ରାୟଗଡା: ଏଠି ପିଇବା ପାଣି ମୁନ୍ଦିଏ ପାଇଁ ବାଜିରେ ଲାଗୁଛି ଜୀବନ । ପାଖରେ ପାଣି ସୁବିଧା ନ ଥିବାରୁ ଜାତୀୟ ରାଜପଥ ପାର ହୋଇ ପାଣି ଆଣିବାକୁ ଯିବାକୁ ପଡୁଛି । ଏ ହେଉଛି ରାୟଗଡା ଜିଲ୍ଲା ରମାନଗୁଡା ବ୍ଲକ ଗୁମୁଡ଼ା ତାରିଣୀ ମନ୍ଦିର ବସ୍ତିର ଚିତ୍ର । ପ୍ରାୟ 30ରୁ ଉର୍ଦ୍ଧ୍ବ ପରିବାର ଏଠାରେ ବସବାସ କରୁଥିବା ବେଳେ ରହିଛି ଗୋଟିଏ ମାତ୍ର ବ୍ୟବହାର ଅନୁପଯୁକ୍ତ ନଳକୂପ । ଏହି ନଳକୂପ ପାଣିରେ ଲୁହା ଗୁଣ୍ଡ ଓ ତେଲିଆ ଅଂଶ ବାହାରୁ ଥିବାରୁ ଏହି ପାଣି ପିଇବା ସ୍ବାସ୍ଥ୍ୟ ପକ୍ଷେ ଅହିତକର ।
ପାଣି ପାଇଁ ବାଜିରେ ଲାଗିଛି ଜୀବନ, ଫେଲ ମାରିଛି ବସୁଧା ଯୋଜନା ସେପଟେ ବସ୍ତିଠାରୁ 500 ମିଟର ଦୂରରେ 326 ନଂ ରାଜପଥ ପାର୍ଶ୍ଵରେ ରହିଛି ଗୋଟିଏ ଷ୍ଟାଣ୍ଡ ପୋଷ୍ଟ । ଉପାୟ ନପାଇ ବାଧ୍ୟ ହୋଇ ଜାତୀୟ ରାଜପଥ ପାରି ହୋଇ ପାଣି ଆଣିବାକୁ ପଡୁଛି ବସ୍ତି ବାସିନ୍ଦାଙ୍କୁ । ବେଳେବେଳେ ରାଜପଥ ଉପରେ ଦୁର୍ଘଟଣାର ଶିକାର ହେଉଥିବା ମଧ୍ୟ ଦେଖାଯାଉଛି । ଜନସ୍ବାସ୍ଥ୍ୟ ବିଭାଗ ପକ୍ଷରୁ ସପ୍ଲାଇ ୱାଟର ଗ୍ରାମର ଅନ୍ୟ ଅଞ୍ଚଳକୁ ଦିଆଯାଇଥିବା ବେଳେ ଏହି ଅଞ୍ଚଳକୁ ଦିଆଯାଇ ନାହିଁ । ଏନେଇ ସ୍ଥାନୀୟ ସରପଞ୍ଚଙ୍କଠାରୁ ଆରମ୍ଭ କରି ବିଧାୟକ ପର୍ଯ୍ୟନ୍ତ ଗୁହାରି କଲେ ମଧ୍ୟ ସମସ୍ୟାର ସମାଧାନ ହୋଇ ପାରୁନାହିଁ ।
ରାୟଗଡାରୁ ରଞ୍ଜନ ରଥ, ଇଟିଭି ଭାରତ
