ରାୟଗଡ଼ା:ଜିଲ୍ଲାରେ ଦିବାଲୋକରେ ଚାଲିଛି ବେଆଇନ କାର୍ଯ୍ୟ । ବାଲି ମାଫିଆମାନେ ନିର୍ଭୟରେ ପଡୋଶୀ ରାଜ୍ୟ ଆନ୍ଧ୍ରକୁ ବାଲି ଚୋରା ଚାଲାଣ କରୁଥିବା ସ୍ଥାନୀୟ ଅଧିବାସୀ ଅଭିଯୋଗ ଆଣିଛନ୍ତି । ଏପଟେ ଚୋରା ବାଲି ଚାଲାଣ ସାଙ୍ଗକୁ ସୂକ୍ଷ୍ମ ସମ୍ପଦ ସୁରକ୍ଷିତ ରଖିବା ଲାଗି ଜିଲ୍ଲା ପ୍ରଶାସନ କୌଣସି ଆଖିଦୃଶିଆ ପଦକ୍ଷେପ ନେଇପାରୁନଥିବା ମନେ ହେଉଛି । ଏନେଇ ଗତ ଦିନରେ ବିଭିନ୍ନ ସଂଗଠନ ପକ୍ଷରୁ ରାୟଗଡା ତହସିଲ କାର୍ଯ୍ୟାଳୟ ସମ୍ମୁଖରେ ପ୍ରତୀକ ଅନଶନ, ଧାରଣା ଓ ବିକ୍ଷୋଭ ପ୍ରଦର୍ଶନ କରାଯାଇଥିଲେ ମଧ୍ୟ ଆନ୍ଧ୍ରକୁ ବାଲି ଚୋରା ଚାଲାଣ ଦିଗରେ ନିୟନ୍ତ୍ରଣ ଆସୁନାହିଁ ।
ମାଫିଆଙ୍କ ଦାଉରୁ ଜିଲ୍ଲାର ଖଣିଜ ଦ୍ରବ୍ୟ ବଞ୍ଚାଇବାକୁ ଧୀରେ ଧୀରେ ସାଧାରଣ ଜନତାଙ୍କ ମଧ୍ୟରେ ଆନ୍ଦୋଳନର ଦାନା ବାନ୍ଧିବାରେ ଲାଗିଛି । ସେପଟେ ଖଣିଜ ସମ୍ପଦର ସୁରକ୍ଷା ଓ ପଡୋଶୀ ଜିଲ୍ଲା ଆନ୍ଧ୍ରପ୍ରଦେଶକୁ ବାଲି ଚାଲାଣ ରୋକିବା ପାଇଁ ବାରମ୍ବାର ଆନ୍ତଃ ରାଜ୍ୟ ଉଚ୍ଚସ୍ତରୀୟ ଆଲୋଚନା ହେଉଥିବା ବେଳେ ଫଳ କିନ୍ତୁ ଶୂନ ହୋଇଛି । ଏନେଇ ବିଭିନ୍ନ ସଂଗଠନ ପକ୍ଷରୁ ରାୟଗଡା ଜିଲ୍ଲା ଓ ବାହାରୁ କେଉଁ ଲିଜ୍ଧାରୀ ଲିଜ ପାଇଛନ୍ତି ତାହା ପଞ୍ଚାୟତ ସ୍ତରରେ ସର୍ବସାଧାରଣ କରାୟାଉ, ଲିଜଧାରୀଙ୍କ ନାମଫଳକ ବାଲି ବନ୍ଧରେ ଲେଖାଯାଉ, ମାସିକ ଓ ବାର୍ଷିକ କେତେ ସି.ଏମ ବାଲି ଉଠାଯିବ ତାହା ନିର୍ଦ୍ଧାରଣ କରାଯାଉ, ବାଲି ବନ୍ଧର ସ୍ଥାନ ଓ ଏରିଆ ନିର୍ଦ୍ଧାରଣ କରାଯାଇ ସଠିକ ଜାଗା ଚିହ୍ନଟ କରାଯିବା ଲାଗି ଦାବି ହୋଇଛି ।
ଏହା ବି ପଢନ୍ତୁ- ଶେଷ ହେଲା ଟ୍ରକ ୟୁନିଅନ ନିର୍ବାଚନ, ସଭାପତି ହେଲେ ୟେଲ୍ଲା କୋଣ୍ଡାବାବୁ