ରାୟଗଡ଼ା: ହୁତୁହୁତୁ ହୋଇ ଜଳୁଛି ଜଙ୍ଗଲ । ଜଙ୍ଗଲ ଜଳିବା ନେଇ ରାଜ୍ୟ ସରକାରଙ୍କ ଚିନ୍ତା ବଢାଇଥିଲା । ତେବେ ଧୀରେ ଧୀରେ ଏବେ ନିଆଁ ନିୟନ୍ତ୍ରଣକୁ ଆସିଥିବା କହିଛନ୍ତି ରାୟଗଡା ବନଖଣ୍ଡ ଅଧିକାରୀ ।
ରାୟଗଡା ଜିଲ୍ଲାରେ ୧୭୨୧ ସ୍ଥାନରେ ଜଙ୍ଗଲ ନିଆଁ, ଲିଭିଲାଣି ୧୧୫୨ ଜଙ୍ଗଲ ନିଆଁ
ରାୟଗଡା ଜିଲ୍ଲାରେ ଆଦିବାସୀ ସମ୍ପ୍ରଦାୟ ଲୋକଙ୍କ ପାରମ୍ପରିକ କୃଷି ପଦ୍ଧତି ପୋଡୁ ଚାଷ ପାଇଁ ଜଙ୍ଗଲରେ ନିଆଁ ଲଗାଉଛନ୍ତି । ଯାହା ଫଳରେ ପାଉଁଶ ହେଉଛି ସଂରକ୍ଷିତ ବନଖଣ୍ଡର ସହସ୍ରାଧିକ ହେକ୍ଟର ଜଙ୍ଗଲ । ସଚେତନତା ଅଭାବ ଯୋଗୁଁ ବନଖଣ୍ଡ ନିକଟସ୍ଥ ବାସିନ୍ଦା ଜଙ୍ଗଲରେ ଲଗାଉଛନ୍ତି ନିଆଁ । କେତେ ବେଳେ ମହୁଲ ସଂଗ୍ରହ କରିବା ନିମନ୍ତେ ତ ଆଉ କେତେବେଳେ ଜଙ୍ଗଲରୁ କାଠ କୋଇଲା ଆଦି ଆଣି ବଜାରରେ ବିକ୍ରୟ କରି ପରିବାର ପ୍ରତିପୋଷଣ ନିମିତ୍ତ ନିଆଁ ଲଗାଉଛନ୍ତି । ଜିଲ୍ଲାର ମୁନିଗୁଡ଼ାରୁ ଗୁଡାରି, କାଶୀପୁରରୁ କଲ୍ୟାଣସିଂହପୁର ସବୁ ସଂରକ୍ଷିତ ଜଙ୍ଗଲରେ ଲାଗିଛି ନିଆଁ । ଗତ ଏକ ମାସ ଭିତରେ ଜିଲ୍ଲାର ୧୭୨୧ ପଏଣ୍ଟରେ ନିଆଁ ଲାଗିଥିବା କଥାକୁ ସ୍ଵୀକାର କରିଛନ୍ତି ରାୟଗଡା ଡିଏଫଓ ଅଶ୍ଵିନୀ କୁମାର କର।