ରାୟଗଡା:ସାମାନ୍ୟ ବଚସାକୁ ନେଇ ଗୋଷ୍ଠୀ ସଂଘର୍ଷ । ଋଣକ୍ଷେତ୍ର ପାଲଟିଲା ରାୟଗଡା ଜେକେପୁର ରୋଡ । ସାମାନ୍ୟ ବଚସାକୁ ନେଇ ରାୟଗଡ଼ା ଜିଲ୍ଲା ଚାନ୍ଦିଲି ଥାନା ଅନ୍ତର୍ଗତ ଜେକେପୁରରେ ଗୋଷ୍ଠୀ ସଂଘର୍ଷ ହୋଇଥିବା ବେଳେ ଏଥିରେ ୬ଜଣ ଆହତ ହୋଇଛନ୍ତି । ସମସ୍ତ ଆହତଙ୍କୁ ଉଦ୍ଧାର କରାଯାଇ ବ୍ରହ୍ମପୁର ଡାକ୍ତରଖାନାରେ ଭର୍ତ୍ତି କରାଯାଇଛି ।
ଅଭିଯୋଗକାରୀଙ୍କ ଉପରେ ପୋଲିସର ଲାଠିଚାର୍ଜ !
ଗତକାଲି(ରବିବାର) ପିଲାଙ୍କ କଳିକୁ ନେଇ ଦେବଦଳା ଓ ନୂଆପଡ଼ା ଗାଁ ମଧ୍ୟରେ ବଚସା ହୋଇଥିଲା । ପରେ ଏହା ସଂଘର୍ଷର ରୂପ ନେଇଥିଲା । ଗୋଷ୍ଠୀ ସଂଘର୍ଷରେ ଦେବଦଳା ଗ୍ରାମର ୬ ଜଣ ଆହତ ହୋଇଥିବା ସୂଚନା ରହିଛି । ସେମାନଙ୍କ ମଧ୍ୟରୁ ଦୁଇ ଜଣଙ୍କୁ ବ୍ରହ୍ମପୁର ବଡ ମେଡିକାଲ ସ୍ଥାନାନ୍ତରିତ କରାଯାଇଛି । ତେବେ ଏହି ଘଟଣା ନେଇ ପ୍ରବଳ ଉତ୍ତେଜନା ପ୍ରକାଶ ପାଇଛି । ଏଥିରେ ସମ୍ପୃକ୍ତ ବ୍ୟକ୍ତିମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି କରି ଚାନ୍ଦିଲି ଥାନା ଯାଇଥିଲେ ଲୋକେ । ସେଠାରେ ପୋଲିସ ଗାଳିଗୁଲଜ କରିବା ସହିତ ଲାଠିଚାର୍ଜ କରିଥିବା ଅଭିଯୋଗ ହୋଇଛି । ନ୍ୟାୟ ଦାବିରେ ଦେବଦଳା ସମେତ ନିକଟସ୍ଥ ଅନ୍ୟ ଗାଁ ଲୋକମାନେ ମିଳିତ ଭାବେ ଜେକେପୁରରେ ରାସ୍ତାରୋକ କରିଛନ୍ତି । ୩୨୬ ନମ୍ବର ଜାତୀୟ ରାଜପଥ ଅବରୋଧ କରାଯାଇଛି । ଫଳରେ ଯାନବାହାନ ଚଳାଚଳ ବନ୍ଦ ରହିଛି ।