ବ୍ରହ୍ମଗିରି: ପାଣି ପାଇପକୁ ନେଇ 2 ପରିବାର ମଧ୍ୟରେ ଗୋଷ୍ଠୀ ସଂଘର୍ଷ । ପୁରୀ ବ୍ରହ୍ମଗିରି ଥାନା ଅନ୍ତର୍ଗତ ଡିମିରିଶେଣା ଗ୍ରାମ ହରିଜନ ସାହିରେ ଦୁଇ ପରିବାର ଭିତରେ ଏହି ଗୋଷ୍ଠୀ ସଂଘର୍ଷ ଘଟିଛି । ଘଟଣାରେ 2 ଜଣଙ୍କ ମୃତ୍ୟୁ ହୋଇଥିବା ବେଳେ 6 ଜଣ ଗୁରୁତର ଆହତ ହୋଇଛନ୍ତି । ସମସ୍ତ ଗୁରୁତରଙ୍କୁ ଚିକିତ୍ସା ପାଇଁ ସ୍ଥାନୀୟ ରେବଣା ନୂଆଗାଁ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଛି ।
ମିଳିଥିବା ସୂଚନାନୁସାରେ, ଡିମ୍ବିରିଶେଣା ଗାଁର ଶରତ ଭୋଇ ଗାଁ ଦାଣ୍ଡରେ ଥିବା ପାନୀୟଜଳ ପାଇପ ଲାଇନରୁ ନିଜ ଘର ପାଖକୁ ପାଣି ପାଇପ ନେଇଥିଲେ । ସେଠାରୁ ସୁରିଆ ଭୋଇ ନିଜ ଘର ପାଖକୁ ପାଣି ପାଇପ ନେବା ପାଇଁ ଚାହିଁଥିଲେ । ମାତ୍ର ଶରତ ଭୋଇ ଏହାକୁ ବିରୋଧ କରି ଆସୁଥିଲେ । ଆଜି ସକାଳୁ ଏହି ଘଟଣାକୁ କେନ୍ଦ୍ର କରି 2 ପରିବାର ମଧ୍ୟରେ ଗୋଷ୍ଠୀ ସଂଘର୍ଷ ଘଟିଥିଲା । ତେଣ୍ଟା ମାଡରେ କାଳିଆ ଭୋଇର ମୃତ୍ୟୁ ଘଟିଥିବା ବେଳେ ସୁରିଆ ଭୋଇଙ୍କ ଟାଙ୍ଗିଆ ମାଡରେ ମୃତ୍ଯୁ ହୋଇଛି । ସେପଟେ ଖବର ପାଇଁ ପୋଲିସ ଘଟଣାସ୍ଥଳରେ ପହଞ୍ଚି ଉଭୟଙ୍କ ମୃତଦେହ ଜବତ କରିବା ସହ ଘଟଣାର ତଦନ୍ତ କରୁଛି ।
ବ୍ରହ୍ମଗିରିରୁ ଦେବାଶିଷ ଦାସ, ଇଟିଭି ଭାରତ
