ଲୋକନାଥ ପୀଠ ଜଳମଗ୍ନ

ପ୍ରସିଦ୍ଧ ଶୈବପୀଠ ଲୋକନାଥଙ୍କ ମନ୍ଦିର ପରିସରରେ ପାଣି ଜମି ରହିଥିବାର ଦେଖିବାକୁ ମିଳିଛି। ଏହାକୁ ନେଇ ଭକ୍ତଙ୍କ ମଧ୍ୟରେ ଅସନ୍ତୋଷ ଦେଖିବାକୁ ମିଳିଥିଲା ।

ପୁରୀ: ବର୍ଷା ଯୋଗୁଁ ଲୋକନାଥଙ୍କ ପୀଠରେ ପାଣି ଜମି ରହିଥିବା ଦେଖିବାକୁ ମିଳିଛି । ସୋମବାର ଅବସରରେ ସକାଳୁ ମନ୍ଦିରରେ ପ୍ରବଳ ଭିଡ ହୋଇଥିଲା । ହେଲେ ମନ୍ଦିର ପରିସରରେ ପାଣି ଜମି ରହିଥିବାରୁ ଭକ୍ତ ଅସନ୍ତୋଷ ପ୍ରକାଶ କରିଛନ୍ତି । ତେବେ ଆଜି ବିଳମ୍ବରେ ମନ୍ଦିର ପ୍ରଶାସନ ପକ୍ଷରୁ ପମ୍ପ ଯୋଗେ ଜଳ ନିଷ୍କାସନ କରାଯାଇଛି।

ଗତ ଦୁଇଦିନ ଧରି ଲଘୁଚାପ ବର୍ଷାରେ ମନ୍ଦିର ପରିସର ଜଳମଗ୍ନ ହୋଇ ପଡ଼ିଥିଲା। ହେଲେ ଦୁଇ ଦିନ ପୂର୍ବରୁ ପାଣି ଜମି ରହିଥିଲେ ହେଁ ପ୍ରଶାସନ ପକ୍ଷରୁ ଜଳ ନିଷ୍କାସନର ବ୍ୟବସ୍ଥା କରାଯାଇ ନଥିଲା । ଏକ ପ୍ରସିଦ୍ଧ ଶୈବପୀଠର ଏପରି ଅବ୍ୟବସ୍ଥାକୁ ନେଇ ଭକ୍ତଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଥିଲା।

ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ