ମୋବାଇଲ ପାଇଁ ଭାଇ ନେଲା ଭାଇର ଜୀବନ

ମୋବାଇଲ ପାଇଁ ଫିକା ପଡିଲା ରକ୍ତ ସମ୍ପର୍କ । ବଡ ଭାଇର ଠେଙ୍ଗା ମାଡରେ ସାନ ଭାଇର ମୃତ୍ୟୁ । ଏଭଳି ଦୁଃଖଦ ଘଟଣା ଘଟିଛି ରାୟଗଡା ଜିଲ୍ଲାରେ ।

ରାୟଗଡା: ମୋବାଇଲ ପାଇଁ ବଡ ଭାଇ ନେଲା ସାନଭାଇର ଜୀବନ । ବଡ ଭାଇର ଠେଙ୍ଗା ମାଡରେ ସାନ ଭାଇ ମୃତ୍ୟୁ ହୋଇଛି । ଏଭଳି ଅଭାବନୀୟ ହତ୍ୟାକାଣ୍ଡ ଘଟିଛି ରାୟଗଡା ଜିଲ୍ଲା କାଶିପୁର ଥାନା ଅନ୍ତର୍ଗତ ପଣସଗୁଡା ଗ୍ରାମରେ ।

ମୋବାଇଲ ବ୍ୟବହାରକୁ ନେଇ ଦୁଇ ଭାଇଙ୍କ ମଧ୍ୟରେ କଥା କଟାକଟି ହେବା ପରେ ବଡ ଭାଇ ପିଣ୍ଟୁ ମାଝୀ ରାଗିଯାଇ ସାନ ଭାଇ ପପୁ ମାଝୀକୁ ଠେଙ୍ଗାରେ ଆକ୍ରମଣ କରିଥିଲା । ଫଳରେ ପପୁର ମୁଣ୍ଡରେ ଗଭୀର ଆଘାତ ଲାଗି ଘଟଣାସ୍ଥଳରେ ହିଁ ମୃତ୍ୟୁ ହୋଇଥିଲା । ଗତକିଛି ଦିନ ତଳେ ଦୁଇ ଭାଇ ତେଲେଙ୍ଗାନା ରାଜ୍ୟରୁ ଫେରିବା ସହ କାଶିପୁର ବ୍ଲକର ଏକ ହୋମ କ୍ବାରେଣ୍ଟାଇନରେ ରହିଥିଲେ ।

ହେଲେ ଆଜି ହଠାତ୍ ମୋବାଇଲ ବ୍ୟବହାରକୁ ନେଇ ଦୁହିଁଙ୍କ ମଧ୍ୟରେ ଝଗଡା ହୋଇଥିଲା । ତେବେ ହତ୍ୟାକାଣ୍ଡ ପରେ ଘଟଣାସ୍ଥଳରେ କାଶିପୁର ପୁଲିସ ପହଞ୍ଚି ତଦନ୍ତ ଆରମ୍ଭ କରିବା ସହ ଅଭିଯୁକ୍ତ ପିଣ୍ଟୁ ମାଝୀକୁ ଥାନାରେ ଅଟକ ରଖି ପଚରାଉଚରା କରୁଛି । ଏନେଇ ପୋଲିସର ପ୍ରତିକ୍ରିୟା ମିଳିପାରି ନାହିଁ ।

ରାୟଗଡାରୁ ରଞ୍ଜନ ରଥ, ଇଟିଭି ଭାରତ