ରାୟଗଡା: ମହାମାରୀ କୋରୋନାର ମୁକାବିଲା ପାଇଁ ରାୟଗଡା ଜିଲ୍ଲା ପ୍ରଶାସନ ତତ୍ପର। ଜିଲ୍ଲାର 6ଟି ସ୍ଥାନରେ 500 ଶଯ୍ୟା ବିଶିଷ୍ଟ କୋଭିଡ୍ ହସ୍ପିଟାଲ କରିବାକୁ ଚାଲିଛି ଯୋଜନା । ହେଲେ ଏସବୁ ଭିତରେ ଚିନ୍ତା ବଢାଉଛି ଜିଲ୍ଲାର ଆମ୍ବୁଲାନ୍ସ ସେବା । ବର୍ଷ ବର୍ଷ ଧରି କେଉଁଠି ରୋଗୀ ଖଟିଆରେ ବୁହାହୋଇ ଡାକ୍ତରଖାନା ଯାଉଥିବାର ଦୃଶ୍ୟ ସାମ୍ନାକୁ ଆସୁଛି ତ ଆଉ କେଉଁଠି ଆମ୍ବୁଲାନ୍ସ ନଆସିବାରୁ ରାସ୍ତାରେ ଗର୍ଭବତୀ ପ୍ରସବ କରୁଥିବା ଦେଖିବାକୁ ମିଳୁଛି । ଏସବୁ ଦୃଶ୍ୟ ଏପର୍ଯ୍ୟନ୍ତ ବଦଳିନଥିବାବେଳେ କୋରୋନା ମୁକାବିଲାରେ ଆମ୍ବୁଲାନ୍ସର ଭୂମିକା କିପରି ରହିବ ତାକୁ ନେଇ ଚିନ୍ତା ବଢିଛି ।
ଭୌଗଳିକ ଚିତ୍ର ଅନୁଯାୟୀ, 7073 ବର୍ଗ କିଲୋମିଟର ଅଞ୍ଚଳରେ ଗଢି ଉଠିଛି ରାୟଗଡା ଜିଲ୍ଲା । ଦୁଇଟି ସବଡିଭିଜନର 11ଟି ବ୍ଲକ, ଦୁଇଟି ମୁନିସିପାଲଟି ଏବଂ ଗୋଟିଏ ଏନଏସିକୁ ନେଇ ଏହି ଜିଲ୍ଲା ଗଠିତ । ପାଖାପାଖି 2667ଟି ଛୋଟବଡ ଗାଁ ଥିବା ଏହି ଜିଲ୍ଲାର 2011 ଜନଗଣନା ଅନୁସାରେ 9 ଲକ୍ଷ 68 ହଜାର ଜନସଂଖ୍ୟା ଥିବାବେଳେ ଏବେ 11 ଲକ୍ଷ ଟପିଥିବା କୁହାଯାଉଛି । ହେଲେ ଏତେ ସଂଖ୍ୟକ ଲୋକଙ୍କ ପାଇଁ ଜିଲ୍ଲାରେ ରହିଛି ମାତ୍ର 36ଟି ଆମ୍ବୁଲାନ୍ସ ।