ଫନି ରିଲିଫରେ ଅନିୟମିତତା: ଗ୍ରାମବାସୀଙ୍କ ରାସ୍ତାରୋକ

ବାତ୍ୟା ବିପନ୍ନଙ୍କ ନାମ ତାଲିକାରେ ଅନିୟମିତତା ଅଭିଯୋଗ ଆଣି ରାସ୍ତାରୋକ କରିଛନ୍ତି ଗ୍ରାମବାସୀ । ପୁରୀ କୃଷ୍ଣପ୍ରସାଦ ବ୍ଲକର ଗୋପିନାଥପୁର ଗ୍ରାମବାସୀ ଜାତୀୟ ରାଜପଥରେ ବିକ୍ଷୋଭ କରିଛନ୍ତି ।

ବ୍ରହ୍ମଗିରି: ତେଜିଲା ନାମ ତାଲିକା ତାତି । ଜାତୀୟ ରାଜପଥ ଅବରୋଧ କଲେ ଗ୍ରାମବାସୀ । ବାତ୍ୟା ଫନିରେ ଘର ଭଙ୍ଗା ସହାୟତା ପାଇଁ ପ୍ରକାଶ ପାଇଥିବା ତାଲିକାରେ ଅନିୟମିତତା ଅଭିଯୋଗରେ ପୁରୀ ସାତପଡା ଜାତୀୟ ରାଜପଥକୁ ଅବରୋଧ କରାଯାଇଛି ।

କୃଷ୍ଣପ୍ରସାଦ ବ୍ଲକର ଗୋପୀନାଥପୁର ଗ୍ରାମବାସୀ ରାସ୍ତା ଅବରୋଧ କରିବା ସହ ନିର୍ଭୁଲ ତାଲିକା ପ୍ରସ୍ତୁତ ପାଇଁ ଦାବି ରଖିଛନ୍ତି । ତେବେ ଗତ ଶୁକ୍ରବାର ଅଣ ତିରିଶ ଗ୍ରାମରେ ଖୋଦ ବ୍ରହ୍ମଗିରି ତହସିଲଦାରଙ୍କୁ ହଟହଟା ହେବାକୁ ପଡ଼ିଥିଲା ।

ଫନିରେ ବ୍ରହ୍ମଗିରି ଓ ସାତପଡ଼ା ଅଞ୍ଚଳ ବ୍ୟାପକ କ୍ଷୟକ୍ଷତି ହୋଇଥିଲା । ଏଥିରେ ବହୁ ପରିବାର ବାସହରା ମଧ୍ୟ ହୋଇଥିଲେ। ତେଣୁ ବାତ୍ୟା ବିପନ୍ନଙ୍କ ପାଇଁ ସହାୟତା ଘୋଷଣା କରିଥିଲେ ସରକାର । ଏହି କାର୍ଯ୍ୟରେ ବ୍ଲକ ଓ ତହସିଲ କର୍ମଚାରୀମାନେ ନିୟୋଜିତ ହୋଇ ବିପନ୍ନ ହିତାଧିକାରୀଙ୍କ ନାମ ଘୋଷଣା କରିଥିଲେ । ଯାହାକୁ ଦେଖିବା ପରେ ଗ୍ରାମବାସୀ ଅସନ୍ତୋଷ ବ୍ୟକ୍ତ କରିଛନ୍ତି ।

ବ୍ରହ୍ମଗିରିରୁ ଦେବଶିଷ ଦାସ, ଇଟିଭି ଭାରତ