ପୁରୀ: ସାଂସ୍କୃତିକ ମହାକୁମ୍ଭ ତଥା ଶ୍ରୀକ୍ଷେତ୍ରର ସଂସ୍କୃତି ଓ ପାରମ୍ପରିକ ସମରକଳାର ପ୍ରତୀକ ହେଉଛି ସାହିଯାତ ବା ସାହିଯାତ୍ରା । ଏହି ଯାତ୍ରାରେ ପ୍ରଭୁ ଶ୍ରୀରାମଙ୍କ କଥା ବସ୍ତୁ ପରିବେଷଣ ହୋଇଥାଏ । ମହାପ୍ରଭୁଙ୍କ ଶ୍ରୀରାମ ଲୀଳାର ମହତ୍ତ୍ବପୂର୍ଣ୍ଣ ଅଂଶ ହେଉଛି ସାହିଯାତ । ତେବେ ଗତକାଲି ସେତୁବନ୍ଧ ନୀତି ସମ୍ପନ୍ନ ହେବା ପରେ ବାଲିସାହି ପକ୍ଷରୁ ଆଜି(ରବିବାର) ରାବଣ ବଧ ନୀତି ଅନୁଷ୍ଠିତ ହୋଇଛି । ଶ୍ରୀକ୍ଷେତ୍ରରେ ରାମ ନବମୀଠାରୁ ଆରମ୍ଭ ହୋଇଥିବା ଏହି ପାରମ୍ପରିକ ଯାତ୍ରା ଆସନ୍ତା ଏପ୍ରିଲ ୧୫ ତାରିଖ ଯାଏଁ ଚାଲିବ । ଆସନ୍ତା ୧୫ ତାରିଖରେ ସାହିଯାତ୍ରାର ଶେଷ ପର୍ବ ରାମାଭିଷେକ ଉତ୍ସବ ଗୌଡବାଡ ସାହି ପକ୍ଷରୁ ଅନୁଷ୍ଠିତ ହେବ । ସାହିଯାତର ପ୍ରଥମ ଦିବସରୁ ପ୍ରଭୁ ଶ୍ରୀରାମଙ୍କ ବିଭିନ୍ନ ଲୀଳା ପ୍ରଦର୍ଶନ ହେଉଛି ।
ହିଞ୍ଜଳ ଯାଗା ପକ୍ଷରୁ ବଳଭଦ୍ର ମହାସୁଆର ଆଜି ସକାଳେ ରାବଣ ବନ୍ଧାଇ ସାହି ଭ୍ରମଣ କରିଥିଲେ । ଏହାପରେ ଶ୍ରୀମନ୍ଦିର ଯାଇ ମହାପ୍ରଭୁଙ୍କ ଆଜ୍ଞାମାଳ ଆଣିଥିଲେ । ମନମୋହନ ମହାସୁଆର ରାବଣ ଚରିତ୍ରରେ ଅବତୀର୍ଣ୍ଣ ହୋଇଥିଲେ । ରାବଣଙ୍କ ସହ ରାକ୍ଷସ ସେନା ହରଚଣ୍ଡୀ ସାହି ଭ୍ରମଣ ପରେ ଗୌଡ଼ବାଡ ସାହିସ୍ଥିତ ଯମେଶ୍ବରଙ୍କ ମନ୍ଦିରରେ ଥିବା ନିକୁମ୍ବିଲା ବଟମୂଳେ ରାବଣ ଯଜ୍ଞ କରିଥିଲେ । ଶ୍ରୀମନ୍ଦିର ଭଗବତୀ କୋଟରେ ସ୍ବର୍ଗକୁ ନିଶୁଣି ଓ ଶକ୍ତି ପ୍ରାପ୍ତ ହୋଇଥିଲେ । ସେପଟେ ଶ୍ରୀରାମ ଓ ଲକ୍ଷ୍ମଣ ପଟୁଆରରେ ଯାଇ ଜଗନ୍ନାଥବଲ୍ଲଭ ମଠରେ ବିଜେ ହୋଇଥିଲେ । ସେଠାରେ ଶ୍ରୀରାମଙ୍କ ସହିତ ଯୁଦ୍ଧ ବେଳେ ରାବଣ ବଧ ହୋଇଥିଲା ।