ରାୟଗଡା: କଲ୍ୟାଣସିଂହପୁର ବ୍ଲକର ୪ଟି ପଞ୍ଚାୟତରେ ହାତୀପଲଙ୍କ ଗତିବିଧି ବୃଦ୍ଧି ପାଇଛି । ପ୍ରାୟ ମାସେ ହେଲା ୩ଟିକିଆ ହାତୀପଲଙ୍କ ଗତିବିଧି ରହିଥିଲେ ସୁଦ୍ଧା ଏଯାଏଁ କ୍ଷୟକ୍ଷତି ଘଟାଇ ନାହାନ୍ତି | ତଥାପି ବନ ବିଭାଗ ପକ୍ଷରୁ ଏହାକୁ ନେଇ ସଚେତନ କରାଯାଇ ହାତୀଙ୍କୁ ଆକ୍ରମଣ ନକରିବା ପାଇଁ କୁହାଯାଇଛି । ଗତ ଗୁରୁବାର କଲ୍ୟାଣସିଂହପୁର-ରାୟଗଡ଼ା ମୁଖ୍ୟରାସ୍ତାର ଖସିଗୁଡା ଓ ପଡେଇକାନି ମଝିରେ ହାତୀପଲ ବୁଲୁଥିବା ସ୍ଥାନୀୟ ଏ. ବିଜୟ କୁମ୍ଭାର, ଶ୍ୟାମଧର ହିମିରିକା, କମେଶ୍ଵର ପିଡ଼ିସିକା ରୋହିଦାସ ପିଡ଼ିସିକା ଜଙ୍ଗଲ ବିଭାଗକୁ ଖବର ଦେଇଛନ୍ତି | ଏହି ହାତୀପଲକୁ ସ୍ଥାନୀୟ ଲୋକେ ଘଉଡ଼ାଇବାରୁ ଜଙ୍ଗଲ ଭିତରକୁ ଭିତରକୁ ଚାଲି ଯାଇଥିଲେ ।
ଖବର ପାଇବା ପରେ ବନ ବିଭାଗ କର୍ମଚାରୀ ମାନେ ଖସିଗୁଡ଼ା ଓ ପଡେଇକାନି ଗାଁରେ ପହଞ୍ଚି ଲୋକଙ୍କୁ ସଚେତନ କରିଥିଲେ ଏବଂ ହାତୀଙ୍କୁ ଆକ୍ରମଣ ନ କରିବାକୁ ପରାମର୍ଶ ଦେଇଥିଲେ | ନଚେତ୍ ହାତୀପଲ ଜଙ୍ଗଲକୁ ନ ଯାଇ ଗାଁ ମୁହାଁ ହେବା ସହ ଫସଲ ଓ ଘରଦ୍ଵାର ନଷ୍ଟ କରି ପାରନ୍ତି ବୋଲି ବନ ଅଧିକାରୀ ସୂଚନା ଦେଇଥିଲେ । ବନାଞ୍ଚଳ ଅଧିକାରୀ ଚନ୍ଦନ ଗମାଙ୍ଗ, ବନପାଳ ସହଦେବ ରାଉତ, ବନରକ୍ଷୀ ଅକ୍ଷୟ ମିଶ୍ର, ସୁବାସ ଶବରଙ୍କ ସମେତ ସ୍କ୍ୱାଡ୍ ପହଞ୍ଚି ଲୋକଙ୍କୁ ସଚେତନ କରିବା ସହିତ ହାତୀଙ୍କ ପିଛା କରି ପୁଣି ଜଙ୍ଗଲ ମଧ୍ୟକୁ ଘଉଡାଇବାକୁ ଚେଷ୍ଟା କରିଥିଲେ । ଏସମ୍ପର୍କରେ ରେଞ୍ଜର ଚନ୍ଦନ ଗମାଙ୍ଗ କହିଥିଲେ ଯେ ବର୍ତ୍ତମାନ ୩ଟି ହାତୀ ପୂଜାରୀଗୁଡା ବନାଞ୍ଚଳର ଲତଗୁଡା ଓ କାନ୍ଧ ପରିଡିଗୁଡା ପାହାଡ଼ ଉପରେ ରହିଛନ୍ତି । ସଂଧ୍ୟାରେ ଜଙ୍ଗଲକୁ ଚାଲିଯିବେ ।