ପୁରୀ: ଚଳିତ ବର୍ଷ ବିନା ଭକ୍ତଙ୍କ ଉପସ୍ଥିତିରେ ହେବ ମହାପ୍ରଭୁଙ୍କ ରଥଯାତ୍ରା। ଏଥିପାଇଁ ଶ୍ରୀମନ୍ଦିର ପ୍ରଶାସନ ପ୍ରସ୍ତୁତି ଆରମ୍ଭ କରି ଦେଇଛି। ତେବେ କେବଳ ସରକାରଙ୍କ ଆନୁଷ୍ଠାନିକ ଘୋଷଣାକୁ ଅପେକ୍ଷା ଥିବା ଶ୍ରୀମନ୍ଦିର ଉନ୍ନୟନ ପ୍ରଶାସକ ଅଜୟ କୁମାର ଜେନା କହିଛନ୍ତି ।
ଶ୍ରୀକ୍ଷେତ୍ରରେ ଜମିବନି ଭକ୍ତଙ୍କ ଭିଡ଼, ବିନା ଭକ୍ତରେ ହେବ ରଥଯାତ୍ରା ! କୋରୋନାରେ ପ୍ରଭାବିତ ହୋଇଛି ସାରା ବିଶ୍ବ । ଆକ୍ରାନ୍ତ ଓ ମୃତକଙ୍କ ସଂଖ୍ୟା ବୃଦ୍ଧି ପାଇବାରେ ଲାଗିଛି । ଏମିତି ସମୟରେ ସରକାର ସାମାଜିକ ଦୂରତ୍ବ ତଥା ଭିଡ଼ ନିୟନ୍ତ୍ରଣ ଉପରେ ଅଧିକ ଗୁରୁତ୍ବ ଦେଉଛନ୍ତି । ତେବେ ମହାପ୍ରଭୁ ଜଗନ୍ନାଥ ଯିଏ ଭକ୍ତଙ୍କ ଭକ୍ତିରେ ବନ୍ଧା, ଭକ୍ତଙ୍କ ବିନା ଯିଏ ଅଧା ତାଙ୍କର ରଥଯାତ୍ରା ମଧ୍ୟ ଏଥର ଜନଶୂନ୍ୟ ହେବ ।
ସରକାରଙ୍କ ନିର୍ଦ୍ଦେଶ ଆସିଲେ ବିନା ଭକ୍ତରେ ରଥଯାତ୍ରା ହେବା ନେଇ ଆନୁଷ୍ଠାନିକ ଘୋଷଣା ହେବ। ଏଥିପାଇଁ ସମସ୍ତ ପ୍ରସ୍ତୁତି ଶେଷ ହୋଇଛି । ଅନ୍ୟପଟେ କୋଭିଡ-19 କଟକଣା ପାଇଁ ସୀମିତ ସେବକମାନେ ଏଥର ରଥଯାତ୍ରାରେ ସାମିଲ ହେବେ। ସେହିପରି ତିନି ରଥକୁ ସେବାୟତ ମାନେ ଟାଣିବା ନେଇ ନିଷ୍ପତ୍ତି ହୋଇଛି। ଅନ୍ୟପଟେ କୋଭିଡ ଗାଇଡ଼ ଲାଇନ ଅନୁଯାୟୀ ରଥଯାତ୍ରାରେ ସାମିଲ ସମସ୍ତ ସେବାୟତ ମାସ୍କ ବ୍ୟବହାର କରିବେ। । କୋରୋନା ସଂକ୍ରମଣରୁ ବର୍ତ୍ତିବା ପାଇଁ ଶ୍ରୀମନ୍ଦିର ସେବାୟତଙ୍କୁ ମାସ୍କ ବଣ୍ଟନ କରିବ ଶ୍ରୀମନ୍ଦିର ପ୍ରଶାସନ । ଏ ନେଇ ମାସ୍କ ତିଆରି ପାଇଁ ବୟନିକାକୁ ଅର୍ଡର ଦିଆଯାଇଛି ।
ସେବାୟତଙ୍କ ସୁରକ୍ଷା ପାଇଁ ଶ୍ରୀମନ୍ଦିର ପ୍ରଶାସନ ସମସ୍ତ ସେବାୟତଙ୍କୁ ମାସ୍କ ଯୋଗାଇ ଦେବାପାଇଁ ସ୍ଥିର କରିଛନ୍ତି । ଏଥିପାଇଁ ବୟନିକାକୁ ୫ହଜାର ମାସ୍କ ଯୋଗାଇ ଦେବାକୁ ଅନୁରୋଧ କରାଯାଇଛି। ଶ୍ରୀମନ୍ଦିର ପ୍ରଶାସନର ଅନୁରୋଧ ପରେ ଶନିବାର ଠାରୁ ବୟନିକା ପକ୍ଷରୁ ମାସ୍କ ପ୍ରସ୍ତୁତି ଆରମ୍ଭ ହୋଇଛି। ତିନି ରଥର ରଙ୍ଗକୁ ଆଧାର କରି ନାଲି-ହଳଦିଆ, କଳା-ନାଲି, ସବୁଜ-ନାଲି ରଙ୍ଗରେ ମାସ୍କ ପ୍ରସ୍ତୁତ କରାଯିବ ବୋଲି ବୟନିକା ପକ୍ଷରୁ କୁହାଯାଇଛି । ଏହି ମାସ୍କ ସବୁ ବାନ୍ଧ ବସ୍ତ୍ରରେ ପ୍ରସ୍ତୁତ ହେବ ଓ ଯଥା ଶୀଘ୍ର ପ୍ରଦାନ କରାଯିବ ବୋଲି ବୟନିକା ପକ୍ଷରୁ କୁହାଯାଇଛି । ତିନି ରଥର କପଡା ରଙ୍ଗ ଅନୁଯାୟୀ ମାସ୍କ ପ୍ରସ୍ତୁତ ହେବ। ପ୍ରତ୍ୟେକ ରଥରେ ନିୟୋଜିତ ସେବାୟତଙ୍କୁ ଉକ୍ତ ରଥର ରଙ୍ଗ ଅନୁଯାୟୀ ମାସ୍କ ଯୋଗାଇ ଦିଆଯିବ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
