ପୁରୀରେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ

ଓଡିଶାରେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ । ପ୍ରଭୁ ଜଗନ୍ନାଥଙ୍କ ଦର୍ଶନ ପାଇଁ ସେ ପୁରୀରେ ପହଞ୍ଚିଛନ୍ତି ।

ପୁରୀ: ଓଡିଶାରେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ । ପ୍ରଭୁ ଜଗନ୍ନାଥଙ୍କ ଦର୍ଶନ ପାଇଁ ସେ ପୁରୀରେ ପହଞ୍ଚିଛନ୍ତି । ଏନେଇ ବରିଷ୍ଠ ସେବାୟତ ରାମକୃଷ୍ଣ ଦାସ ମହାପାତ୍ର ସୂଚନା ଦେଇଛନ୍ତି । ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ଜଗନ୍ନାଥଙ୍କର ଜଣେ ବଡ ଭକ୍ତ । ସେ ଏକାଧିକବାର ପୁରୀ ଆସି ଜଗନ୍ନାଥଙ୍କ ଆଶିଷ ଭିକ୍ଷା କରିଛନ୍ତି ।

ଏପରିକି ଗତ ପଶ୍ଚିମବଙ୍ଗ ବିଧାନସଭା ନିର୍ବାଚନରେ ତାଙ୍କର ବିଜୟର ଶ୍ରେୟ ସେ ମହାପ୍ରଭୁ ଜଗନ୍ନାଥଙ୍କ କୃପା ବୋଲି କହିଥିଲେ । ଚଳିତ ବର୍ଷ ଶେଷ ଆଡକୁ ପଶ୍ଚିମବଙ୍ଗ ବିଧାନସଭା ନିର୍ବାଚନ ହେବା ନେଇ ସମ୍ଭାବନା ରହିଛି । ଏମିତିି ସ୍ଥିତିରେ ମମତାଙ୍କ ଜଗନ୍ନାଥ ଦର୍ଶନ ଅନେକ ଗୁରୁତ୍ବ ବହନ କରୁଥିବା କୁହାଯାଉଛି ।

ବୁଧବାର ସକାଳେ ଶ୍ରୀମନ୍ଦିର ଯାଇ ମହାପ୍ରଭୁଙ୍କ ଦର୍ଶନ କରିବା ସହ ପୂଜାର୍ଚ୍ଚନା କରିବାର କାର୍ଯ୍ୟକ୍ରମ ରହିଛି । ଏହାପରେ ସେ କୋଲକାତା ଫେରିଯିବେ । ଭୁବନେଶ୍ବରରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଭେଟିବା କିମ୍ବା ଅନ୍ୟ କାର୍ଯ୍ୟକ୍ରମ ନେଇ କୌଣସି ସୂଚନା ମିଳିନାହିଁ ।

ସନ୍ଧ୍ୟାରେ ପହଞ୍ଚି ସମୁଦ୍ର କୂଳରେ ଏକ ହୋଟେଲରେ ରାତ୍ରୀଯାପନ କରିଛନ୍ତି ମମତା । ଅନ୍ୟପଟେ ସୁରକ୍ଷା ଦୃଷ୍ଟିରୁ ହୋଟେଲ ଆଖପାଖରେ କଡା ନିରାପତ୍ତା ବ୍ୟବସ୍ଥା ଗ୍ରହଣ କରାଯାଇଛି ।

ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ