୀପୁର ବ୍ଲକରେ ଗତ 26 ଦିନ ଧରି ଆତଙ୍କ ଖେଳାଇଥିବା ହଇଜା ସଂକ୍ରମଣରେ ସ୍ଥିତି ସୁଧାର ହେଉଥିବା ଜିଲ୍ଲାପାଳ ସ୍ଵଧା ଦେବ ସିଂ ସୂଚନା ଦେଇଛନ୍ତି । ଗତ ଦୁଇଦିନ ତଳେ କାଶୀପୁର ବ୍ଲକର ବିଭିନ୍ନ ଗ୍ରାମରେ ଯୋଗାଇ ଦିଆଯାଉଥିବା ଟାଙ୍କର ପାଣିରେ ଇ- କୋଲାଇ ଜୀବାଣୁ ଚିହ୍ନଟ ହେବା ପରେ ସ୍ୱାସ୍ଥ୍ୟ ବିଭାଗ ପାଇଁ ମୁଣ୍ଡ ବିନ୍ଧାର କାରଣ ସାଜିଥିଲା । ଏହାପରେ ତୁରନ୍ତ ଟାଙ୍କର ବଦଳାଇ ନୂତନ ପାଣି ଦିଆଯାଇଥିବା ଜିଲ୍ଲାପାଳ କହିଛନ୍ତି ।
ରାୟଗଡ଼ା ଜିଲ୍ଲାପାଳ ସ୍ଵଧା ଦେବ ସିଂ କହିଛନ୍ତି," ହଇଜା ଆକ୍ରାନ୍ତ ସଂଖ୍ୟା 50 ତଳକୁ ଖସିଥିବାବେଳେ ବିଭିନ୍ନ ହସ୍ପିଟାଲରେ 50 ଜଣ ରୋଗୀ ଚିକିତ୍ସା ହେଉଛନ୍ତି । ସେମାନଙ୍କ ସ୍ବାସ୍ଥ୍ୟବସ୍ଥା ଏବେ ସ୍ଥିର ରହିଛି । କାଶୀପୁର ବ୍ଲକରେ ବର୍ତ୍ତମାନ ୪୦ରୁ ୫୦ କେସ ରହିଛି । କିନ୍ତୁ ନୂଆ ସାଂଘାତିକ ସ୍ଥିତି ଦେଖାଯାଇ ନାହିଁ ।" ସେପଟେ କଲ୍ୟାଣସିଙ୍ଗପୁର ବ୍ଲକରେ 9 ଜଣ ହଇଜା ଆକ୍ରାନ୍ତଙ୍କ ମଧ୍ୟରୁ ଜଣକ ଠାରେ ଭିବ୍ରିଓ କଲେରା ଜୀବାଣୁ ଚିହ୍ନଟ ହୋଇଥିବା ସ୍ଵଷ୍ଟ କରିଛନ୍ତି ରାୟଗଡା ସିଡିଏମଓ ଡା. ଲାଲମୋହନ ରାଉତରାୟ ।