ଶ୍ରୀମନ୍ଦିର ଭିତର ବେଢା ଭିଡିଓ ଭାଇରାଲ ଘଟଣା: ଯୁବତୀ ଅଟକ, ବାପା-ମା'ଙ୍କୁ ପଚରାଉଚୁରା

ଶ୍ରୀମନ୍ଦିର ଭିତର ବେଢା ଭିଡିଓ ଭାଇରାଲ ଘଟଣାରେ ଜଣେ ନାବାଳିକାଙ୍କୁ ଅଟକ ରଖିଛି ସିଂହଦ୍ବାର ପୋଲିସ ।

ପୁରୀ: ଶ୍ରୀମନ୍ଦିର ଭିତର ବେଢା ଭିଡିଓ ଭାଇରାଲ ଘଟଣାରେ ଜଣେ ନାବାଳିକାଙ୍କୁ ଅଟକ ରଖିଛି ସିଂହଦ୍ବାର ପୋଲିସ ।

ସୂଚନା ଅନୁଯାୟୀ, ଭାଇରାଲ ଭିଡିଓରେ ଶ୍ରୀମନ୍ଦିର ଭୋଗମଣ୍ଡପ ସମ୍ମୁଖ ଭାଗ ଓ ଆନନ୍ଦ ବଜାରର ଭିଡିଓ ଭାଇରାଲ ହୋଇଥିଲା। ଏହି ଭିଡିଓକୁ ଜଣେ ନାବାଳିକା ଟିକଟକରେ ବ୍ୟବହାର କରିଥିଲେ । ଯେଉଁଥିରେ ଭଜନ ରହିଥିଲା । ତେବେ ସୋସିଆଲ ମିଡିଆରେ ଭାଇରାଲ ହୋଇଥିବା ଏହି ଭିଡିଓ ପ୍ରସଙ୍ଗକୁ ପୋଲିସ ଗୁରୁତର ସହ ନେଇଥିଲା ।

ଯାହାଫଳରେ ଟିକଟକ୍ ଆକାଉଣ୍ଟ ଆଧାରରେ ପୋଲିସ ନାବାଳିକାଙ୍କୁ ଚିହ୍ନି ଗତ ବୁଧବାର ରାତିରେ ତାଙ୍କୁ ଥାନାକୁ ଅଣାଯାଇ ପଚରାଉଚରା କରାଯାଉଛି । ତେବେ ତାଙ୍କ ସହିତ ତାଙ୍କ ବାପାମାଆଙ୍କୁ ମଧ୍ୟ ପଚରାଉଚରା କରାଯାଉଛି ।

ତେବେ ସେ ନାବାଳିକା ହୋଇଥିବାରୁ ପୋଲିସ ଏହାକୁ ଗୁରୁତର ସହ ନେଇଛନ୍ତି । ସଂପୃକ୍ତ ନାବାଳିକା ଶ୍ରୀମନ୍ଦିର ଭିତରର ଭିଜୁଆଲକୁ ଟିକଟକରେ ବ୍ୟବହାର କରି ସୋସିଆଲ ମିଡିଆରେ ଭାଇରାଲ କରିଥିଲେ । ସେନେଇ ସିଂହଦ୍ବାର ଥାନାରେ ତାଙ୍କ ବିରୋଧରେ ଏକ ମାମଲା ମଧ୍ୟ ରୁଜୁ କରିଛି।

ତେବେ ଅଟକ ଥିବା ନାବାଳିକା ଜଣଙ୍କ ଖୋର୍ଦ୍ଧା ନିରାକାରପୁର ଅଞ୍ଚଳର । ତେବେ ଏ ଖବର ପ୍ରସାରିତ ହେବାପରେ ସୋସିଆଲ ମିଡିଆରେ ନିଜର ଦୋଷ ସ୍ବୀକାର କରିବା ସହ କ୍ଷମା ପ୍ରାର୍ଥନା କରିଥିଲେ ।

ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ