ପୁରୀ : ପୁରୀ ଜିଲ୍ଲା ଗୋପ ବ୍ଲକ ବିଡିଓ ଦୀପ୍ତିରାଣୀ ଦାସଙ୍କ ଅଡିଓ ଓ ଭିଡିକୁ ନେଇ ଏବେ ସବୁଠି ଚର୍ଚ୍ଚା । ଅଡିଓରେ ନିଜକୁ ବିଜେଡି କର୍ମୀ କହିବା ସହ ଭିଡିଓରେ ଲୋକଙ୍କୁ ଇଂରାଜୀ ଭାଷାରେ ଗେଟ୍ ଆଉଟ୍ କହି ହରଡ଼ଘଣାରେ ଦୀପ୍ତିରାଣୀ । ସ୍ଥାନୀୟ ବାସିନ୍ଦା ନିଜ ଦୁଃଖ ଜଣାଇବାକୁ ବିଡିଓ ମହାଶୟାଙ୍କ ପାଖକୁ ଯାଇଥିବା ବେଳେ ବିଡିଓ ତାଙ୍କ କଥା ନ ଶୁଣି ଫେରାଇ ଦେଇଥିଲେ । ଏହି ଘଟଣାକୁ ତୀବ୍ର ନିନ୍ଦା ଓ ସମାଲୋଚନା କରି ଭାରତୀୟ ଜନତା ପାର୍ଟି ଏକ ସାମ୍ବାଦିକ ସମ୍ମିଳନୀ କରିଛି ।
ଅନୁଷ୍ଠିତ ସାମ୍ବାଦିକ ସମ୍ମିଳନୀରେ ପୁରୀ ଜିଲ୍ଲା ଭାରତୀୟ ଜନତା ପାର୍ଟି ସଭାପତି ଆଶ୍ରିତ ପଟ୍ଟନାୟକ, ବିଧାୟକ ଜୟନ୍ତ ଷଡ଼ଙ୍ଗୀ, ବ୍ରହ୍ମଗିରି ବିଧାୟକ ଲଳିତେନ୍ଦୁ ବିଦ୍ୟାଧର ମହାପାତ୍ର ଓ ରାଜ୍ୟ ବିଜେପି ଉପସଭାପତି ପ୍ରଭାତୀ ପରିଡା ଉପସ୍ଥିତ ଥିଲେ । ତେଵେ ଗୋପ ବିଡିଓଙ୍କ ଅଶାଳୀନ ବ୍ୟବହାର ପ୍ରଦର୍ଶନ ଓ ବିଜେଡି ସପକ୍ଷରେ ବାର୍ତ୍ତା ରଖିବା ଘଟଣାକୁ ଦଳ ନିନ୍ଦା କରିବା ସହ ଆସନ୍ତା ୭୨ ଘଣ୍ଟା ଭିତରେ ଯଦି ରାଜ୍ୟ ସରକାର ବିଡିଓ ମହାଶୟାଙ୍କୁ କାର୍ଯ୍ୟରୁ ଅପସାରଣ ନକରନ୍ତି ତେବେ ବ୍ଲକର ୩୧ ଗୋଟି ପଞ୍ଚାୟତରେ ଆନ୍ଦୋଳନକୁ ବ୍ୟାପକ କରାଯିବ ବୋଲି ସାମ୍ବାଦିକ ସମ୍ମିଳନୀରେ ଦଳ ଚେତାବନୀ ଦେଇଛି ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
