ରାୟଗଡା: ଆଦିବାସୀ ଜନଜାତିଙ୍କ ଉନ୍ନତି ପାଇଁ ସରକାର ଅନେକ ଯୋଜନା କରିଛନ୍ତି । ହେଲେ ତାହା କେବଳ ଯୋଜନାରେ ରହିଛି । କେନ୍ଦ୍ର ଠାରୁ ଆରମ୍ଭ କରି ରାଜ୍ୟ ସରକାରଙ୍କ ପର୍ଯ୍ୟନ୍ତ ଆଦିମ ଜନଜାତିଙ୍କ ଉନ୍ନତି ପାଇଁ ଖର୍ଚ୍ଚ କରୁଛନ୍ତି କୋଟି କୋଟି ଟଙ୍କା । ହେଲେ ତାହା କାଗଜ କଲମରେ ଉନ୍ନୟନର ହିସାବ ସୀମିତ ରହୁଥିବା ବେଳେ ପ୍ରକୃତ ପକ୍ଷେ ଲୋକେ ସୁଫଳ ପାଉନଥିବା ଅଭିଯୋଗ ଆଣିଛନ୍ତି ରାୟଗଡା ଜିଲ୍ଲା କଲ୍ୟାଣସିଂହପୁର ଅଞ୍ଚଳର ସାନଡେଙ୍ଗିଲେଲି ଗାଁ ବସବାସ କରୁଥିବା ଆଦିମ ଜନଜାତି ଡ଼ଙ୍ଗରିଆ କନ୍ଧ ।
ଡଙ୍ଗରିଆଙ୍କ ଉନ୍ନତି କ୍ଷେତ୍ରରେ କାର୍ଯ୍ୟ କରୁଥିବା ରାଜ୍ୟ ସରକାରଙ୍କ OPELIP ସଂସ୍ଥା କୋଟି କୋଟି ଟଙ୍କା ହଡପ କରୁଥିବା ଅଭିଯୋଗ ଆଣିଛନ୍ତି ଡଙ୍ଗରିଆ । ଏନେଇ 12 ଖଣ୍ଡ ଗାଁର ପଞ୍ଚୟତ ଏକାଠି ହୋଇଛି । ଡଙ୍ଗରିଆଙ୍କ ଉନ୍ନତି ପାଇଁ ସରକାର ଡିଣ୍ଡିମ ପିଟୁଥିବା ବେଳେ ସେମାନଙ୍କ ପାଇଁ ଆସୁଥିବା କୋଟି କୋଟି ଟଙ୍କାକୁ କାଗଜ କଲମରେ ଉନ୍ନୟନ ମୂଳକ କାର୍ଯ୍ୟ ହେଉଥିବା ଦର୍ଶାଇ ହରିଲୁଟ କରୁଥିବା ଅଭିଯୋଗ ହୋଇଛି । ଖାଲି ସେତିକି ନୁହେଁ OPELIP ସଂସ୍ଥା ନିୟମଗିରି ଅଞ୍ଚଳରେ ବସବାସ କରୁଥିବା ଡଙ୍ଗରିଆ କନ୍ଧ ଏବଂ ହରିଜନଙ୍କ ମଧ୍ୟରେ ବିଭେଦ ସୃଷ୍ଟି କରୁଛି । ଯଦି OPELIP ସଂସ୍ଥା ପ୍ରକୃତରେ ନିୟମଗିରୀରେ ବସବାସ କରୁଥିବା ଅଧିବାସୀଙ୍କ ଉନ୍ନୟନ ଉଦ୍ଦେଶ୍ୟରେ କାର୍ଯ୍ୟ କରୁଛି ତେବେ ଉଭୟଙ୍କୁ ସହଯୋଗ କରୁ ବୋଲି ଦାବି କରିଛନ୍ତି । ପାତର ଅନ୍ତର ମାନଭାଵ ରଖି କାର୍ଯ୍ୟ କଲେ OPELIP କୁ ଏଠାରୁ ହଟାଇ ଦିଆଯିବ ବୋଲି ଚେତାବନୀ ଦେଇଛି ନିୟମଗିରି ସୁରକ୍ଷା ସମିତି ।